മസ്‌ക്കറ്റ്  ഇന്ത്യന്‍ സോഷ്യല്‍ ക്ലബ് കേരള വിഭാഗം ഒരു ഇടവേളക്ക് ശേഷം  മസ്‌കറ്റിലെ നാടക വേദിയില്‍ വീണ്ടും സജീവമാകുന്നു. എന്‍ ശശിധരന്‍ രചിച്ച 'അടുക്കള'  എന്ന നാടകത്തിനു രംഗാവിഷ്‌കാരമൊരുക്കുന്നത് മസ്‌കറ്റിലെ പ്രശസ്ത നാടക പ്രവര്‍ത്തകന്‍ പത്മനാഭന്‍ തലോറയാണ്. 

ഷീനയും സുനില്‍ ദത്തും മുഖ്യ വേഷമിടുന്ന നാടകം, 2020 ജനവരി മൂന്നിന്  അല്‍ ഫെലാജ് ഹോട്ടലിലെ ഗ്രാന്‍ഡ് ഹാളിലാണ് അരങ്ങേറുന്നത്. വൈകുന്നേരം 5.30 മുതല്‍ ഹാളിലേക്ക് പ്രവേശനം അനുവദിക്കും. 

സ്ത്രീപക്ഷ ആശയങ്ങളുടെ മുഖ്യ സമരവുമായി അടുക്കള എന്ന രൂപകം നമ്മുടെ ജീവിതത്തില്‍ മാറുകയാണ്. കപടസദാചാരസങ്കല്‍പ്പങ്ങളും ഹൃദയശ്യൂന്യമായ സ്ത്രീപുരുഷബന്ധങ്ങളും കൊണ്ട് മലയാളി കെട്ടിപ്പൊക്കിയ ഒരു ജീവിതവ്യവസ്ഥയെ ഏറെ അസ്വസ്ഥമാക്കാനിടയുള്ള ഒരു സൃഷ്ടിയാണ് അടുക്കള. 

എന്‍ പി മുരളി, വേണുഗോപാല്‍, രെഞ്ജു അനു, സൌമ്യ വിനോദ്, അനുപമ സന്തോഷ്, ദിനേശ് എങ്ങൂര്‍, മോഹന്‍ കരിവെള്ളൂര്‍,  വിനോദ് ഗുരുവായൂര്‍, മാസ്റ്റര്‍ ഹൃദത് സന്തോഷ്, കുമാരി ഇഷാനി വിനോദ്, കുമാരി വാമിക വിനോദ്   എന്നിവരും വിവിധ വേഷങ്ങളിടുന്നു.  പ്രതാപ് പാടിയില്‍ വെളിച്ചവും രാജീവ് കീഴറ ശബ്ദ നിയന്ത്രണവും ഒരുക്കുന്നു.  സംഗീതം നല്‍കിയിരിക്കുന്നത് സതീഷ് കണ്ണൂരാണ്. പ്രവാസ ലോകത്തെ നടീനടന്‍മാര്‍ മാത്രമാണ് 'അടുക്കള' യില്‍ വേഷമിടുന്നത്. 

മസ്‌കറ്റിലെ നാടക വേദിയില്‍ സജീവമായിരുന്ന കേരള വിഭാഗം, മുന്‍ കാലങ്ങളില്‍ ഇന്ത്യന്‍ സോഷ്യല്‍ ക്ലബ് സംഘടിപ്പിച്ചിരുന്ന നാടകോത്സവങ്ങളില്‍ സജീവമായി പങ്കെടുത്തു വന്നിരുന്നു. കേരള സംഗീത നാടക അക്കാദമി മസ്‌കറ്റില്‍ സംഘടിപ്പിച്ച നാടക മത്സരത്തിലും പ്രേക്ഷക ശ്രദ്ധ നേടിയ നാടകം അവതരിപ്പിക്കുവാന്‍ കേരള വിഭാഗത്തിന് കഴിഞ്ഞിരുന്നു.    

വാര്‍ത്താ സമ്മേളനത്തില്‍ പി എം ജാബിര്‍, പത്മനാഭന്‍ തലോറ, സന്തോഷ് കുമാര്‍, റെജു മറക്കാത്ത്, മോഹന്‍ കരിവെള്ളൂര്‍, പ്രസാദ്, സജേഷ് കുമാര്‍, നിശാന്ത്. പങ്കെടുത്തു.