Image

പ്രണയമിങ്ങനെ പല നിറങ്ങളിൽ (വാലന്റൈൻസ് ഡേ രചന-1 - ശ്രീലേഖ എൽ കെ, കോഴിക്കോട്)

Published on 03 February, 2025
പ്രണയമിങ്ങനെ പല നിറങ്ങളിൽ (വാലന്റൈൻസ് ഡേ രചന-1 - ശ്രീലേഖ എൽ കെ, കോഴിക്കോട്)

എങ്കിലും ചിലരുണ്ട്
ഓർമതെറ്റ് പോൽ ഇടയ്ക്കിടയ്ക്ക്
സമ്മതം ചോദിക്കാതെ
പടി കേറി വന്നകത്തിരുന്ന്
കൊട്ടുവാ നേരങ്ങളെ
മെഴുതിരി പോലെ തെളിയിച്ച്
ചത്തു പോകാവുന്ന സമയങ്ങളെ
ഉരുക്കി കളയുന്നവർ.

ചിലരുണ്ട്, രാത്രി സ്വപ്‌നങ്ങൾ
വലം കാൽ വെച്ചു കയറി
ഒരു ചിരിയിൽ ഊർന്നിറങ്ങി
പുലർകാലങ്ങളെ
സമ്മോഹനങ്ങളാക്കുന്നവർ

പുകവണ്ടി കൂകലു പോലെ
കൌതുകം തന്ന്
പാഞ്ഞു പോയവരും,
ഒരുമിച്ച് ഒരു വേഗത്തിൽ
പോകാമെന്ന് കൂടെ കൂട്ടിയവരും
അത്യുഷ്ണത്തിലേക്ക്
തള്ളിയിട്ടവരുമുണ്ട്

അതിശയക്കടൽ കാട്ടി
അത് പോലൊന്ന് ഉള്ളിലുണ്ടെന്ന്
കടല കൊറിച്ചു പങ്കു വെച്ചവർ
കാലു നനച്ചു തിരകൾ പോലെ
പാഞ്ഞു കേറി തിരികെ മടങ്ങി
കടലിലേക്ക് ചേർന്നവരുമുണ്ട്.

കടപ്പാടുകളുടെ കല്ലുരുട്ടി
മലമുകളിൽ നിന്ന് താഴെക്കിട്ട്
കൈ കൊട്ടി ചിരിച്ചവരുണ്ട്.

പലരുണ്ട്, പലതുണ്ട്
ഓർത്തെടുക്കാൻ കഴിയുന്ന
കാലം വരേയ്ക്കും
ഓർമിക്കുവാൻ..........

Join WhatsApp News
Sudhir Panikkaveetil 2025-02-03 23:27:04
ഇനിയും വേറെ ചിലരുണ്ട് നമ്മൾ അറിയാത്തവർ, നമ്മൾക്കിഷ്ടമാകുന്നവർ പക്ഷെ തിരിച്ചറിയാത്തവർ അവരാണ് പ്രണയനഷ്ടങ്ങൾ ഉണ്ടാക്കുന്നവർ. അറിയുമ്പോഴേക്കും പ്രണയജ്വാല കെട്ടുപോയി കാണും. ശ്രീമതി ശ്രീലേഖയുടെ കവിതകൾ ഇമലയാളിയിൽ വായിക്കാറുണ്ട്. നന്നായി. പ്രണയദിനാശംസകൾ.
ഒരു വായനക്കാരൻ 2025-02-04 00:33:39
വളരെ നല്ലൊരു കവിത! പ്രണയലോകത്തെ യാഥാർഥ്യങ്ങളെ ഭംഗിയായി ആധുനിക ചിത്രം പോലെ വരച്ചു കാട്ടിയിരിക്കുന്നു! അഭിനന്ദനം!
ശ്രീലേഖ 2025-02-05 13:43:25
നന്ദി.. വായനയ്ക്ക്....
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക