അറിവിന്നറിവായ് നിന്നേ-

തറിയിക്കുന്നിങ്ങു നാമതായിടും 

അറിവേതിനമെങ്ങനെയീ -

യറിയപ്പെടുമെന്നതേതിതോതീടിൽ (അറിവ് -ശ്രീനാരായണഗുരു)

വ്യക്തികളിൽ ജീവാത്മാവായി നിന്നു പ്രപഞ്ചത്തെ അറിയുന്ന ബോധാംശങ്ങൾക്കെല്ലാം ആശ്രയമായ പൂർണ്ണ ബോധമായി വർത്തിച്ച് ഈ ലോകത്തിൽ ഏതു സത്യമാണോ എല്ലാ അറിവുകൾക്കും ഉറവിടമായി സ്ഥിതി ചെയ്യുന്നത്, നമ്മെളെല്ലാം ആ സത്യം തന്നെയാണെന്ന് അറിയേണ്ടതാണ്. പൂർണ്ണ ബോധത്തിന്റെ സാക്ഷാൽക്കാരാനുഭവം എന്ത്? അതെങ്ങനെ നേടാം? ഇക്കാര്യങ്ങൾ മനനം ചെയ്തറിയുമെങ്കിൽ പിന്നെ ഈ അറിയപ്പെടുന്ന പ്രപഞ്ചത്തിന് ഭിന്നമായ സ്ഥിതി എവിടെ? പ്രപഞ്ചവും അതോടെ ബോധമയമായ് അനുഭവപ്പെടുമെന്ന് സാരം.