എന്തൊക്കെ പറഞ്ഞാലും പൊതുവിതരണം കാര്യക്ഷമമാക്കി അരിയും അത്യാവശ്യ ഭക്ഷ്യ സാധനങ്ങളും മിതമായ വിലയ്ക്ക് നല്കാന് കഴിഞ്ഞത് പിണറായി സര്ക്കാരിന്റെ നേട്ടം തന്നെ . കെ-റെയില് പോലെ ചിലത് പാളം തെറ്റിയിട്ടുണ്ടെന്ന് ജനത്തിന് തോന്നിയിട്ടുണ്ടെങ്കില് അത് തിരുത്താമല്ലോ എന്നാണ് സാന്ത്വനം . മാത്രമല്ല , തദ്ദേശ തിരഞ്ഞെടുപ്പുകളില് തിളങ്ങും വിജയം നേടാനും സൗഭാഗ്യം കിട്ടി . തൃക്കാക്കരയില് ആ 'സൗഭാഗ്യാ' വന്നില്ലെങ്കിലും അതൊരു 'അബദ്ധ'മായി കാണരുതെന്നാണ് സഖാവ് പറയാതെ പറയുന്നത് - ഒരു ഫാന്സി നമ്പര് കിട്ടിയാല് അതും സന്തോഷം . ഇല്ലെങ്കില് പോട്ടെ രാജീവേ ..
രണ്ടാം പിറന്നാളിന്റെ മധുരം പിണറായിയുടെ നാവിലുണ്ട് . പഞ്ചായത്തുകളില് നടന്ന ഉപ തെരഞ്ഞെടുപ്പുകളില് ഉജ്ജ്വല വിജയം (24 സീറ്റ്) യുഡിഎഫിന് (12 സീറ്റ്) കിട്ടിയതിന്റെ ഇരട്ടിയെന്നോ മുന് തിരഞ്ഞെടുപ്പിനേക്കാള് 4 സീറ്റ് കൂടുതലോയെന്ന് പറയാം . ഇതിനിടെ വിനാശ വര്ഷാചരണം ആചരിച്ച കോണ്ഗ്രസുകാര് സ്വയം പരിഹാസ്യരാകുന്നത് എന്തിനെന്ന് ചോദിക്കുന്നവരുമുണ്ടാകില്ലേ ? പഞ്ചായത്ത് ഉപതിരഞ്ഞെടുപ്പ് പിണറായി സര്ക്കാരിന്റെ ഒരു വര്ഷത്തെ ഭരണത്തിനുള്ള അംഗീകാരമായി തന്നെ പ്രതിപക്ഷം കാണുകയും തൃക്കാക്കര വിജയം ഏറ്റവും പുതിയ ജനവിധിയായി പിണറായി കാണുമോയെന്നു ചോദിക്കുകയുമല്ലേ സതീശാ താങ്കള് ചെയ്യേണ്ടിയിരുന്നത് ? അപ്പോള് ജനം പറയും: അത് ന്യായം !
ഇതാണ് രാഷ്ട്രീയക്കാരുടെ മുഴുവന് പ്രശ്നം ജനം എങ്ങനെ ചിന്തിക്കുന്നുവെന്ന് അവര് നോക്കാറില്ല , ഇന്ത്യയില് വിശേഷിച്ചും കേരളത്തിലെ പ്രധാന പ്രതിപക്ഷം ഇപ്പോള് മാധ്യമങ്ങള് തന്നെ . അച്ചടി മാധ്യമങ്ങളില് മനോരമ പത്രമാണ് മുന്നില് ദൃശ്യമാധ്യമങ്ങളില് ഏഷ്യാനെറ്റും . ഇടക്കാലത്ത് ഏഷ്യാനെറ്റ് നടത്തുന്ന ഇടപെടലുകള് ചെറുതൊന്നുമല്ല . ഈ രണ്ടു മാധ്യമങ്ങളാണ് പ്രതിപക്ഷത്തിന്റെ യഥാര്ത്ഥ ദൗത്യം നിര്വഹിക്കുന്നതെന്ന് തന്നെ പറയാം . ഏഷ്യാനെറ്റ് വാര്ത്ത വിഭാഗം (പ്രത്യേകിച്ച് വിനുവിന്റെ എട്ടുമണി ചര്ച്ച) സര്ക്കാരിനെ അലോസരപ്പെടുത്തിയത് കൊണ്ടാണല്ലോ സി.പി.എം സൈബര്സെല് വിനുവിനെ ഏറ്റവും ശ്രദ്ധേയനായ മാധ്യമപ്രവര്ത്തകനായി രൂപാന്തരപ്പെടുത്തിയത് . നേരത്തെ ജയശങ്കറും ഐ.ടി വിദഗ്ദന് ജോസഫും മാത്രമായിരുന്നു സി.പി.എം ടാര്ഗറ്റ് . ഗോവിന്ദന്കുട്ടിയുടെ എ.ബി.സി യുട്യൂബ് ചാനല് ജയശങ്കര് മൊഴികള്ക്ക് വലിയ പ്രാധാന്യം നല്കുക കൂടി ചെയ്തതോടെ ജയശങ്കര് എന്ന അഭിഭാഷകന് കോടതി വ്യവഹാരങ്ങളിലല്ല ഇത്തരം ഇടപെടലുകളിലാണ് അതീവ തല്പരന് മാത്രമല്ല , ഈ രംഗത്ത് മെഗാസ്റ്റാറാകാനും അവസരമുണ്ടായി . പിണറായി വിരുദ്ധ വികാരം ആളിക്കത്തിക്കുന്ന ചാലകശക്തിയായി മാറിക്കഴിഞ്ഞ ഈ പഴയ സി.പി.ഐക്കാരന് കുലംകുത്തി തന്നെയാണ് , തൃക്കാക്കരയില് ഇടത്പക്ഷത്തിനെതിരെ ആഞ്ഞടിക്കുന്ന ചക്രവാതച്ചുഴി .
പിണറായി ഇപ്പോഴും കൈവിടാത്തത് കൊണ്ട് മാത്രം ഒരു മാഷ് തിരുത പോലെ ചീഞ്ഞു നാറാതെ കേരളരാഷ്ട്രീയ ഫ്രിഡ്ജില് ഇപ്പോഴുമുണ്ടെന്നതും ആശ്വാസം . പഴയ കോണ്ഗ്രസുകാര് പാവങ്ങളാണെന്നും ചിന്തന് ശിബിരമല്ല അതിനപ്പുറമുള്ള ശിബിരം നടത്തിയാലും തലയില് ആള്താമസമുണ്ടാവില്ലെന്നതിന്റെ ജീവിക്കുന്ന രക്തസാക്ഷിയായി മാഷിനെ കാണുന്നതില് ഒരു തെറ്റുമില്ല .
കോണ്ഗ്രസല്ല , പാര്ട്ടി കോണ്ഗ്രസാണ് തനിക്ക് വലുതെന്ന് പറഞ്ഞു കണ്ണൂരിലേക്ക് വണ്ടി കയറിയപ്പോള് തന്നെ സി.പി.എം കോച്ചില് കയറി സുരക്ഷിതമായി (ഒന്നാം ക്ലാസ് എ.സി കോച്ചില് തന്നെ) ഇരിക്കുന്നതിന് പകരം ആ വണ്ടിയില് ചുമ്മാ തൂങ്ങിക്കിടന്നു കാണിച്ച അഭ്യാസം കണ്ട് ജനം കയ്യടിക്കുമെന്നായിരുന്നു, ആ കുമ്പളങ്ങി ബുദ്ധി .
അതിനിടെ ദൃശ്യമാധ്യമങ്ങളിലെ ന്യുജെന് കക്ഷികള് മാഷിനെയിട്ട് വട്ടം കളിപ്പിച്ചു ജോക്കറാക്കിയത് ഒന്നും ആ പാവം അറിഞ്ഞതേയില്ല . നിത്യേനയെന്നോണം ക്യാമറയുമായി ചെന്ന് ഹാസ്യ കഥാപാത്രമാക്കാന് വരുന്ന കൊച്ചന്മാര് , ഇപ്പോള് ആ വഴിക്ക് വരുന്നുമില്ല . തൃക്കാക്കര തിരഞ്ഞെടുപ്പിന്റെ പ്രചാരണ യോഗങ്ങളില് വികസന ശബ്ദം ഉയര്ത്തുവാന് പോലും ശരിക്കും മൈക്ക് കിട്ടുന്നില്ല . മൈക്ക് കെട്ടിയ നല്ലൊരു തുറന്ന വാഹനവും മഴ കൊള്ളാതിരിക്കാന് ഒരു ത്രിവര്ണ കുടയും ഘടിപ്പിച്ചു വിടാനെങ്കിലും രാജീവ് മന്ത്രി കരുണ കാണിക്കാത്തത് ശരിയാണോ ? പുലിയാണെന്ന് കരുതിയവരൊക്കെ എലിയാണെന്ന് തിരിച്ചറിഞ്ഞുവെന്നത് ശരി തന്നെ . എന്നാലും ഉമയുടെ കാര്യത്തില് ഒട്ടും വേണ്ടാത്ത സഹതാപതരംഗം മാഷിന് നല്കിയില്ലെങ്കില് നരകത്തില് താങ്കള് പോകുമെന്ന് നവസഭാ വിശ്വാസിയായ രാജീവ് തിരിച്ചറിയണം . ഇത് പോലെ (രാജീവിനെ പോലെ) പറഞ്ഞു പറ്റിക്കുന്ന കൊടും പാപം ചെയ്യുന്നവര്ക്ക് 2 തരം അറകളാണ് കത്തോലിക്ക സഭ ഓഫര് ചെയ്തിരിക്കുന്നത് . (ഒന്ന്) വിറക് അടുപ്പിന്റെ ചൂടുള്ള ശുദ്ധീകരണ സ്ഥലം (രണ്ട്) ഗ്യാസടുപ്പിനേക്കാള് ചൂടുള്ള നരകം . മാഷിന്റെയും,ജോയുടെയും,കര്ദിനാളിന്റെയും സഭ നരകത്തിലേക്ക് തള്ളേണ്ടതില്ലെങ്കില് മാഷിന് മോഹഭംഗം വരുത്താതിരിക്കുക !
കോണ്ഗ്രസ് നേതാക്കളുടെ ചൊല്പ്പടിക്ക് ഒരിക്കലും നില്ക്കാത്ത പി.ടി തോമസിനോട് ചെയ്യാന് പറ്റാത്തതെല്ലാം പാപപരിഹാര പ്രക്രിയ എന്ന നിലയില് പഴയ കോണ്ഗ്രസ് നേതാക്കള് ഉമയെക്കൊണ്ട് ചെയ്യിക്കുന്നില്ലേയെന്ന് പി.ടിയെ നെഞ്ചിലേറ്റുന്നവര് ചോദിക്കുന്നു . എന്നും സഭയെയും സമുദായത്തെയും ജാതിയെയും വെല്ലുവിളിച്ച പോരാളിയായിരുന്നല്ലോ പി.ടി തോമസ് . അവരുടെയെല്ലാം മുന്നില് രമയെക്കൊണ്ട് 'സ്തുതി' കൊടുപ്പിക്കുന്ന കാര്യത്തില് മാത്രമാണ് ഇലക്ഷന് മാനേജര്മാരുടെ മുഴുവന് ശ്രദ്ധയും . പുരുഷന്മാരേക്കാള് ഒട്ടേറെ സ്ത്രീകള് കൂടുതലുള്ള തൃക്കാക്കരയിലെ ഏക വനിതാ സ്ഥാനാര്ഥി എന്ന നിലയില് സര്ക്കാരിന്റെ സ്ത്രീവിരുദ്ധ നിലപാടിനെതിരെയും സിപിഎമ്മിലെ ശശിമാര്ക്കെതിരെയും ആഞ്ഞടിക്കേണ്ട കോണ്ഗ്രസ് ഇലക്ഷന് മാനേജര്മാര് , സ്ത്രീവിരുദ്ധ നിലപാടുകള് കാര്യമാക്കുന്നേയില്ലല്ലോ . പി.ടി തോമസിന്റെ തത്സമയ ഇടപെടലുകള് ഇല്ലാതിരുന്നെങ്കില് ഒന്നുമല്ലാതായി തീരുമായിരുന്ന സിനിമാ നടിക്കെതിരായി നടന്ന 'സ്പോണ്സേര്ഡ് ബലാല്സംഗത്തെ' പറ്റി ഒരക്ഷരം ഉമയെക്കൊണ്ട് അവര് പറയിപ്പിക്കുന്നുണ്ടോ ? ഹേമാറിപ്പാര്ട്ട് എവിടെയെന്ന് ഉമ ചോദിയ്ക്കാന് തുടങ്ങിയാല്
ഇവര് വാപൊത്തുന്നത് എന്തിന് ? എല്ലാവരുടെയും വോട്ടിന്റെ കൂട്ടത്തില് പി.ടിയുടെ വിധവയ്ക്ക് അവരുടെ വോട്ട് കൂടി വേണമെന്ന് ഇവര്ക്ക് നിര്ബന്ധമുള്ളത് കൊണ്ടാണോ ? ഉമ തിരഞ്ഞെടുപ്പ് പ്രചാരണം തുടങ്ങി വച്ചത് സിനിമാക്കാരന് രവീന്ദ്രന് അതിജീവിതക്ക് വേണ്ടി നടത്തിയ സമരവേദിയില് വച്ചായിരുന്നല്ലോ ? അതിനേക്കാള് ശക്തമായതും പി.ടിയുടെ ആത്മാവിനോട് നീതി പുലര്ത്തുന്നതുമായ എന്തെങ്കിലും ഒരു പ്രചാരണം (അജണ്ട) ഇത് വരെ ഈ കോണ്ഗ്രസുകാര്ക്ക് മുന്നോട്ട് വെക്കാന് കഴിഞ്ഞിട്ടുണ്ടോ ? ഇതൊന്ന് വിലയിരുത്താതെ പട്ടിയുടേതെന്നല്ല , സിംഹത്തിന്റെ തന്നെ ചങ്ങല പൊട്ടിച്ച് കളിക്കുകയാണവര് . പട്ടിയും ചങ്ങലയും പിണറായി പറഞ്ഞത് പോലെ ഇനിയുമുണ്ടാകും .
ഇതിനിടെ ഡോ.ജോ ജോസഫാകട്ടെ , നമുക്ക് നല്കുന്ന ചിത്രമോ ? ഹൃദയപ്പെട്ടിയുമായി തിരുവനന്തപുരത്ത് നിന്നോ കോഴിക്കോട്ട് നിന്നോ ഓടിവരുന്ന അതെ പാരവശ്യം വോട്ട് പിടിക്കാന് ഓടി നടക്കുന്ന അദ്ദേഹത്തിന്റെ മുഖത്തും ദൃശ്യമാധ്യമങ്ങളില് നാം കാണുന്നില്ലേ ? ഉമ്മന് ചാണ്ടി ഷേക്ക് ഹാന്ഡ് കൊടുക്കുന്നത് പോലെ തിരക്കിട്ട വോട്ടര്മാരെ തൊട്ട കൈവിരലുകള് ധൃതിയില് ജോ പിന്വലിക്കുന്നു ഒരു തിരക്കുമില്ലെന്ന ഭാവത്തില് കടന്ന പള്ളി രാമചന്ദ്രന് ചെയ്യുന്നത് പോലെ സംസാരിക്കുന്നവരുടെ ഷര്ട്ടിന്റെ കുടുക്കുകള് ഊരുകയും തിരിച്ചു പഴയപടി ഇടുകയും ചെയ്യണമെന്നല്ല , താന് മാത്രമല്ല തനിക്ക് വേറെയും ഒട്ടേറെ പേരെ കാണാന് ഉണ്ടന്ന മട്ട് ഒഴിവാക്കണമെന്ന് അദ്ദേഹത്തിന്റെ ഇലക്ഷന് മാനേജര്മാര് പറഞ്ഞു കൊടുക്കേണ്ടേ ? ഡോ. പെരിയപുറം ബോസ് കാത്തിരിക്കുന്നുണ്ടെന്ന ബേജാറില് ഹൃദയപ്പെട്ടി കൊണ്ടോടുന്ന തിരക്കൊന്നും ഇതിന് പാടില്ലെന്ന് തന്നെ പറഞ്ഞു കൊടുക്കണം .
വാല്ക്കഷ്ണം : കായ്ക്കാത്ത പ്ലാവിന് ചുറ്റും നിന്ന് കുട്ടികളെ കൊണ്ട് കൂവി പേടിപ്പിച്ചാല് പിറ്റേ വര്ഷം മരം നിറയെ ചക്കയുണ്ടാകുമെന്ന് ഒരു ചൊല്ലുണ്ട് . രാഹുല്ഗാന്ധിയെ പോലെ മടി പിടിച്ചു കിടക്കുന്നത് ഒഴിവാക്കാന് 'അമ്മ സോണിയ ചിന്തന് ശിബരം നടത്തുന്നത് പോലെ വീണാ ജോര്ജിനെ ആക്ടീവ് ആക്കാന് പിണറായിക്ക് തൃക്കാക്കരയില് ഇടത് ഭാഗത്തേക്ക് ഹൃദയം തുന്നി ചേര്ക്കുന്ന ഒരു ഡോക്ടറെ തന്നെ സ്ഥാനാര്ത്ഥിയായി കെട്ടിയിറക്കേണ്ടി വന്നു . അതോടെ വീണക്ക് ഒരു സംശയം തന്നെ വന്നു ഡോ.ജോയെ മത്സരിപ്പിക്കുന്നത് അടുത്ത നാല് വര്ഷം ആരോഗ്യ മന്ത്രിയാക്കാനാകുമോ ? ആരോഗ്യവകുപ്പ് പോരായെന്ന് ജോയ് സാറിനെ കൊണ്ട് പിണറായി പറയിപ്പിച്ചതാണോ ? അഭിഭാഷകനായ അരുണ്കുമാറിന്റെ പേര് പ്രഖ്യാപിക്കുകയും ചുമരെഴുത്ത് തുടങ്ങുകയും ചെയ്തു കഴിഞ്ഞ ശേഷം ഡോ.ജോയെ വച്ചത് അതിനല്ലേ ? മടിയന് കാളയെ ഉഷാറാക്കാന് കാളയുടെ ഉടമ കൂടുതല് മടി പിടിച്ചു കിടന്നാല് ആ കാളയെ കൊല്ലുമെന്ന് പറയുന്നത് കേള്പ്പിച്ചതും ആ കാള വീണ്ടും ഉഷാറായി പ്രവര്ത്തിക്കാന് തുടങ്ങിയതും ആ കാളയെ കൊല്ലാതിരുന്നതുമായ എല്ലാ എപ്പിസോഡും വീണ ശരിക്കും മനസിലാക്കി .'ഭക്ഷണം നമ്മുടെ അവകാശം' എന്ന മുദ്രാവാക്യവുമായി വീണ ഒരൊറ്റ ചാട്ടം ചീത്ത ഭക്ഷണവും ചീഞ്ഞ മത്സ്യവും നാറിയ മാംസവും പിടിച്ചെടുത്ത് വീണ മടിയന് കാളയെക്കാള് മിടുക്കിയായത് പിണറായി സഖാവ് കണ്ടല്ലോ . നൂറു സീറ്റ് തികച്ചാലും ഇല്ലെങ്കിലും വീണക്ക് കാര്യക്ഷമത ഇല്ലെന്ന് ചിറ്റയം ഗോപകുമാറിന് പോലും ഇനി പറയാന് പറ്റുമോ ?
കെ.എ ഫ്രാന്സിസ്