ലക്ഷണമൊത്തൊരു നാരിയെ വേള്ക്കുവാന്
ലക്ഷ്യബോധത്തോടെ ഞാന് നടന്നേറെ
ശാകുന്തളത്തിലെ നായികയെന്നപോല്
ശാതോദരിയവളായിരിക്കേണം;
സൗമ്യ സുശീലയാം എന് സഹധര്മ്മിണി
ശാലീന സുന്ദരിയായിരിക്കേണം!
ആയിരം തന്വികളെ കണ്ടുവെങ്കിലും
ആരിലും സംതൃപ്തനായില്ല ഞാന്
കാലങ്ങള് നീങ്ങിയെന് സങ്കല്പഭാര്യയെ
കാണാതെ വ്യര്ത്ഥമായ് ഞാനലഞ്ഞു!
കണ്ടു ശകുന്തളപോലൊരു പെണ്ണിനെ,
കല്യാണദല്ലാള് മൊഴിഞ്ഞൊരുനാള്
ശാകുന്തളത്തിലെ നായകന്പോലൊരു
മാരനെയത്രെ അവള്ക്കു മോഹം;
സാധ്യമോ ദുഷ്യന്തനെപോലെയാകുവാന്
ചോദ്യമിതെന്റെ കാതില് മുഴങ്ങി!
ഇടിമിന്നല്പോലെയീ വാക്കുകള് വന്നെന്റെ
ഇടനെഞ്ചില് തീനാളമായ് നിറഞ്ഞു
പെട്ടെന്നു ഞാന് നിലക്കണ്ണാടിയില് നോക്കി
ലജ്ജയോടെ 'ഇല്ല'യെന്നു ചൊന്നു!!
Line4: ശാതോദരി- സുന്ദരി
Line 7:തന്വി-സുന്ദരി