കൊറോണ പടര്ന്നതിനാലായിരിക്കാം കഴിഞ്ഞ ചില മാസങ്ങളില് റിപ്പബ്ലിക്കന്, ഡെമോക്രാറ്റിക് പാര്ട്ടി നേതാക്കള് തമ്മിലുള്ള വാക്പോര് കുറച്ച് ശാന്തമായിരുന്നു. പ്രസിഡന്റ് തിരഞ്ഞെടുപ്പിലെ തന്റെ എതിരാളിയും മുന് വൈസ് പ്രസിഡന്റുമായ ജോ ബൈഡനെകുറിച്ചുള്ള പ്രസിഡന്റ് ഡോണള്ഡ് ട്രമ്പിന്റെ അഭിപ്രായങ്ങളും ബൈഡന്റെ മറുപടിയും ജനപ്രതിനിധി സഭ സ്പീക്കര് നാന്സി പെലോസിയുടെ വിമര്ശനങ്ങളും, തുടര്ന്നിരുന്നത് വിസ്മരിക്കുന്നില്ല. ഇപ്പോള് മുന് പ്രസിഡന്റ് ബരാക്ക് ഒബാമ ഒരു വലിയ വിവാദത്തിന് തിരി കൊളുത്തിയിരിക്കുകയാണ്.
ട്രമ്പ് കൊറോണ വൈറസ് പ്രതിരോധപ്രവര്ത്തനങ്ങള് ആരംഭിക്കുവാന് വൈകി, ഇതുമൂലമാണ് അമേരിക്കയില് ഇത്രയധികം മരണം സംഭവിച്ചത് എന്ന വിമര്ശനം ചില കോണുകളില് നിന്ന് ഉയര്ന്നിരുന്നു. രാജ്യത്തെ ആദ്യത്തെ കറുത്തവര്ഗക്കാരനായ പ്രസിഡന്റായി അറിയപ്പെടുന്ന ഒബാമ ഇതേ വിമര്ശനം ഹിസ്റ്റോറിക്കലി ബ്ലാക്ക് കോളേജസിന്റെ കമന്റ്സ്മെന്റ്(ബിരുദദാന ചടങ്ങില് പ്രസംഗിക്കവെ ശക്തമായി ഉന്നയിച്ചു.
ഒബാമയുടെ വിമര്ശനം തികച്ചും അനവസരത്തിലായിരുന്നു എന്ന ആരോപണവുമായി മുന് പ്രസിഡന്റ് ജോര്ജ് ഡബ്ലിയൂ ബുഷിന്റെ സീനിയര് അഡ് വൈസര് കാള് റോവ് രംഗത്തെത്തി. ഫോക്സ് ചാനലിലെ ഒരു ടോക്ക് ഷോയുടെ ആതിഥേയന് ബ്രയാന് കില്മീഡും വിമര്ശനത്തില് പങ്കു ചേര്ന്നു. മുന് പ്രസിഡന്റുമാര് നിലവിലെ കമാന്ഡര് ഇന്ചീഫിനെ വിമര്ശിക്കരുത് എന്ന നിയമമാണ് മുന് പ്രസിഡന്റ് ലംഘിച്ചത്. ഒരു കമന്സ്മെന്റ് സെറിമണിയില് അടുത്ത തലമുറയിലെ ബിരുദധാരികള്ക്ക് പ്രചോദനം നല്കുകയാണ് വേണ്ടത്. ഒബാമ പ്രസിഡന്റ് ബുഷ് ജൂനിയറിനെയും റോവിനെയും വിമര്ശിച്ചിരുന്നു. ഹിസ്റ്റോറിക്കലി ബ്ലാക്ക് കോളേജസ് ആന്റ് യൂണിവേഴ്സിറ്റീസിന്റെ ഒരു ചടങ്ങ് ഒരു 'പൊളിറ്റിക്കല് ഡ്രൈവ് ബൈ ഷൂട്ടിംഗ് ' ആക്കി മാറ്റിയതായി റോവ് ആരോപിച്ചു. ബിരുദധാരികളോട് ജീവിതം കൊണ്ടുവരുന്ന വെല്ലുവിളികളെ കുറിച്ചായിരുന്നു സംസാരിക്കേണ്ടിയിരുന്നത്, റോവ് പറഞ്ഞു. റോവിന്റെ പൊളിറ്റിക്കല് ഡ്രൈവ് ബൈ ഷൂട്ടിംഗ് ഉടനെ തന്നെ പ്രതിഷേധം ക്ഷണിച്ചു വരുത്തി. ചില വിമര്ശകര് വളരെ മോശമായി പ്രതികരിച്ചു. മുന് ഒബാമ വക്താവ് ടോമി വിക്ടര് റോവ് ഈ വാക്കുകള് മനഃപ്പൂര്വം തിരഞ്ഞെടുത്തതാണെന്ന് പറഞ്ഞു. ഗണ് വയലന്സ് അവഗണിക്കുന്ന ഫോക്സ് ന്യൂസ് റോവിനെപോലെയുള്ള ആളുകളുടെ വര്ഗീയ വിരോധവും ഒബാമയെ 'പോലീസ്' ചെയ്യുവാന് അനുവദിക്കുന്നത് എങ്ങനെയാണെന്ന് ചോദിച്ചു.
ഒബാമയും മുന് പ്രഥമവനിത മിഷെലും ഈയിടെയായി അമേരിക്കന് രാഷ്ട്രീയത്തില് കൂടുതല് താല്പര്യം പ്രകടിപ്പിക്കുന്നത് മിഷെലിനെ ബൈഡന്റെ റണ്ണിംഗ് മേറ്റ്(വൈസ് പ്രസിഡന്റ് സ്ഥാനാര്ത്ഥി) ആക്കാന് വേണ്ടി ആയിരിക്കണം എന്ന് ചിലര് ഉറക്കെ ചിന്തിച്ചു. മറ്റു ചിലര് ബൈഡന് പ്രസിഡന്റായാല് മിഷെലിന് ക്യാബിനറ്റില് ഒരു സ്ഥാനം ഉണ്ടാവും എന്ന് വിശ്വസിക്കുന്നു. മറ്റൊരുകൂട്ടര് അത്ര വിദൂരമല്ലാത്ത ഭാവിയിലെ ഒരു തിരക്കഥ മെനഞ്ഞു. പ്രസിഡന്റ് തിരഞ്ഞെടുപ്പില് ബൈഡന് ജയിച്ചാല് ഒന്നാം ഊഴത്തിന് ശേഷം ആരോഗ്യപരമായ പരിമിതികളാല് 2024 ല് ഒരു രണ്ടാം ഊഴത്തിന് ശ്രമിക്കുക പ്രയാസമാണ്. മിഷെല് 2024 ലോ 2028 ലോ ഡെമോക്രാറ്റിക് പാര്ട്ടിയുടെ പ്രസിഡന്റ് സ്ഥാനാര്ത്ഥിയായി രംംഗത്തെത്തും എന്ന് ഇവര് പറയുന്നു.
ഒബാമയ്ക്കോ ബൈഡനോ എതിരെ ക്രിമിനല് അന്വേഷണത്തിന്റെ സാധ്യത താന് കാണുന്നില്ല എന്ന അറ്റേണി ജനറല് വില്യം ബാറിന്റെ പ്രസ്താവനയോട് ട്രമ്പ് രൂക്ഷമായി പ്രതികരിച്ചു, ഞാനായിരുന്നെങ്കില് അവര് അതു ചെയ്യുമായിരുന്നു. അവരായത് കൊണ്ട് ചെയ്യുന്നില്ല. എനിക്ക് അത്ഭുതം തോന്നുന്നു. കാരണം സംഭവിച്ചു കൊണ്ടിരുന്ന എല്ലാ കാര്യങ്ങളും ഒബാമ അറിഞ്ഞിരുന്നു. ഇ്ത ഒരു ഡബിള് സ്റ്റാന്ഡേര്ഡിന്റെ തുടര്ച്ചയാണ്. എനിക്കതില് അത്ഭുതം തോന്നുന്നു, പ്രസിഡന്റ് പറഞ്ഞു. യു.എസ്. അറ്റേണി ജോണ് ഡര്ഹാമിന്റെ റഷ്യന് അന്വേഷണം എഫ്ബിഐ തീരുമാനം എന്നിവ ഒബാമയ്ക്കോ ബൈഡനോ എതിരെ ക്രിമിനല് അന്വേഷണത്തില് കലാശിക്കുമെന്ന് താന് പ്രതീക്ഷിക്കുന്നില്ല എന്നാണ് ബാര് പറഞ്ഞത്.