മുംബയ്: മഹാരാഷ്ട്രയിലെ ഭീവണ്ടിയില് മൂന്ന് നില കെട്ടിടം തകര്ന്ന് വീണ് മരിച്ചവരുടെ എണ്ണം 20 ആയി ഉയര്ന്നു. 21 പേര് പരിക്കുകളോടെ വിവിധ ആശുപത്രികളില് ചികിത്സയിലുണ്ട്. മരിച്ചവരില് പത്തു കുട്ടികളുമുണ്ട്. അവശിഷ്ടങ്ങള്ക്കിടയില് ഇനിയും ആളുകള് കുടുങ്ങിക്കിടപ്പുണ്ട്. ദേശീയ ദുരന്തനിവാരണ സേനയും മുംബയ് ഫയര് ഫോഴ്സും രക്ഷാപ്രവര്ത്തനം നടത്തുന്നുണ്ട്.
തിങ്കളാഴ്ച പുലര്ച്ചെ 3.40നാണ് 40 വര്ഷം പഴക്കമുളള ജിലാനി പാര്പ്പിട സമുച്ചയം തകര്ന്നു വീണത്. 1984ല് പണിത മൂന്ന് നില കെട്ടിടത്തില് 20 ഓളം കുടുംബങ്ങളാണ് താമസിച്ചിരുന്നത്. ഉടമയ്ക്കെതിരെ പൊലീസ് കേസെടുത്തു. പുലര്ച്ചെ വലിയ ശബ്ദത്തോടെ കെട്ടിടം തകര്ന്നു വീഴുകയായിരുന്നു. എല്ലാവരും നല്ല ഉറക്കത്തിലായിരുന്നതാണ് ദുരന്തത്തിന്റെ വ്യാപ്തി കൂട്ടിയത്. സംഭവത്തില് രണ്ട് ഉദ്യോഗസ്ഥരെ സസ്പെന്ഡ് ചെയ്തു