കോട്ടയം: ലൈഫ് മിഷന് പദ്ധതിയുടെ കരാറിനായി യൂണിടാക് ഉടമ സന്തോഷ് ഈപ്പന് നല്കിയ അഞ്ചാമത്തെ ഐഫോണ് ആര്ക്കാണ് കിട്ടിയതെന്ന് തനിക്കറിയാമെന്ന് പ്രതിപക്ഷ നേതാവ് രമേശ് ചെന്നിത്തല.
കോട്ടയം മണ്ഡലത്തിലെ വികസന വിരുദ്ധതക്കെതിരെയും, ലഹരി, സ്വര്ണക്കള്ളക്കടത്ത്, അഴിമതി മാഫിയയ്ക്കെതിരെയും തിരുവഞ്ചൂര് രാധാകൃഷണന് എംഎല്എ നടത്തുന്ന 24 മണിക്കൂര് ഉപവാസ സമരം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
യൂണിടാക് വിതരണം ചെയ്ത ഫോണുകളില് ഒരണ്ണം കൂടി ലഭിക്കാനുണ്ട്. ആ ഫോണ് എവിടെയുണ്ടെന്ന് എനിക്കറിയാം. അത് ഞാന് വെളിപ്പെടുത്തുന്നില്ല. ഇത് ഞാന് പറഞ്ഞതിന്റെ പേരില് അന്വേഷണ ഏജന്സി എന്നെ ചോദ്യം ചെയ്യുമോ എന്നറിയില്ല. ഏതായാലും ഞാന് വെളിപ്പെടുത്തുന്നില്ല. എന്റെ കൈയില് ആ ഐഫോണ് ഇല്ലെന്ന് എല്ലാവര്ക്കും ബോധ്യപ്പെട്ടതാണ്.
ഫോണ് ആര്ക്കെല്ലാം ലഭിച്ചുവെന്നു അന്വേഷിക്കണമെന്ന് താന് ഡിജിപിക്ക് എഴുതികൊടുത്തിട്ടും ഒരു നടപടിയും എടുത്തില്ല. തനിക്കെതിരായ ആരോപണം ഉന്നയിച്ച ആള്ക്ക് നോട്ടീസ് നല്കിയിട്ട് അതിന് മറുപടി ലഭിച്ചിട്ടില്ല. മാനനഷ്ട കേസുമായി മുന്നോട്ടു പോകും.
ജനങ്ങള് തെരഞ്ഞെടുത്ത് അധികാരത്തിലേറിയ ഒരു സര്ക്കാര് അധോലോകങ്ങളുടെയും, കള്ളക്കടത്തുകാരുടെയും, മനുഷ്യക്കടത്തുകാരുടെയും ഏജന്റുമാരായി മാറിയിരിക്കുകയാണന്നും ചെന്നിത്തല കൂട്ടിച്ചേര്ത്തു.