'കൊച്ചി കണ്ടവന് അച്ചിവേണ്ട; കൊല്ലം കണ്ടവന് ഇല്ലം വേണ്ട' എന്ന് അഭിമാനത്തോടെ പറഞ്ഞു നടന്നിരുന്ന ഒരു കാലം ഉണ്ടായിരുന്നു. അന്ന് യൂറോപ്പിനോട് ഒന്നും കിടപിടിക്കാൻ പറ്റിയില്ലായിരുന്നെങ്കിലും കൊച്ചി അവളുടെ സൗന്ദര്യത്തിൽ അത്ര മോശക്കാരിയായിരുന്നില്ല. അതുപോലെ സാക്ഷരകേരളം എന്ന് പറയുവാനും അഭിമാനമായിരുന്നു. എന്നാൽ ഇന്ന് അങ്ങനെ പറയുവാൻ കഴിയുന്നില്ല . മനുഷ്യന് അറിവ് വർദ്ധിക്കുമ്പോൾ, അത് അവന്റെ പ്രവർത്തികളിൽ പ്രതിഫലിപ്പിക്കപ്പെടേണം. എന്നാൽ ഒരു വര്ഷം മുൻപ് കൊച്ചിയിലെ കണ്ടെയിനർ റോഡിലൂടെ യാത്ര ചെയ്‍തപ്പോൾ കണ്ട കാഴ്‌ച വേദനാ ജനകമായിരുന്നു . വഴിയരികിൽ വാരി എറിഞ്ഞിട്ടിരിക്കുന്ന മാലിന്യങ്ങളും, അത് വന്നു ചിക്കിചികയുന്ന ചെത്തിലപട്ടികളും കഴിഞ്ഞുപോയ ആ അഭിമാനകരമായ ദിവസങ്ങളെ വെറും ഓർമ്മയാക്കി മാറ്റുന്നു . ഒരു കാലത്ത് സുഗന്ധദ്രവ്യങ്ങൾക്ക് പേരുകേട്ട കേരളം ഇന്ന് ദുർഗന്ധപൂരിതമല്ലെന്ന് അഭിമാനത്തോടെ പറയാൻ കഴിയുമോ? കൊച്ചി പട്ടണത്തിലെ ഹോസ്പറ്റിലുകളിൽ നിന്നും പുറം തള്ളുന്ന ചപ്പു ചവറുകൾ, ഉപയോഗിച്ച സിറിഞ്ചടക്കം, പെരുമ്പാവൂരും പ്രാന്തപ്രദേശങ്ങളിലുമുള്ള റബർതോട്ടങ്ങളിൽ കൊണ്ട് രാത്രികാലങ്ങളിൽ തള്ളുന്നതും, അത് നാട്ടുകാർ പിടിക്കുന്നതുമൊക്കെ അനുഭവസ്തരിൽ നിന്ന് കേട്ടിട്ടുണ്ട്, എറണാകുളത്തു നിന്ന് NH 47 ഹൈവേയിലൂടെ സഞ്ചരിക്കുമ്പോൾ മാമല കഴിഞ്ഞ് ശാസ്താമുകളിന് തൊട്ടു മുൻപ് ഇടത്തു വശത്ത് നോക്കിയാൽ കാണാവുന്ന കാഴ്ച്ച ഹൃദയഭേദകമാണ്. ദുർഗന്ധം വമിക്കുന്ന മാലിന്യ കൂമ്പാരങ്ങൾ എറണാകുളം പട്ടണത്തിൽ സെന്റ് തെരേസാസ് കോളേജിന്റെയും ലോകോളേജിന്റെയും ഇടയിലുള്ള ഓടയിൽ നിന്ന് വരുന്ന ദുർഗന്ധം മനുഷ്യരെ ബോധം കെടുത്താൻ പോരുന്നതാണ്. അവിടെ സ്ഥിരം താമസിക്കുമ്പോൾ ദുർഗന്ധം സുഗന്ധമായി മാറാം . കോവിഡ് നിയന്ത്രണത്തിന് മാതൃകയായ കേരളം മാലിന്യ നിർമ്മാർജ്ജനത്തിലും മാതൃകയാവണം. നായ്ക്കളെ അലഞ്ഞു തിരിഞ്ഞു നടക്കാൻ അനുവദിക്കുന്നവർക്കും, മാലിന്യങ്ങൾ വലിച്ചെറിയുന്നവർക്കും പിഴശിക്ഷ ഏർപ്പെടുത്തണം . ജനങ്ങൾക്ക് ഇതിൽ പങ്ക് ചേരാം . മൊബൈൽ ഫോണിലെ ക്യാമറ ഉപയോഗിച്ച് എറിയുന്നവരുടെ സ്‌കൂട്ടറിന്റെയും കാറിന്റെയും നമ്പർ പ്ലേറ്റിന്റെ പിക്ച്ചർ എടുത്ത് നിയമപാലകർക്ക് അയച്ചുകൊടുത്താൽ , പിഴശിക്ഷ ഓൺ ലൈനിലൂടെ ഈടാക്കാം . ഇതിലൂടെ ഉണ്ടാക്കുന്ന വരുമാനം ഉപയോഗിച്ച് പട്ടണത്തെ കൂടുതൽ മനോഹരമാക്കാനും അതുവഴി വിനോദസഞ്ചാരികളെ ആകർഷിക്കുവാനും കഴിയും. ഇതൊക്കെ ചെയ്യുമ്പോൾ കോവിഡ് മാത്രമല്ല, ഏലി പനി, ചിക്കൻ ഗുനിയ, തക്കാളി പനി അങ്ങനെ പലതിനെയും നിയന്ത്രിക്കാൻ കഴിയും. ഇത്തവണ കൊച്ചിയുടെ നടന്നപ്പോൾ പൊതു സ്ഥലത്ത് പുകവലിക്കുന്നവരെ കാണാൻ കഴിഞ്ഞില്ല എന്നത് കേരള ജനതക്ക് വേണ്ടിവന്നാൽ ഇതൊക്കെ സാദ്ധ്യമാണെന്നുളളതിന്റെ തെളിവാണ് . ശുചിത്വം എന്ന് പറയുന്നത് കേരളത്തിൽ പണ്ടേ തുടങ്ങി നമ്മളുടെ പൂർവ്വികർ പാലിച്ചിരുന്നതാണ് . വീട്ടിൽ കയറുന്നതിന് മുൻപ് കാലു കഴുകി, മുഖം കഴുകി വായിൽ അൽപ്പം വെള്ളവും കവിൾ കൊണ്ട് തുപ്പി കളഞ്ഞ് ഇട്ടുകൊണ്ടുവന്ന ചെരിപ്പ് പുറത്തിട്ട് നമ്മളുടെ പിതാമഹന്മാർ ചെയ്യുന്ന കാഴ്ച്ച കോവിഡ് കാലത്ത് ഓർമ്മയിൽ വരുന്നു . ഇന്ന് വിദ്യാസമ്പന്നമായ സമൂഹം അതാണ് പ്രാവർത്തികമാക്കാൻ ശ്രമിക്കുന്നത് . ഇത്രയും എഴുതിയതിന് മറ്റൊരു കാരണവും ഉണ്ട്, അമേരിക്ക,യൂറോപ്പ്, ഗൾഫ് ഇവിടെയൊക്കെയുള്ള മലയാളികളെ ഇടിച്ചുതാഴ്ത്തികൊണ്ടു പടച്ചു വിടുന്ന വീഡിയോ ക്ലിപ്പുകൾ കണ്ടു മടുത്തു. അതുകാണുമ്പോൾ നമ്മുടെ കേരളം വളർന്നിട്ടില്ല എന്ന് വളരെ വ്യക്തമാണ് . ആറുകളിലും പുഴകളിലും മാലിന്യം കൊണ്ടെറിയുകയും, പുഴകളിലെ മണൽ മാന്തി വിൽക്കുയും മല ഇടിച്ചു വില്കുയുകയും ചെയ്യുന്ന കേരളത്തിന്റെ അവസ്ഥ നേരെയാക്കാതെ, സാക്ഷര കേരളത്തിന്റെ മഹത്വം പാടി പുകഴ്ത്തിയിട്ട് എന്ത് കാര്യം . ഗാന്ധിജി പറഞ്ഞതുപോലെ ' സ്വന്തം വീടിന്റെ മുറ്റം വൃത്തിയാക്കിയാൽ നാട് വൃത്തിയാകും " അങ്ങനെ ആയിക്കഴിയുമ്പോൾ ആത്മ വിശ്വാസത്തോടെ പറയാൻ കഴിയും "നോക്കു ഞങ്ങളെ മാതൃകയാക്കു:" യഥാർത്ഥ വിദ്യാഭ്യാസം പ്രാവർത്തികമാക്കപ്പെടുന്നത് അങ്ങനെയാണ് . ജി. പുത്തൻകുരിശ്