ഭയാക്രാന്തമായ ഒരു കാലഘട്ടത്തിലൂടെതന്നെയാണ് നാം കടന്നുപോകുന്നത്. ജീവിതത്തിന്റെ നിരര്ത്ഥകത മനുഷ്യനെ ആകുലപ്പെടുത്തുന്നു. ഈ ചെറിയൊരു വൈറസിന് മുന്നില് നിന്ന് മനുഷ്യന് മാത്രമാണിങ്ങനെ പേടിച്ച് ഓടിയൊളിക്കുന്നത്, മറ്റു ജീവികള് സ്വതന്ത്രരായി ഭയമില്ലാതെ പുറത്തിറങ്ങുന്നു,
മത്സര ബുദ്ധിയോടെ വെല്ലുവിളിച്ചു നടന്ന മനുഷ്യന് ഇന്ന് പ്രാണഭയത്തോടെ ചുറ്റും നോക്കുന്നു. ജീവിതത്തിന്റെ ക്ഷണികത മനുഷ്യനെ പ്രകൃതി ഓര്മപ്പെടുത്തുന്നു.
എങ്കിലും ഭയമല്ല ജാഗ്രതയാണ് വേണ്ടതെന്ന തിരിച്ചറിവ് ഭൂരിഭാഗം മനുഷ്യരിലും ഉണ്ടായിട്ടുണ്ട്. പരസ്പരമുള്ള സ്നേഹത്തിലും സഹകരണത്തിലുമാണ് എല്ലാവരും മുന്നോട്ട് പോകുന്നത്.
ഒ. ഹെന്റിയുടെ പ്രശസ്തമായ `ലാസ്റ്റ് ലീഫ്' എന്ന കഥയിലേതുപോലെ സഹജീവികളോടുള്ള കരുതലിന്റെ ഇലകള് നാമും മറ്റുള്ളവര്ക്കായി വരച്ചുവെക്കേണ്ടിയിരിക്കുന്നു. ഏതു കാറ്റിലും മഴയിലും കൊഴിഞ്ഞുവീഴാത്ത, പ്രതീക്ഷയുടെ ഒരു ഇല രോഗികള്ക്കായി കാത്തുവെക്കുന്ന നമ്മുടെ ആരോഗ്യപ്രവര്ത്തകര്ക്കും സല്യൂട്ട്.
`ലാസ്റ്റ് ലീഫി'ല്, ഒരു കാറ്റിനും അടര്ത്തിവീഴ്ത്താനാവാത്ത അവസാനത്തെ ഇല കഥാനായികയുടെ ആത്മവിശ്വാസത്തെ കെടാതെ ജ്വലിപ്പിച്ചു നിര്ത്തി. പിന്നെ, ജീവിതത്തിലേക്ക് അവള് ധൈര്യമായി ചുവടുവച്ചു. അതുപോലെ നമുക്കും പ്രതീക്ഷയിലേക്ക് ചുവടുവെക്കാം...