കോഴിക്കോട്: രാജ്യ സഭാംഗവും മാതൃഭൂമി മാനേജിങ്ങ് ഡയറക്ടറുമായ എം.പി.വീരേന്ദ്ര കുമാര് എം.പി. (84) ഹൃദയാഘാതത്തെ തുടര്ന്ന് അന്തരിച്ചു.
ഭൗതികദേഹം വെള്ളിയാഴ്ച രാവിലെ വയനാട്ടിലേക്ക് കൊണ്ടുപോകും. സംസ്കാരം വൈകിട്ട്.
പ്രമുഖ സോഷ്യലിസ്റ്റ് പാര്ട്ടി നേതാവും മദിരാശി നിയമസഭാംഗവുമായിരുന്ന എം.കെ. പത്മപ്രഭാഗൗഡറുടെയും മരുദേവി അവ്വയുടെയും മകനായി 1936 ജൂലായ് 22ന് വയനാട്ടിലെ കല്പറ്റയിലാണ് ജനനം. ഭാര്യ: ഉഷ. മക്കള്: ആഷ, നിഷ, ജയലക്ഷ്മി, എം.വി.ശ്രേയാംസ്കുമാര് (ജോയിന്റ് മാനേജിങ്ങ് ഡയറക്ടര്-മാതൃഭൂമി).
മദിരാശി വിവേകാനന്ദ കോളേജില്നിന്ന് ഫിലോസഫിയില് മാസ്റ്റര് ബിരുദവും അമേരിക്കയിലെ സിന്സിനാറ്റി സര്വകലാശാലയില്നിന്ന് എം.ബി.എ. ബിരുദവും നേടി.
ഇന്ത്യന് ന്യൂസ്പേപ്പര് സൊസൈറ്റിയുടെ എക്സിക്യൂട്ടീവ് കമ്മിറ്റി മെമ്പര്, പി ടി ഐ ഡയറക്ടര്, പ്രസ് ഇന്സ്റ്റിറ്റ്യൂട്ട് ഓഫ് ഇന്ത്യയുടെ ട്രസ്റ്റി, ഇന്റര് നാഷണല് പ്രസ് ഇന്സ്റ്റിറ്റ്യൂട്ട് മെമ്പര്, കോമണ്വെല്ത്ത് പ്രസ് യൂണിയന് മെമ്പര്, വേള്ഡ് അസോസിയേഷന് ഓഫ് ന്യൂസ്പേപ്പേഴ്സ് എക്സിക്യൂട്ടീവ് കമ്മിറ്റി മെമ്പര്, ജനതാദള് (യു) സ്റ്റേറ്റ് കമ്മിറ്റി പ്രസിഡന്റ് എന്നീ നിലകളില് സേവനമനുഷ്ഠിച്ചു.
1992-'93, 2003-'04, 2011-'12 കാലയളവില് പി ടി ഐ ചെയര്മാനും 2003-'04 ല് ഐ എന് എസ് പ്രസിഡന്റുമായിരുന്നു. സ്കൂള് വിദ്യാര്ത്ഥിയായിരുന്ന കാലത്ത് സോഷ്യലിസ്റ്റ് പാര്ട്ടി നേതാവ് ജയപ്രകാശ് നാരായണ് ആണ് പാര്ട്ടിയില് അംഗത്വം നല്കിയത്. അടിയന്തരാവസ്ഥക്കാലത്ത് സ്വത്തുക്കള് കണ്ടുകെട്ടുകയും ജയില്വാസമനുഭവിക്കുകയും ചെയ്തു. 1987 ല് കേരള നിയമസഭാംഗവും വനം വകുപ്പു മന്ത്രിയുമായി. വനങ്ങളിലെ മരങ്ങള് മുറിക്കരുതെന്നായിരുന്നു ആദ്യത്തെ ഉത്തരവ്. 48 മണിക്കൂറിനുള്ളില് മന്ത്രിസ്ഥാനം രാജിവെക്കുകയും ചെയ്തു.
കേന്ദ്രമന്ത്രിസഭയില് ധനകാര്യ സഹമന്ത്രിയും പിന്നീട് തൊഴില്വകുപ്പിന്റെ സ്വതന്ത്ര ചുമതലയുള്ള സഹമന്ത്രിയുമായിരുന്നു. 2004-'09 കാലത്ത് പാര്ലമെന്റ് അംഗമായും സേവനമനുഷ്ഠിച്ചു. കേരള സാഹിത്യ അക്കാദമിയുടെ സി ബി കുമാര് എന്ഡോവ്മെന്റ് അവാര്ഡ്, മഹാകവി ജി സ്മാരക അവാര്ഡ്, ഓടക്കുഴല് അവാര്ഡ്, കെ വി ഡാനിയല് അവാര്ഡ്, അബുദാബി ശക്തി അവാര്ഡ്, കേരള സാഹിത്യ അക്കാദമി അവാര്ഡ്, വയലാര് അവാര്ഡ്, ബാലാമണിയമ്മ പുരസ്കാരം, ഏറ്റവും മികച്ച യാത്രാവിവരണ കൃതിക്കുള്ള പ്രഥമ കേന്ദ്ര സാഹിത്യ അക്കാദമി അവാര്ഡ്, കേരള സാഹിത്യ അക്കാദമി ഫെലോഷിപ്പ്, ഗാന്ധിസ്മൃതി പുരസ്കാരം തുടങ്ങി എണ്പതിലേറെ അംഗീകാരങ്ങള് ലഭിച്ചിട്ടുണ്ട്.
കൃതികള്: സമന്വയത്തിന്റെ വസന്തം, ബുദ്ധന്റെ ചിരി, ഗാട്ടും കാണാച്ചരടുകളും, രാമന്റെ ദുഃഖം, ആത്മാവിലേക്ക് ഒരു തീര്ത്ഥയാത്ര, പ്രതിഭയുടെ വേരുകള്തേടി, ചങ്ങമ്പുഴ: വിധിയുടെ വേട്ടമൃഗം, തിരിഞ്ഞുനോക്കുമ്പോള്, ആമസോണും കുറെ വ്യാകുലതകളും, ലോകവ്യാപാര സംഘടനയും ഊരാക്കുടുക്കുകളും (പ്രൊഫ. പി എ വാസുദേവനുമായി ചേര്ന്ന്), രോഷത്തിന്റെ വിത്തുകള്, അധിനിവേശത്തിന്റെ അടിയൊഴുക്കുകള്, സ്മൃതിചിത്രങ്ങള്, എം പി വീരേന്ദ്രകുമാറിന്റെ കൃതികള് (2 വോള്യം), ഹൈമവതഭൂവില്, വേണം നിതാന്ത ജാഗ്രത, ഡാന്യൂബ് സാക്ഷി, വിചിന്തനങ്ങള് സ്മരണകള്.