ശലഭോദ്യാനം (കവിത: ജിസ പ്രമോദ്)

SAHITHYAM 27-Nov-2020

പലവർണ്ണ ശലഭങ്ങൾ പാറുമൊരു
ശലഭോദ്യാനത്തിൽ
നിറയെ പൂത്തുനിൽക്കുമൊരു
പാരിജാതത്തിൻ തണലിൽ

നിന്നെയും പ്രതീക്ഷിച്ചൊരുവൾ

ആഴക്കടൽ തോറ്റു പോം മിഴികളിൽ
പ്രണയത്തിൻ മലരികൾ ഒളിപ്പിച്ചവൾ
കാച്ചെണ്ണ മണമുതിരുമവളുടെ
വാർമുടികെട്ടിലൊരു
വശ്യഗന്ധമെഴും സൗഗന്ധികപ്പൂ

ചെറുകാറ്റിൽ മെല്ലെയിളകും
ദുപ്പട്ട മെല്ലെയൊതുക്കി
അകലേയ്ക്ക് മിഴികൾ പാകി
നിൽക്കുമവളുടെ മിഴികളിൽ
തെളിയുന്ന പ്രണയോന്മാദത്തിൻ
ചെറുതിരയിളക്കങ്ങൾ

എന്തിത്ര വൈകുന്നു സഖേ?.
അവളിലേക്കണയാൻ
ഇനിയുമേറെ ദൂരമോ?
കാലമെത്രയോ കടന്നു പോയ്‌
ത്രേതാ ദ്വാപര യുഗങ്ങളും
കഴിഞ്ഞു പോയ്‌
കാലമിത് കലിയുഗമായ്‌

ശലഭങ്ങളെത്ര ജനിമൃതികൾ തേടി
അവൾ നിന്നെ പ്രതീക്ഷിച്ചു നിൽക്കുമ
പാരിജാതത്തിൻ തണലെത്ര
പൂക്കാലങ്ങൾ കണ്ടു തീർത്തു

ശിലപോലുറഞ്ഞവൾ നിൽപ്പൂ
നിന്നെയും പ്രതീക്ഷിച്ച
പാരിജാത ചോട്ടിൽ
ഹൃത്തിൽ നിറയും
പ്രണയ ചൈതന്യത്തിൻ
ശക്തിയാൽ ജരാനരകളവളെ
തീണ്ടിയില്ല
വാർമുടികെട്ടിലെ സൗഗന്ധികപ്പൂമണം
വാടിയതുമില്ല

എത്രയും വേഗം തേർ തെളിച്ചീടുക
അണയുക അവൾ തൻ ചാരെ
പകരുക നിൻ പ്രണയമവളിൽ
ചേർത്തണച്ചീടുക
ഏകുക ഒരു നറു ചുംബനമാ
മൂർദ്ധാവിൽ
കരകവിയും മിഴിത്തിരകളെ
കൈക്കുമ്പിളിലാക്കീടുക.