പുരസ്കാരം വാങ്ങാന് വേദിയിലെത്തിയ പത്താം ക്ലാസുകാരിയായ പെണ്കുട്ടിയെ അപമാനിച്ച സമസ്ത നേതാവിനെയും അത് തങ്ങളുടെ നയമാണെന്നു പ്രഖ്യാപിച്ച സമസ്തയേയും സംരക്ഷിച്ച് മുസ്ലീംലീഗ് നേതാവ് പി.കെ. കുഞ്ഞാലിക്കുട്ടി. ഒരു വടി കിട്ടിയാല് അടിക്കേണ്ട സംഘടനയല്ല സമസ്തയെന്ന് കുഞ്ഞാലിക്കുട്ടി പറഞ്ഞു.
ഈ ചര്ച്ചകള് അവസാനിപ്പിക്കേണ്ട സമയമായെന്നു പറഞ്ഞ കുഞ്ഞാലിക്കുട്ടി പെണ്കുട്ടിയെ അപമാനിച്ച മുസ്ല്ലിയാരുടെ നടപടിയ്ക്കെതിരെ ഒരക്ഷരം മിണ്ടിയില്ല. മലപ്പുറത്ത് മദ്രസാ പുരസ്കാരവേദിയില് വെച്ച് പത്താംക്ലാസ് വിദ്യാര്ത്ഥിനിയെ മുഷാവറ അംഗം എം ടി അബ്ദുള്ള മുസ്ലിയാര് അപമാനിച്ചതാണ് വിവാദമായത്.
സമസ്ത വേദിയില് പെണ്കുട്ടികള്ക്ക് പ്രവേശനമില്ലെന്നായിരുന്നു എം ടി അബ്ദുള്ള മുസ്ലിയാര് പറഞ്ഞത്. ഇനി മേലില് പെണ്കുട്ടികളെ സമസ്തയുടെ പൊതുവേദിയിലേക്ക് ക്ഷണിച്ചാല് കാണിച്ചു തരാം എന്ന് സംഘാടകരെ മുസ്ല്യാര് ശാസിക്കുകയും ചെയ്തിരുന്നു.