ദരിദ്രൻ ശീലിച്ചു
ചുവരിനെ നോക്കി
രൂപധ്യാനം

മനസ്സിന്റെ ശുന്യതയിൽ
നിരോധിച്ച നോട്ടിലെ 
കറ പടർന്നു

കറ കളയാനുള്ള
ഒരുപായം തേടി
എഴുന്നേറ്റപ്പോൾ
ഒരു കറയുമില്ലാത്ത
മനസ്സ് നഷ്ടമായി
എന്നന്നേക്കുമായി!

2

കണ്ണാടിയും
പ്രതിബിംബവും
ബിംബത്തെ
അറിഞ്ഞതേയില്ല

ബിംബം
കള്ളപ്പണമെണ്ണുന്ന
തിരക്കിലായിരുന്നതിനാൽ
ആത്മസ്വരൂപത്തെയും
അറിഞ്ഞതേയില്ല.

ആരാധകനില്ലാത്ത
ആരാധന 
സ്ഥലകാലങ്ങളെ
കവച്ചു നിൽക്കുന്ന
നിശ്ചലതയിൽ 
കൂടാരം കെട്ടുകയും
ദിവ്യബലിയൊരുക്കുകയും ചെയ്തു!

3

രൂപസൌന്ദര്യത്തിൽ
മയങ്ങിപ്പോയതിനാൽ
മനോസൌന്ദര്യത്തിൽ
ധ്യാനം പതിഞ്ഞില്ല പോലും

മനോസൌന്ദര്യത്തിൽ
മയങ്ങിപ്പോയതിനാൽ
ആത്മസൌന്ദര്യത്തിൽ
ധ്യാനം ഉറച്ചില്ല പോലും

ആത്മസൌന്ദര്യത്തിൽ
മയങ്ങിപ്പോയതിനാൽ
സഹജാനന്ദസ്ഥിതിയിൽ
ധ്യാനം ലയിച്ചില്ല പോലും!

4

ദരിദ്രന്റെ ദൈവം 
അപ്പമാകുന്നു
പക്ഷെ അപ്പം കൊണ്ട് മാത്രം
അവൻ തൃപ്തിപ്പെടില്ല
വല്ലപ്പോഴും ഒരടയും വേണം!

5

ധനത്തിനായുള്ള
ആരാധന
ഉള്ളവന്റെയും ഇല്ലാത്തവന്റെയും
പരാധീനതയല്ലോ
ഡോളർ ഈസ് ദ ഡെവിൾ!