കുവൈറ്റ് സിറ്റി: ലോക്ക് ഡൗണ് കാലത്തെ വാടക കൊടുക്കാത്തതിന്റെ പേരില് താമസക്കാരെ ഒഴിപ്പിക്കുവാന് കെട്ടിട ഉടമക്ക് കഴിയില്ലെന്ന് സര്ക്കാര് വൃത്തങ്ങളെ ഉദ്ധരിച്ച് അല് റായ് പത്രം റിപ്പോര്ട്ട് ചെയ്തു. കോവിഡ് പ്രതിസന്ധിയുടെ പശ്ചാത്തലത്തില് ജോലിയും വരുമാനവും ഇല്ലാതെ വാടക കൊടുക്കാന് പ്രയാസപ്പെടുന്നവര്ക്കാണ് പുതിയ നിയമം ബാധകമാവുക.
രാജ്യത്തിലെ പൊതുജനാരോഗ്യം സംരക്ഷിക്കുന്നതിനായാണ് ലോക്ക് ഡൗണ് പ്രഖ്യാപിച്ചതെന്നും ആ കാലയളവില് വാടക നാല്കാത്തതിന്റെ പേരില് ഭൂവുടമകള് താമസക്കാരെ ഒഴിവാക്കുന്നത് തടഞ്ഞു കൊണ്ടാണ് പുതിയ ഭേദഗതിക്ക് മന്ത്രിസഭ ഉപസമിതി അനുമതി നല്കിയത്. ഔദ്യോഗിക ഗസറ്റില് പ്രസിദ്ധീകരിച്ച റിയല് എസ്റ്റേറ്റ് വാടകയുമായി ബന്ധപ്പെട്ട് നിയമത്തിലെ വ്യവസ്ഥകളിലും ഇത് സംബന്ധമായ ഭേദഗതി വരുത്തിയതായും സൂചനയുണ്ട് .വാടക കുറച്ചുനല്കണമെന്ന ആവശ്യം പരിഗണിക്കാനായി മാത്രം ഒരു ജഡ്ജിയെ ചുമതലപ്പെടുത്തുമെന്നും കെട്ടിട ഉടമകള് നല്കിയ കേസുകളില് വാടകക്കാരന്റെ സാമ്പത്തിക സ്ഥിതി അനുസരിച്ച് തിരിച്ചടവ് കോടതി നിര്ണയിക്കുമെന്നും പുതിയ ഭേദഗതിയില് പറയുന്നു.
കോവിഡ് പശ്ചാത്തലത്തില് ലോക്ക് ഡൗണ് തീരുന്നതുവരെയെങ്കിലും വാടക കൊടുക്കാന് ഇല്ലാത്തതിന്റെ പേരില് താമസക്കാരെ ഇറക്കിവിടരുതെന്ന് റിയല് എസ്റ്റേറ്റ് അസോസിയേഷനും നിരവധി പാര്ലിമെന്റ് അംഗങ്ങളും നേരത്തെ കെട്ടിട ഉടമകളോട് അഭ്യര്ഥിച്ചിരുന്നു.ചില കെട്ടിട ഉടമകള് മാനുഷിക പരിഗണനയില് സ്വന്തം നിലക്ക് വാടക കുറച്ചു നല്കിയെങ്കിലും ഭൂരിഭാഗം കെട്ടിട ഉടമകളും വാടക കുറച്ചുനല്കിയിട്ടില്ല. കെട്ടിട ഉടമകള് വാടക ചോദിച്ച് ബുദ്ധിമുട്ടിക്കുന്നതായി നിരവധി പരാതികളാണ് രാജ്യത്തിന്റെ വിവിധ ഭാഗങ്ങളില് നിന്ന് ഉയര്ന്നിരിക്കുന്നത്.
അതേസമയം ജോലിയും വരുമാനവുമില്ലാതെ കഴിയുന്ന ഇന്ത്യക്കാര് അടക്കമുള്ള നിരവധി വിദേശികള്ക്ക് പുതിയ തീരുമാനം ആശ്വാസകരമാകും.