ആമുഖം
ലോകം സുന്ദരമാണ്. ചിലയിടങ്ങള് മറ്റിടങ്ങളെക്കാള്
കൂടുതല് സുന്ദരം. കാണുന്നവരുടെ കണ്ണില് തന്നെയാണ് സൗന്ദര്യം.
കാണുന്നതാരായാലും സുന്ദരമെന്നു തന്നെ പറയുന്ന ചിലയിടങ്ങളിലൂടെ
മതിയാവോളം യാത്ര ചെയ്യുക ഒരു മനുഷ്യായുസിനു സ്വപ്നം കാണാവുന്നതിന്റെ
പരിധിയിലെവിടെയോ നില്ക്കുന്നു. വര്ണാഭവും വര്ണനാതീതവുമായിരിക്കും,
സാധ്യമായാല്, ആ യാത്ര.
മുമ്പു പറഞ്ഞ സ്വപ്നത്തിന്റെ പരിധിക്കും
മനുഷ്യഭാവനകള്ക്കുമൊക്കെ അതീതമായിരിക്കും ആ ദേശാന്തരങ്ങള് പകര്ന്നു
നല്കുന്ന അനുഭവങ്ങള്. നേപ്പാളിലെ ട്രക്കിങ്ങിന്റെ സാഹസികത;
വെനീസില്നിന്നു ലണ്ടനിലേക്കൊരു കപ്പല്യാത്രയുടെ ആഡംബരം; ലോകത്തെ ഏറ്റവും
ഏറ്റവും ദൈര്ഘ്യമുള്ള സ്കീ റണ് പകര്ന്നു തരുന്ന ശ്വാസം നിലയ്ക്കും മട്ടിലെ
ആവേശം, എല്ലാമാ സ്വപ്നസാക്ഷാത്കാരങ്ങളിലടങ്ങിയിരിക്കുന്നു;
ദേശാന്തരങ്ങളിലെ ഭക്ഷണ വൈവിധ്യവും വീഞ്ഞിന്റെ ലഹരിയും അതിലുണ്ട്; പുരാതന
ഈജിപ്റ്റിന്റെയും ക്ലാസിക്കല് ഗ്രീസിന്റെയും സാംസ്കാരിക
സമൃദ്ധിയുമുണ്ട്.
യാത്രയ്ക്കുള്ള മാധ്യമങ്ങളുടെ കാര്യത്തില് ഒരു
പഞ്ഞവുമില്ല നമുക്ക്. യാത്രയുടെ വേറിട്ട മാനങ്ങളാണ് ജലമാര്ഗങ്ങള്.
റോഡുകള് ഒരിക്കലും കൊണ്ടുചെന്നെത്തിക്കാത നിഗൂഢ സൗന്ദര്യങ്ങളിലേക്കു വഴി
തുറന്നു തരാന് നദികള്ക്കു കഴിയും. കരയില് നിന്നൊരിക്കലും നുകരാനാകാത്ത
തീരസൗന്ദര്യം പകര്ന്നു തരാന് കടലിനു കഴിയും. കാഴ്ചകള്ക്കൊപ്പം,
സഞ്ചരിക്കുന്ന നൗകയും ഒഴുകുന്ന വെള്ളവും തുടിക്കുന്ന അലകളുമെല്ലാം
അനുഭവത്തിന്റെ ഭാഗം തന്നെ. ദിവാസ്വപ്നങ്ങളിലെന്ന പോലെ ഓളപ്പരപ്പില്
ഒഴുകി നടക്കാം. ജീവിതം പോലെ, ചിലപ്പോള് ശാന്തമായും, മറ്റു ചിലപ്പോള്
തല്ലിയലച്ചും പാഞ്ഞു പോകുന്ന കാട്ടരുവികളെ
വെല്ലുവിളിക്കാം.
മനുഷ്യന്റെ ആദ്യത്തെ സഞ്ചാരമാര്ഗം പക്ഷേ കര
തന്നെയായിരുന്നു. അവസാനമില്ലാത്തൊരു തുടര്ക്കഥ പോലെയാണ് റോഡ് യാത്രകള്. ചിലത്
പ്രകൃതിയുടെ സ്വന്തം കഥനങ്ങള്- ഗിരിശൃംഗങ്ങള് കയറിയിറങ്ങി, മഞ്ഞുമലകളും
അഗ്നിപര്വതങ്ങളും കടന്ന്, പലവര്ണത്തിലുള്ള മരുഭൂമികള് കണ്ട്,
വന്യജൈവവൈവിധ്യങ്ങളിലൂടങ്ങനെ.... മറ്റുചിലത് മനുഷ്യജീവിത കഥനങ്ങള് തന്നെ-
ചരിത്രത്താളുകളില് മറഞ്ഞു പോയ അജ്ഞാത പ്രതിഭകളുടെ ഓര്മയുണര്ത്തി, ചരിത്രത്തിന്റെ
പടനിലങ്ങളില് കീറിമുറിച്ച്, പുരാതന വാണിജ്യപാതകള് കയറിയിറങ്ങി, കൊട്ടാരങ്ങളും
ആരാധനാലയങ്ങളും കണ്ടുകണ്ടങ്ങനെ....
ഇവിടെ സഞ്ചാരിയെ യാത്രാപദ്ധതികള്
ഭൂഗോളത്തിലെവിടെയും കൊണ്ടെത്തിക്കാം, ഏതാകൃതിയിലും വലുപ്പത്തിലുമാകാം യാത്ര.
ഒറ്റയ്ക്കു ഡ്രൈവ് ചെയ്തു പോകാവുന്ന ഏകദിന യാത്ര മുതല് കാടുകയറി മലയിറങ്ങി
ചുരംകടന്നു പോകുന്ന ദൈര്ഘ്യമേറിയ സാഹസികയാത്ര വരെയാകാം.
ഇന്ത്യയിലെ ഏറ്റവും
ദൈര്ഘ്യമുള്ള ഗ്രാന്റ് ട്രങ്ക് റോഡിന് 2575 കിലോമീറ്ററാണു നീളം. നാലാഴ്ച വേണം
അതിന്റെ തുടക്കം മുതല് ഒടുക്കം വരെ ഒറ്റയടിക്കൊന്നു കടക്കാന്. സംസ്കാര
വൈവിധ്യങ്ങളും ചരിത്രസത്യങ്ങളും രാഷ്ട്രീയവും ഇടകലര്ന്ന സഞ്ചാരപഥമാണത്. അസംഖ്യം
സിനിമകളില് കാര് ചെയ്സുകള്ക്ക് വേദിയൊരുക്കിയ ഫ്രഞ്ച് റിവെയ്റയുണ്ട്.
സംഗീതത്തിലും സാഹിത്യത്തിലും അമേരിക്കന് സ്വപ്നത്തിലേക്കു വഴി തുറക്കുന്ന യു.എസ്
റൂട്ട് 66 മറക്കുന്നതെങ്ങനെ....
റെയില് പാളങ്ങളാകട്ടെ പ്രതീകങ്ങളാണ്,
സാഹിത്യരൂപങ്ങളിലും സിനിമകളിലുമൊക്കെ അതങ്ങനെതന്നെ. ഓരോ ട്രെയിനും ഒരായിരും കഥകള്
പറയാനുണ്ടാകും. ഓരോ കമ്പാര്ട്ട്മെന്റുകളും ഓരോ ലോകങ്ങളാണെന്ന് സ്ഥിരം ട്രെയിന്
യാത്രക്കാരുടെ സമൂഹങ്ങള് സാക്ഷ്യപ്പെടുത്തും. സ്ഥിരം
യാത്രക്കാരനല്ലെങ്കില്പ്പോലും, ജനാലയ്ക്കരികിലൊരു ഇരിപ്പിടം ആരെയും ഭാവനകളുടെയും
സ്വപ്നങ്ങളുടെയും വിശാലമായൊരു ലോകത്തേക്കു നയിക്കും. ജനാലയിലൂടെ പുറത്തേക്കു
നോക്കുമ്പോള് നഗരജീവിതത്തില്നിന്ന് ഏറെയകന്നാണു ട്രെയിന് യാത്ര. സഹയാത്രികരെ
നോക്കിയാലോ, ലോകത്തിന്റെ ഒരു മിശ്രിതം തന്നെ ഓരോ ബോഗിയിലും.
ആഡംബര
സമൃദ്ധമായാലും ലളിതമായാലും പ്രശാന്തമായാലും സാഹസികമായാലും ലോകത്തെ മഹത്തായ എല്ലാ
ട്രെയിന് യാത്രകള്ക്കും പൊതുവായി ഒന്നുണ്ട്- ഒരു ഗ്ലാമര് പരിവേഷം. മനസില്
രചിക്കുന്ന കഥകളിലും സിനിമകളിലും സ്വയം നായകനായി, മനോഹരമായ പ്രകൃതിദൃശ്യങ്ങളും
വിജനദേശങ്ങളും കണ്ട്, പാളങ്ങള്ക്കിരുവശവും ചുരുളഴിയുന്ന ജീവിതങ്ങള് കടന്ന്
ട്രെയിന് യാത്രകള്. വെനിസ് - സിംപ്ലന് ഓറിയന്റ് എക്സ്പ്രസും മോസ്കോ - ബീജിങ്
ട്രാന്സ് സൈബീരിയന് റെയില് റോഡും മുതല് ഇന്ത്യയിലെ ആരോരുമറിയാത്ത മീറ്റര്ഗേജ്
പാതകള് വരെ അനുഭവങ്ങളുടെ അക്ഷയഖനികളാണ് സഞ്ചാരികള്ക്കായി ഒരുക്കി
വച്ചിരിക്കുന്നത്.
അന്റാര്ട്ടിക്ക ഒഴികെ ലോകത്തെല്ലാ ഭൂഖണ്ഡങ്ങളിലും
പാളങ്ങളുടെ സമാന്തരങ്ങള് പരിചിതമാണ്. ദക്ഷിണാഫ്രിക്കന് സഫാരി ട്രെയിനുകള് മുതല്
വന്യജീവിതത്തെയും പാതിരാസൂര്യനെയും തേടുന്ന വടക്കന് സ്വീഡനിലെ പാത വരെ ഇതിലുണ്ട്.
കാലചക്രത്തെ പിന്നോട്ടുരുട്ടുന്ന ആവിയെഞ്ചിനുകള് ലോകയുദ്ധ സ്മാരകങ്ങള് കടന്നു
കിതച്ചു മുന്നേറുമ്പോള് ശബ്ദവേഗത്തോടു മത്സരിക്കുന്നു ആധുനിക ബുള്ളറ്റ്
ട്രെയിനുകളും സജീവം.
ചരിത്രത്തിന്റെ കാല്പ്പാടുകള് പതിഞ്ഞ
ഒറ്റയടിപ്പാതകളിലൂടെയാണ് ഏറ്റവും സരളവും വിശുദ്ധവുമായ യാത്രകള് സാധ്യമാകുന്നത്.
ടിക്കറ്റില്ല, സമയക്രമങ്ങളുടെ കെട്ടുപാടുകളില്ല, അതിരുകള് നിശ്ചിയിക്കാന്
മനസിന്റെ ഭാവന മാത്രം, സമ്പൂര്ണ സ്വാതന്ത്ര്യമാണ് സ്വന്തം കാലുകളെ മാത്രം
ആശ്രയിക്കുന്ന യാത്രയുടെ ഏറ്റവും മനോഹരമായ വാഗ്ദാനം. ഓരോ ചുവടും ഓരു വലിയ
ലക്ഷ്യത്തിലേക്കുള്ള ചവിട്ടുപടികളാകുന്നു.
ഏറ്റവും പ്രശസ്തമായ
പ്രദേശങ്ങളില്പ്പോലും കാല്നടയായി മാത്രം പോകാന് കഴിയുന്ന സ്ഥലങ്ങള് ഇന്നും
നിലനിര്ത്തുന്നു. മറ്റൊരു മാര്ഗത്തിലുള്ള യാത്രയും പ്രകൃതിയെയും
മനുഷ്യപ്രകൃതിയെയും ഇത്രയേറെ അടുത്തറിയാന് സഹായിക്കില്ല. മറ്റൊരു യാത്രയും
പ്രകൃതിയോട് ഇത്ര കരുണ കാണിക്കില്ല. മനസിനും ആത്മാവിനും ശരീരത്തിനും ഒരുപോലെ ശാന്തി
പകരാന് മറ്റൊരു യാത്രാ മാധ്യമത്തിനും കഴിയില്ല.
ചില ദേശങ്ങള്ക്കു പറ്റിയത്
ആകാശക്കാഴ്ചയാണ്. വിഹഗവീക്ഷണം അനിവാര്യമാകുന്ന സാഹചര്യങ്ങള് പലതുണ്ട്: കടന്നു
ചെല്ലാന് കഴിയാത്ത ഭൂഭാഗങ്ങള് കാണാന്, ഒരു പ്രകൃതിദൃശ്യത്തെ ഒറ്റ ഫ്രെയിമില്
കാണാന്, പ്രശസ്തമായ ചരിത്രസ്മാരകങ്ങളുടെ വ്യത്യസ്തമായ വീക്ഷണകോണുകള് തേടാന്,
അടുത്തു നിന്നും എന്നാല് സുരക്ഷിതമായും വന്യജീവിതത്തിന്റെ വൈവിധ്യം
ആസ്വദിക്കാന്.... ഈ ആകാശയാനങ്ങള്ക്കു മാര്ഗവും പലതാണ്: ചെറുവിമാനങ്ങള്,
ഹെലികോപ്റ്ററുകള്, ഹോട്ട് എയര് ബലൂണുകള്, അങ്ങനെ നിരവധി.... കേബിള് കാറിലും
റോപ്പ് വേയിലും എലിവേറ്ററിലുമുള്ള സഞ്ചാരം പോലും ആകാശമാര്ഗമായി
കണക്കാക്കാം.
ഹവായിക്കു മുകളിലൂടെയുള്ള സ്വര്ഗ സഞ്ചാരവും ആഫ്രിക്കന്
വനാന്തരങ്ങള് അടുത്തു കാണുന്ന വിമാനയാത്രയും ആകാശ സഞ്ചാരത്തിന്റെ രണ്ടു
വിരുദ്ധധ്രുവങ്ങളില് നില്ക്കുന്നു. ഒന്ന് സ്വച്ഛന്ത വിഹാരമെങ്കില് മറ്റൊന്ന്
സാഹസികതയുടെ അതിരാണ്. ഈ രണ്ടു ധ്രുവങ്ങള്ക്കിടയില് ഗണിക്കാവുന്ന മറ്റനവധി
സഞ്ചാരങ്ങള് പിന്നെയും ആകാശത്തു കാത്തിരിക്കുന്നു.
ഒരു നിര്വചനത്തിനും
വഴങ്ങിക്കൊടുക്കാത്ത, ഒരു വ്യാഖ്യാനത്തിനു കീഴടങ്ങാത്ത, ഒരു
വര്ഗീകരണത്തിലും ഒതുങ്ങി നില്ക്കാത്ത ചില സഞ്ചാരങ്ങളുണ്ട്. റോഡോ റെയിലോ
ജലമോ ആകാശമോ, മാധ്യമം എന്തുമാകട്ടെ, ഓര്മകളില് മായാമുദ്ര പതിപ്പിക്കുന്ന
യാത്രകള്. അവ ആദിമ സംസ്കാരങ്ങളിലൂടെയുള്ള തീര്ഥാടനങ്ങളാകാം,
പൈതൃകവൈവിധ്യങ്ങളിലൂടെയുള്ള അന്വേഷണമാകാം, സാഹസികതയുടെ ഉദാത്ത
ദൃഷ്ടാന്തങ്ങളാകാം, മഹത്തുക്കളായ പൂര്വികരുടെ പാതകള് പിന്തുടരുന്ന
ചരിത്ര പര്യവേക്ഷണങ്ങളുമാകാം.
പുറമോടിയിലെ സൗന്ദര്യത്തിനുള്ളില്
പതിയിരിക്കുന്ന അപകടങ്ങളുടെ നാടുകളുമുണ്ടാകാം യാത്രയുടെ വഴികളില്.
യാത്രകളുടെ കാര്യത്തില് ജര്മന് എഴുത്തുകാരന് ഹെര്മന് ഹെസ്സെയുടെ
പക്ഷക്കാരാണു പല സ്ഥിരം സഞ്ചാരികളും. യാത്രകള് അദ്ദേഹത്തിനു രണ്ടാം
ജന്മമാണ്, ദേശാടനമാണ്. അറിയാത്ത നാടുകളിലൂടെ, അറിയാത്ത ഭാഷകളിലൂടെ
മറ്റൊന്നുമാലോചിക്കാതെ സ്വതന്ത്രമായി ഒഴുകി നീങ്ങുമ്പോള് അഭൗമമായ
അനുഭൂതിയുടെ അന്തരീക്ഷമാണ് എപ്പോഴും മനസിനെ ചൂഴ്ന്നു നില്ക്കുക എന്നു
ഹെസ്സെ പറഞ്ഞുവച്ചിട്ടുണ്ട്.
എല്ലാ ബന്ധങ്ങളും
താത്കാലികമായെങ്കിലും ഉപേക്ഷിച്ച്, കടലിനും പര്വതങ്ങള്ക്കും കുറുകെ,
കാടും മേടും താണ്ടി, നാടും നഗരവും കണ്ടു മുന്നേറുന്ന യാത്രകളില് ജീവിതം പുതിയ
ഉടുപ്പണിയുന്നതു പോലെ, രാത്രി കഴിഞ്ഞു പുതിയ പ്രഭാതം
ഉണര്ന്നെണ്ണീല്ക്കുന്നതു പോലെ, ശ്വാസകോശങ്ങളിലേക്ക് സമൃദ്ധിയുടെ പുതിയ
ജീവവായു വന്നു നിറയുന്നതു പോലെ ഒക്കെയാണു യാത്രകള് പലപ്പോഴും. വെറും
വിനോദസഞ്ചാരത്തിലുപരി, അതൊരു തീര്ഥാടനമായി കാണുന്ന ഒരുപാടു
പേരുണ്ട്.
യാത്രകളിലെ സ്വാഭാവികത ഇഷ്ടപ്പെടുന്നവരുണ്ട്. നടന്നു
കാണുകയും സ്വയം അറിയുകയും ചെയ്യുന്ന നിമിഷങ്ങളില് പൂമ്പാറ്റ സൗഹൃദം പോലെ
വീണു കിട്ടുന്ന പരിചയങ്ങളെ സ്നേഹിക്കുന്നവരുണ്ട്. അങ്ങനെയുള്ള ഓരോ
സഞ്ചാരിക്കായും അവരുടെ ലക്ഷ്യങ്ങളില് ഓരോ പൂക്കള് വിരിഞ്ഞിട്ടുണ്ടാവും.
ആ പൂവ് തേടിയാണ് ഓരോരുത്തരുടെയും യാത്ര. അതിന്റെ ഗന്ധമറിയാന്
പോവുകയാണ്. സൗന്ദര്യമറിയാന് പോവുകയാണ്, പറിച്ചെടുക്കാനല്ല,
നുള്ളിനോവിക്കാനല്ല, തൊട്ടറിഞ്ഞ് മനസു നിറയ്ക്കാന് പോകുകയാണ്,
ഹൃദയത്തിലാവാഹിച്ച് ശിഷ്ടജീവിതത്തിന്റെ മധുരമുള്ള ഓര്മകളിലേക്കു
കൂട്ടിക്കൊണ്ടുവരാന് പോകുകയാണ്.
പുസ്തകങ്ങളിലൂടെയും
ഇന്റര്നെറ്റിലൂടെയും ടെലിവിഷനിലൂടെയുമൊക്കെ അറിഞ്ഞ നാടുകള് മുഴുവന്
നേരിട്ടു കണ്ടു തീര്ക്കുക മനുഷ്യസാധ്യമല്ലായിരിക്കാം. എല്ലാ സ്വപ്നങ്ങളും
സാക്ഷാത്കരിച്ചാല് പിന്നെ മനുഷ്യനും ദൈവവും തമ്മില്
വ്യത്യാസമെന്ത്!
വായിച്ചറിഞ്ഞ കാഴ്ചകള് മനസില് പുഃസൃഷ്ടിച്ചു യാത്ര
ചെയ്യുന്നവര് പലപ്പോഴും നിരാശപ്പെടേണ്ടി വന്നേക്കും. അതുകൊണ്ടുതന്നെ
മുന്വിധികളില്ലാത്ത യാത്രകാളായിരിക്കും എപ്പോഴും ആനന്ദവും അദ്ഭുതവും
നിറയ്ക്കുക. ആവശ്യമില്ലാത്തതു പ്രതീക്ഷിച്ചു നിരാശപ്പെടുന്നത്
പ്രദേശങ്ങളുടെയോ പ്രകൃതിയുടെയോ തെറ്റല്ല, അവനവന്റെ സ്വപ്നജീവിതങ്ങളുടെ
തെറ്റാണ്.
പ്രകൃതിയുടെ കരവിരുത് തേച്ചുമിനുക്കിയെടുത്ത
മനുഷ്യന്റെ കലാസങ്കല്പ്പത്തെക്കുറിച്ച് ഒരു നിമിഷം പോലും
ഓര്ക്കാതിരിക്കാനാവാത്ത യാത്രകളുണ്ട്. വാക്കുകള്ക്ക് പരിമിതിയുണ്ട്.
വായിച്ചറിഞ്ഞതിന് അതിലേറേ പരിമിതിയുണ്ട്. നേരിട്ടുള്ള കാഴ്ചയില്
കണ്ണുകള് കൂമ്പിയെന്നിരിക്കും. എത്ര കണ്ടാലും പിന്നെയും അന്തമില്ലാതെ
നീണ്ടുനിവര്ന്നു കിടക്കുകയാണു കാഴ്ചകളുടെ സൗന്ദര്യ സാഗരം.
ടൂറിസം
ആന്ഡ് ഹോസ്പിറ്റാലിറ്റി
ടൂറിസമെന്നാല് വിനോദസഞ്ചാരമെന്നൊരു
പൊതുസംജ്ഞയാണു നിലനിന്നിരുന്നത്. ഇന്നതിനു കൂടുതല് വിശാലമായ
നിര്വചനങ്ങള് സാധ്യമായിരിക്കുന്നു. സന്ദര്ശിക്കുന്ന സ്ഥലത്തുനിന്നു
നേരിട്ടു സാമ്പത്തിക ലാഭമില്ലാത്ത, വിനോദ, വ്യവസായ ആവശ്യങ്ങള്ക്കായി
സ്വന്തം ആവസപ്രദേശത്തിനും പരിസ്ഥിതിക്കും വെളിയില് 24
മണിക്കൂറിലേറെയും ഒരു വര്ഷത്തില് താഴെയും തങ്ങേണ്ടിവരുന്ന യാത്രയെയാണു
ടൂറിസം എന്നു വിളിക്കുന്നത്. ഇന്നു ലോകത്തേറ്റവും പ്രിയങ്കരമായ
വിനോദോപാധിയായി ടൂറിസം മാറിയിരിക്കുന്നു. 2007നെ അപേക്ഷിച്ച്, 2008ല്
അന്താരാഷ്ട്ര ടൂറിസ്റ്റുകളുടെ എണ്ണത്തിലുണ്ടായ വര്ഞധന 1.9 ശതമാനമാണ്.
അതായത്, 92.2 കോടി. അന്താരാഷ്ട്ര ടൂറിസത്തിലൂടെ വിവിധ രാജ്യങ്ങള്ക്കുണ്ടായ
വരുമാന വര്ധനവ് 1.8 ശതമാനവും. അതായത് 955 ബിലന് ഡോളര്
വരെ.
അന്താരാഷ്ട്ര ടൂറിസത്തിലുണ്ടായ വളര്ച്ചാ നിരക്ക് ആഗോള
സാമ്പത്തികമാന്ദ്യം കാരണം രണ്ടു ശതമാനമായി കുറഞ്ഞു. 2009ന്റെ ആദ്യ നാലു
മാസങ്ങളില് അന്താരാഷ്ട്ര ടൂറിസ്റ്റുകളുടെ എണ്ണത്തിലുണ്ടായ എട്ടു ശതമാനം
ഇടവ് ഈ നെഗറ്റീവ് പ്രവണത വര്ധിച്ചതിന്റെ തെളിവാണ്. പിന്നീട് എച്ച്1എന്1
വൈറസ് ബാധയും ഈ പ്രവണത വര്ധിക്കാന് കാരണമായി.
യുഎഇ, ഈജിപ്റ്റ്,
ഗ്രീസ്, തായ്ലന്ഡ്, ദ്വീപ് രാഷ്ട്രങ്ങളായ ബഹാമാസ്, ഫിജി, മാലദ്വീപ്,
സീഷെല്സ് തുടങ്ങിയവയുടെയെല്ലാം സമ്പദ്വ്യവസ്ഥയില് നിര്ണായകമാണു
ടൂറിസം. ഈ മേഖലയുമായി ബന്ധപ്പെട്ട വ്യവസായങ്ങള് ഈ രാജ്യങ്ങളിലെ വലിയൊരു
വിഭാഗത്തിനു തൊഴില് നല്കുന്നു. എയര്ലൈന്, ക്രൂസ് കപ്പല്, ടാക്സി
തുടങ്ങിയ ഗതാഗത മാര്ഗങ്ങളും ഹോട്ടല്, റിസോര്ട്ട്, അമ്യൂസ്മെന്റ്
പാര്ക്ക്, കാസിനോ, ഷോപ്പിങ് മോള്, തിയേറ്റര് തുടങ്ങിയ ഹോസ്പിറ്റാലിറ്റി
സേവനങ്ങളും ടൂറിസവുമായി ബന്ധപ്പെട്ട വ്യവസായങ്ങളുടെ
പട്ടികയില്പ്പെടുന്നു.
അതിഥിയും ആതിഥേയനും തമ്മിലുള്ള ബന്ധമാണു
ഹോസ്പിറ്റാലിറ്റി. അതിഥികളെയും സന്ദര്ശകരെയും അപരിചിതരെയും
സ്വീകരിക്കുക, സൗകര്യങ്ങളൊരുക്കുകയും വിനോദിപ്പിക്കുകയും ചെയ്യുക
തുടങ്ങിയ കാര്യങ്ങള് ഇതില്പ്പെടുന്നു. ഹോസ്പിറ്റാലിറ്റി വ്യവസായത്തിന്റെ
ഭാഗമായ ഹോട്ടലുകള് റെസ്റ്ററന്റുകള്, കാസിനോകള്, കാറ്ററിങ്,
റിസോര്ട്ട്, ക്ലബ് തുടങ്ങിയവയുമായി ബന്ധപ്പെട്ട ജോലികളുമായി
ബന്ധപ്പെടുത്തി ഹോസ്പിറ്റാലിറ്റി എന്ന പദം പ്രയോഗിച്ചു വരുന്നു.
ആവശ്യമുള്ളവര്ക്കു സഹായവും സാന്ത്വനവുമേകുന്നതിനെയും ചിലപ്പോള്
ഹോസ്പിറ്റാലിറ്റി എന്നു തന്നെ വിളിക്കുന്നു.
1. ടൂറിസം
അഡ്മിനിസ്ട്രേഷന്
വേള്ഡ് ട്രാവല് ആന്ഡ് ടൂറിസം കൗണ്സില് 2007ല്
നിരീക്ഷിച്ചതനുസരിച്ച്, ഇരുപത്തൊന്നാം നൂറ്റാണ്ടിന്റെ സമ്പദ് വ്യവസ്ഥ
നിയന്ത്രിക്കുക പ്രധാനമായും മൂന്നു വ്യവസായങ്ങളായിരിക്കും- ടെലി
കമ്യൂണിക്കേഷന്സ്, ഇന്ഫര്മേഷന് ടെക്നോളജി, ടൂറിസം എന്നിവ. കഴിഞ്ഞ 25
വര്ഷംകൊണ്ടു ട്രാവല് ആന്ഡ് ടൂറിസം ഇന്ഡസ്ട്രിയിലുണ്ടായ വളര്ച്ച 500 ശതമാനമാണ്.
പരസ്പരബന്ധമുള്ള നിരവധി വ്യവസായങ്ങളുടെ ഏകരൂപത്തെയാണ് ട്രാവല് ആന്ഡ് ടൂറിസം എന്ന
ഒറ്റ ശ്വാസത്തില് പറയുന്നത്. ഇത്തരം വ്യവസായങ്ങളുടെ വളര്ച്ച ഹോട്ടല്,
റെസ്റ്ററന്റ്, റീട്ടെയില്, ഗതാഗത, ട്രാവല് ഏജന്സി, ടൂര് കമ്പനി, വിനോദസഞ്ചാര
കേന്ദ്ര, വിനോദ, കായിക, സാംസ്കാരിക മേഖലകളില് നിരവധി തൊഴിലവസരങ്ങളും
തുറന്നിട്ടിരിക്കുന്നു.
1997ല് ലോകത്ത് മൊത്തം തൊഴിലില് 10.5% സംഭാവന
ചെയ്തിരുന്നതു ട്രാവല് ആന്ഡ് ടൂറിസം മേഖലയാണ്. കരീബിയ പോലെയുള്ള പ്രദേശങ്ങളില്
ഇത് 25ന വരെയുമായി. 2007ലെ കണക്കനുസരിച്ച് ലോകത്താകമാനം പത്തു ലക്ഷത്തിലേറെപ്പേര്
ഈ മേഖലയില് ജോലി ചെയ്യുന്നു. അതുകൊണ്ടുതന്നെ ഒട്ടുമിക്ക ലോകരാജ്യങ്ങള്ക്കും
ടൂറിസം മേഖല സുപ്രധാനവുമാകുന്നു.
ഇന്നു പരമ്പരാഗത
രീതികളില്നിന്നു ടൂറിസം മേഖല ദിശാബോധത്തോടെ ഏറെ മുന്നോട്ടു
പോയിരിക്കുന്നു. ഒരു കാലത്ത് കടലോരത്തെ വെയില്കായലും പ്രകൃതി
മനോഹാരിതയിലെ കുന്നുകയറ്റങളും മാത്രമായിരുന്ന ടൂറിസം ഇന്നു സാംസ്കാരിക
ടൂറിസം, അഡ്വഞ്ചര് ടൂറിസം, കായിക-വിനോദ പരിപാടികള്, ഇക്കോ ടൂറിസം
തുടങ്ങി വിവിധ മേഖലകളായി വളര്ന്നിരിക്കുന്നു. ഈ സാഹചര്യത്തിലാണ്
ഇന്നത്തെ യുവതലമുറയുടെ കരിയര് തെരഞ്ഞെടുപ്പില് ടൂറിസം
അഡ്മിനിസ്ട്രേഷനും മാനേജ്മെന്റും സുപ്രധാന പദവി
അലങ്കരിക്കുന്നത്.
സ്ഥിരതാമസമോ വരുമാനമോ ലക്ഷ്യമാക്കാതെയുള്ള
യാത്രയുടെയും താമസത്തിന്റെയും അതില്നിന്നുണ്ടാകുന്ന ബന്ധങ്ങളുടെയും
ആകെത്തുകയെന്നാണ് 1941ല് ഹന്സികറും ക്രാഫും ടൂറിസത്തെ നിര്വചിച്ചത്.
സ്വതവേയുള്ള വാസ, ജോലി സ്ഥലങ്ങള്ക്കു പുറത്തേക്കു നടത്തുന്ന ഹ്രസ്വകാല,
താത്കാലിക യാത്രകളും അവിടത്തെ പ്രവൃത്തികളുമാണു ടൂറിസമെന്നും അതില്
ഏതാവശ്യത്തിനുള്ള യാത്രകളും ഉള്പ്പെടാമെന്നു 1976ല് ടൂറിസം സൊസൈറ്റി ഓഫ്
ഇംഗ്ലണ്ട് നിര്വചിച്ചു. വീടിനു പുറത്തെ തെരഞ്ഞെടുത്ത പ്രവൃത്തികളുടെ
അടിസ്ഥാനത്തില് ടൂറിസത്തെ നിര്വചിക്കുകയാണ് 1981ല് ഇന്റര്നാഷണല്
അസോസിയേഷന് ഓഫ് സയന്റിഫിക് എക്സ്പേര്ട്സ് ഇന് ടൂറിസം
ചെയ്തത്.
ഐക്യരാഷ്ട്ര സഭ 1994ല് ടൂറിസത്തെ മൂന്നായി തരംതിരിച്ചു.
ഇതനുസരിച്ച്, ഒരു രാജ്യത്തെ സ്ഥിരതാമസക്കാര് അതേ രാജ്യത്തിന്റെ
അതിരുകള്ക്കുള്ളില് സഞ്ചരിക്കുന്നതു ഡോമസ്റ്റിക് ടൂറിസം. ഒരു രാജ്യത്തെ
താത്കാലിക താമസക്കാര് അതേ രാജ്യത്തിനുള്ളില് നടത്തുന്നത് ഇന്ബൗണ്ട്
ടൂറിസം. ഒരു രാജ്യത്തെ സ്ഥിരതാമസക്കാര് മറ്റൊരു രാജ്യത്തേക്കു നടത്തുന്ന
വിനോദസഞ്ചാരത്തെ ഔട്ട്ബൗണ്ട് ടൂറിസമെന്നും വിളിച്ചു. ടൂറിസത്തിന്റെ ഈ
മൂന്ന് അടിസ്ഥാന രൂപങ്ങളെ പല രീതിയില് കോര്ത്തിണക്കി ടൂറിസത്തിന്റെ വിവിധ
രീതികളെക്കുറിച്ചു യുഎന് വിശദീകരിച്ചു: ഡോമസ്റ്റിക് ടൂറിസവും ഇന്ബൗണ്ട്
ടൂറിസവും ചേരുന്ന ഇന്റേണല് ടൂറിസം, ഡോമസ്റ്റിക് ടൂറിസവും ഔട്ട്ബൗണ്ട്
ടൂറിസവും ചേരുന്ന നാഷണല് ടൂറിസം, ഇന്ബൗണ്ട് ടൂറിസവും ഔട്ട്ബൗണ്ട് ചേരുന്ന
ഇന്റര്നാഷണല് ടൂറിസം എന്നിങ്ങനെയാണത്.
കൊറിയ ടൂറിസം
ഓര്ഗനൈസേഷന് രൂപം കൊടുക്കുകയും കൊറിയയില് വ്യാപക അംഗീകാരം നേടുകയും
ചെയ്ത സംജ്ഞയാണ് ഇന്ട്രാബൗണ്ട് ടൂറിസം. ഡൊമസ്റ്റിക് ടൂറിസവുമായി ഇതിനുള്ള
വ്യത്യാസം ദേശീയ ടൂറിസം നയങ്ങളുടെ രൂപീകരണവും നടപ്പാകക്ലുമാണ്.
ഇന്ബൗണ്ട് ടൂറിസത്തില് കടുത്ത മത്സരം നേരിടുന്ന പശ്ചാത്തലത്തില് പല
രാജ്യങ്ങളും ഇപ്പോള് ഇന്ബൗണ്ട് ടൂറിസത്തെക്കാള് ഇന്ട്രാബൗണ്ട്
ടൂറിസമെന്ന ആശയത്തില് കൂടുതല് ശ്രദ്ധ പതിപ്പിച്ചു
തുടങ്ങിയിരിക്കുന്നു.
2006 മുതല് 2008 വരെ ഏറ്റവുമധികം വിദേശ
ടൂറിസ്റ്റുകള് സന്ദര്ശിച്ച രാജ്യങ്ങളുടെ പട്ടിക യുഎന്
പ്രസിദ്ധീകരിച്ചിട്ടുണ്ട്. 2006മായി താരതമ്യം ചെയ്യുമ്പോള് റഷ്യ,
ഓസ്ട്രിയ, മെക്സിക്കോ എന്നീ രാജ്യങ്ങളെ മറികടന്ന്, യുക്രെയ്ന് ആദ്യ
പത്തിനുള്ളില് ഇടം പിടിച്ചിട്ടുണ്ട്. 2008ല് യുക്രെയ്ന് ജര്മനിയെയും
മറികടന്നു. 2008ല് യുഎസ് സ്പെയ്നെ മറികടന്ന് രണ്ടാം സ്ഥാനത്തെത്തി.
ഏറ്റവും വലിയ ടൂറിസ്റ്റ് ആകര്ഷണങ്ങളായി തുടരുന്നത് യൂറോപ്യന് രാജ്യങ്ങള്
തന്നെ.
1.1 ടൂറിസത്തിന്റെ ചരിത്രം
സമ്പന്നവിഭാഗം
എല്ലാക്കാലവും ലോകത്തിന്റെ വിവിധ ഭാഗങ്ങളിലേക്കു വിനോദയാത്രകള് പോകാന്
സമയവും സൗകര്യവും കണ്ടെത്തിയിരുന്നു. വമ്പന് കെട്ടിടങ്ങളും മഹത്തായ
കലാസൃഷ്ടികളും അപരിചിത ഭാഷകളും വ്യത്യസ്ത സംസ്കാരങ്ങളും പ്രകൃതിയുടെ
മനോഹര ദൃശ്യങ്ങളും വിവിധ രുചികളുമെല്ലാം അവരെ ഭൂമിയുടെ പല കോണുകളിലേക്ക്
ആകര്ഷിച്ചു. റോമാ സാമ്രാജ്യത്തിന്റെ സുവര്ണ കാലഘട്ടത്തില്പ്പോലും
പണക്കാര്ക്കു പ്രിയപ്പെട്ട ബീച്ച് റിസോര്ട്ടുകള് നിലനിന്നിരുന്നതിനു
തെളിവുകളുണ്ട്. ടൂറിസം എന്ന വാക്ക് 1811ലും ടൂറിസ്റ്റ് എന്ന വാക്ക് 1840ലും
പ്രചാരത്തിലായി. 24 മണിക്കൂര് നേരത്തേക്കെങ്കിലും വിദേശയാത്ര
നടത്തുന്നയാളാണു ടൂറിസ്റ്റ് എന്ന് ലീഗ് ഓഫ് നേഷന്സ് 1936ല് അതിലളിതമായി
നിര്വചിക്കുകയും ചെയ്തു. ലീഗ് ഓഫ് നേഷന്സിന്റെ പിന്ഗാമി യുണൈറ്റഡ് നേഷന്സ്
യാത്രയുടെ കൂടിയ ദൈര്ഘ്യം ആറു മാസം എന്നുകൂടി ചേര്ത്ത് 1945ല് നിരവചനം
പരിഷ്കരിച്ചു.
1.2 ടൂറിസം
പലവിധം
വിനോദയാത്ര
യുകെയിലെ വ്യാവസായിക വിപ്ലവവുമായി
അഭേദ്യബന്ധമുണ്ട് വിനോദയാത്ര, അഥവാ ലെഷര് ട്രാവലിന്. വളര്ന്നുവന്ന
വ്യാവസായിക സമൂഹത്തിന്റെ ഒഴിവുസമയങ്ങള് ഉപയോഗപ്പെടുത്തുന്നതു
സംബന്ധിച്ച് ആദ്യമായി ക്രിയാത്മക പ്രോത്സാഹനങ്ങള് നല്കിയതു യുകെ തന്നെ.
തൊഴിലുടമകളും ഫാക്ടറി മേധാവികളും വ്യാപാരികളും ഉള്പ്പെട്ട മധ്യവര്ഗ
സാമ്പത്തിക സമൂഹത്തിനു മാത്രം ബാധകമായിരുന്നു തുടക്കത്തില് ഇത്. 1758ല്
കോക്സ് ആന്ഡ് കിങ്സ് എന്ന പേരില് ആദ്യ ഔപചാരിക ട്രാവല് കമ്പനിയും
രൂപീകരിക്കപ്പെട്ടു.
ടൂറിസം വ്യവസായത്തിലെ ബ്രിട്ടീഷ്
പാരമ്പര്യത്തിന്റെ മുദ്രകള് ഇന്നും പല യൂറോപ്യന് രാജ്യങ്ങളുടെയും
ടൂറിസ്റ്റ് സംരഭങ്ങളില് തെളിഞ്ഞു നില്ക്കുന്നുണ്ട്. ഫ്രാന്സിലെ ഏറ്റവും
പഴയവയിലൊന്നും സംസംഘടിതവുമായി രൂപകല്പന ചെയ്യപ്പെട്ടിട്ടുള്ളതുമായ
ഒരു ഹോളിഡേ റിസോര്ട്ട് ഇന്നും അറിയപ്പെടുന്നത് പ്രോമനേജ് ദെസ് ആംഗ്ലെയ്സ്
എന്ന്. യൂറോപ്പില് ചരിത്രപ്രാധാന്യവും പാരമ്പര്യവുമുള്ള റിസോര്ട്ടുകളും
പാലസ് ഹോട്ടലുകളും, മജസ്റ്റിക്, ബ്രിസ്റ്റോള്, കാള്ട്ടണ് തുടങ്ങിയ
പേരുകളില് അറിയപ്പെടുന്നു.
വിന്റര് ടൂറിസം
വിന്റര്
ടൂറിസ്റ്റുകളുടെ പ്രധാന ആകര്ഷണം സ്കീയിങ്ങാണ്. ഓസ്ട്രിയ, ബള്ഗേറിയ,
ചെക്ക് റിപ്പബ്ലിക്, ഫ്രാന്സ്, ജര്മനി, ഐസ്ലന്ഡ്, ഇറ്റലി, നോര്വെ,
പോളണ്ട്, സ്ലോവാക്യ, സ്പെയിന്, സ്വിറ്റ്സര്ലന്ഡ് എന്നീ യൂറോപ്യന്
രാജ്യങ്ങളിലും ക്യാനഡ, യുഎസ്എ, ഓസ്ട്രേലിയ, ന്യൂസിലന്ഡ്, ജപ്പാന്,
കൊറിയ, ചിലി, അര്ജന്റീന എന്നിവിടങ്ങളിലും വമ്പന് സ്കീ
റിസോര്ട്ടുകളുണ്ട്.
മാസ് ടൂറിസം
കൂടുതലാളുകള്ക്ക് കുറച്ചു
സമയംകൊണ്ടു ദീര്ഘദൂരം സഞ്ചരിക്കാവുന്ന സാങ്കേതികവിദ്യാ
വികസനത്തിനൊപ്പമാണു മാസ് ടൂറിസവും വളരുന്നത്. യുഎസ്എയില് യൂറോപ്യന്
ശൈലിയിലുള്ള ആദ്യ ബീച്ച് റിസോര്ട്ടുകള് വന്നത് അറ്റ്ലാന്റ്, ന്യൂജേഴ്സി
ആന്ഡ് ലോങ് ഐലന്ഡ്, ന്യൂയോര്ക്ക് എന്നിവിടങ്ങളിലാണ്. ബ്രസല്സ് ജനത
പ്രശസ്തമാക്കിയ ഓസ്റ്റെന്സ്, പരീസ്യന്മാരുടെ ബൗലോണ്-സര്-മെര്,
ഡ്യുമില്ലെ, ബാള്ട്ടിക് സീയില് 1797ല് സ്ഥാപിതമായ ഹെല്ലിഗെന്ഡാം
തുടങ്ങിയവ യൂറോപ്പിലെ ആദ്യകാല റിസോര്ട്ടുകളാണ്.
അഡ്ജക്റ്റിവല്
ടൂറിസം
ടൂറിസത്തിന്റെ വിവിധ സ്പെഷ്യാലിറ്റി യാത്രാ രൂപങ്ങളാണ്
അഡ്ജക്റ്റിവല് ടൂറിസം എന്നറിയപ്പെടുന്നത്. പതിറ്റാണ്ടുകള് കൊണ്ടു
വികസിച്ചുവന്ന ഈ ശാഖകള് ടൂറിസം വ്യവസായത്തിലും പാഠ്യ പദ്ധതികളിലും
ഇടംപിടിച്ചിരിക്കുന്നു ഇന്ന്. ഇപ്പോള് വികസനഘട്ടത്തിലുള്ള പലതും ഇനി
കൂട്ടിച്ചേര്ക്കപ്പെട്ടേക്കാം, അല്ലെങ്കില് ചിലതു
കാലഹരണപ്പെട്ടേക്കാം. നിലവില് പ്രചാരമുള്ള ചില ഇവയാണ്: അഗ്രി ടൂറിസം,
കലിനറി ടൂറിസം, കള്ച്ചറല് ടൂറിസം, ഇക്കോ ടൂറിസം, ഹെറിറ്റെജ് ടൂറിസം,
എല്ജിബിടി ടൂറിസം, മെഡിക്കല് ടൂറിസം, നോട്ടിക്കല് ടൂറിസം, റിലിജിയസ്
ടൂറിസം, സ്പെയ്സ് ടൂറിസം, വാര് ടൂറിസം, വൈല്ഡ് ലൈഫ്
ടൂറിസം.
സസ്റ്റെയ്നബിള് ടൂറിസം
വേള്ഡ് ടൂറിസം ഓര്ഗനൈസേഷന്
സസ്റ്റെയ്നബിള് ടൂറിസത്തിനു നല്കുന്ന നിര്വചനം ഇങ്ങനെ: സാംസ്കാരിക
മൂല്യങ്ങളും പരിസ്ഥിതിയും ജൈവവൈവിധ്യവും ജീവസന്ധാരണമാര്ഗങ്ങളും
സംരക്ഷിച്ചുകൊണ്ടും, ടൂറിസ്റ്റുകളുടെ സാമ്പത്തിക സാമൂഹിക
സൗന്ദര്യാസ്വാദന ആവശ്യങ്ങള് നിറവേറ്റിക്കൊണ്ടും ടൂറിസം വിഭവശേഷി കൈകാര്യം
ചെയ്യുന്ന രീതി.
ഭാവി തലമുറയുടെ ആവശ്യങ്ങള് നേരിടാനുള്ള
സാധ്യതകള് ഇല്ലാതാക്കാതെ വര്ത്തമാനകാല ആവശ്യങ്ങള്
സാക്ഷാത്കരിക്കുന്നതിനെയാണ് വേള്ഡ് കമ്മീഷന് ഓണ് എണ്വയണ്മെന്റ്
ആന്ഡ് ഡെവലപ്മെന്റ് 1987ല് സസ്റ്റെയ്നബിള് ടൂറിസം എന്നു
വിളിച്ചത്.
മെഡിക്കല് ടൂറിസം
പ്രത്യേക
ചികിത്സാച്ചെലവുകള്ക്കോ ചികിസ്താ നടപടിക്രമങ്ങള്ക്കോ കൂടുതല്
സൗകര്യപ്രദമായ വിദേശരാജ്യങ്ങളിലേക്കു സഞ്ചരിക്കുന്നതാണു മെഡിക്കല്
ടൂറിസം. ദക്ഷിണപൂര്വേഷ്യ, ഇന്ത്യ, കിഴക്കന് യൂറോപ്പ് തുടങ്ങിയ
പ്രദേശങ്ങള് മെഡിക്കല് ടൂറിസ്റ്റുകള്ക്കു പ്രിയങ്കരം. ഡെന്റിസ്ട്രി
പോലുള്ള ചികിത്സകള്ക്ക് ഇന്ത്യ പ്രധാന ആകര്ഷണമാണ്.
എഡ്യുക്കേഷണല്
ടൂറിസം
ക്ലാസ്റൂം അന്തരീക്ഷത്തിനു പുറത്ത് പഠിക്കുകയും
പഠിപ്പിക്കുകയും ചെയ്യുന്നതിനും സാങ്കേതിക മത്സരക്ഷമത
ആര്ജിക്കുന്നതിനും ലോകവ്യാപകമായുണ്ടായ താത്പര്യങ്ങളാണ്
എഡ്യുക്കേഷണല് ടൂറിസത്തിന്റെ വളര്ച്ചയ്ക്കു കാരണമായത്. സ്റ്റുഡന്റ്
എക്സ്ചേഞ്ച് പ്രോഗ്രാമുകളും പഠനയാത്രകളും വിദേശരാജ്യങ്ങളുടെ
സംസ്കാരത്തെ അടുത്തറിയാന് സൗകര്യമൊരുക്കുന്നു. ക്ലാസ്റൂമുകളില്
അഭ്യസിച്ച വിദ്യകള് തികച്ചും വ്യത്യസ്തമായൊരു അന്തരീക്ഷത്തില് പ്രയോഗിച്ചു
നോക്കുന്നതിനും ഇതിലൂടെ സാധ്യത സംജാതമാകുന്നു.
ക്രിയേറ്റിവ്
ടൂറിസം
ടൂറിസത്തിന്റെ ചരിത്രം രേഖപ്പെടുത്തിയ കാലം മുതല് കള്ച്ചറല്
ടൂറിസത്തിന്റെ ഭാഗമായി ക്രിയേറ്റിവ് ടൂറിസവുമുണ്ട്.
പ്രഭുകുടുംബങ്ങളിലെ യുവാക്കള് വിദ്യാഭ്യാസ ആവശ്യങ്ങള്ക്കും
ലോകപരിചയത്തിനുമായി യാത്ര ചെയ്തിരുന്ന ഗ്രാന്ഡ് ടൂര്
കാലഘട്ടത്തിലേക്കാണ് യൂറോപ്പിലെ ക്രിയേറ്റിവ് ടൂറിസത്തിന്റെ വേരുകള്
നീളുന്നത്. അസോസിയേഷന് ഫോര് ടൂറിസം ആന്ഡ് ലെഷര് എഡ്യുക്കേഷന്
(അറ്റ്ലസ്) അംഗങ്ങളായ ക്രിസ്പിന് റെയ്മണ്ടും ഗ്രെഗ് റിച്ചാര്ഡ്സുമാണ്
ക്രിയേറ്റിവ് ടൂറിസം എന്ന പദപ്രയോഗത്തിന്റെ ഉപജ്ഞാതാക്കള്.
സസ്റ്റെയ്നബിള് ടൂറിസത്തിന്റെ പരിധിയില്നിന്നുകൊണ്ട് വിവിധ
കള്ച്ചറല്, ക്രാഫ്റ്റ്സ് ടൂറിസം പദ്ധതികളും യൂറോപ്യന് കമ്മിഷനു മുന്നില്
ഇവര് സമര്പ്പിച്ചിരുന്നു. പരസ്പരസംവാദം സാധ്യമായ
ശില്പശാലകളിലൂടെയും അനൗപചാരിക പഠനാനുഭവങ്ങളിലൂടെയും
സന്ദര്ശകര് ആതിഥേയ സമൂഹത്തില് സജീവമായി ഇടപെടുന്നതിനെയാണ് ഇവര്
ക്രിയേറ്റിവ് ടൂറിസമെന്നു വിളിച്ചത്.
ഈ ആശയത്തെ യുനെസ്കോ പോലുള്ള
സംഘടനകള് സര്വാത്മനാ സ്വീകരിച്ചിട്ടുമുണ്ട്. ക്രിയേറ്റിവ് സിറ്റീസ്
ശൃംഖലയിലലൂടെ പ്രത്യേക പ്രദേശങ്ങളുടെ സാംസ്കാരിക മുദ്രകള്
അടുത്തറിയാനും കഴിയും. കള്ച്ചറല് ടൂറിസത്തിന്റെ ഭാഗമായിത്തന്നെ
ക്രിയേറ്റിവ് ടൂറിസത്തിനു വലിയ പ്രചാരം ലഭിക്കുന്നത് അടുത്തിടെയാണ്.
സഞാരികള് ആതിഥേയസമൂഹങ്ങളില് നടത്തുന്ന ഇടപെടലുകള് തന്നെ
പ്രത്യക്ഷോദാഹരണം. യുകെ, ബഹാമാസ്, ജമൈക്ക, സ്പെയിന്, ഇറ്റലി,
ന്യൂസിലന്ഡ് തുടങ്ങിയ രാജ്യങ്ങള് ഇതിനു കൂടുതല് പ്രചാരം
നല്കുന്നു.
1.3 പുതിയ പ്രവണതകള്
സാമ്പത്തികമാന്ദ്യകാലം
ഒഴിച്ചുനിര്ത്തിയാല് കഴിഞ്ഞ കുറേ പതിറ്റാണ്ടുകളായി ടൂറിസം
വ്യവസായത്തിന് വന് വളര്ച്ചയാണ് ആഗോളതലത്തില്, പ്രത്യേകിച്ച്
യൂറോപ്പില് കണ്ടുവരുന്നത്. ഒഴിവുദിവസങ്ങള് ആഘോഷിക്കാന്
വിദേശരാജ്യങ്ങള് തെരഞ്ഞെടുക്കുന്നതാണു പുതിയ കാലത്തിന്റെ രീതി.
വിദ്യാസമ്പന്നരും അത്യാധുനികരുമായ പുതിയ തലമുറയ്ക്കു കൂടുതല്
ഒഴിവുസമയങ്ങളും അതു വിനോദഭരിതമാക്കാന് കൂടുതല് പണവുമുണ്ട്.
സൗകര്യങ്ങളുടെ നിലവാരത്തിലും ടൂറിസ്റ്റുകള് പ്രത്യേകം ശ്രദ്ധ
പതിപ്പിക്കുമ്പോള്, ആള്ക്കൂട്ടം സൃഷ്ടിക്കാന് റിസോര്ട്ടുകളും പരിധിവിട്ട
ജനപ്രളയത്തെ ആകര്ഷിക്കാന് ക്ലബ്ബുകളും
താത്പര്യപ്പെടുന്നില്ല.
ജംബോ ജെറ്റ്, ചെലവുകുറഞ്ഞ വിമാനയാത്ര,
വേഗമെത്താവുന്ന വിമാനത്താവളങ്ങള് തുടങ്ങി ഗതാഗത മാര്ഗങ്ങളില്
ആധുനികതയുടെ സമ്പൂര്ണ കടന്നുകയറ്റമായതോടെ പലതരത്തിലുള്ള ടൂറിസം
പാക്കേജുകളും ഇടത്തരക്കാരനു പോലും പഥ്യമായിത്തുടങ്ങി.
ലോകാരോഗ്യസംഘടനയുടെ കണക്കനുസരിച്ച് ലോകത്താകെ ഏതു സമയത്തും ശരാശരി
അഞ്ചു ലക്ഷം പേരെങ്കിലും വിമാനയാത്ര ചെയ്തുകൊണ്ടിരിക്കുന്നു. ജീവിത
ശൈലിയിലും വന്കിട മാറ്റങ്ങള് സംഭവിച്ചിരിക്കുന്നു. റിട്ടയര്മെന്റ് കാലം
അതിദീര്ഘമായ വിനോദയാത്രകള്ക്കായി നീക്കിവയയ്ക്കുന്നവരും ഇന്നു
കുറവല്ല. ഇന്റര്നെറ്റ് എന്ന ആധുനിക മാധ്യമത്തിലൂടെയും ടൂറിസം വ്യവസായം
തഴച്ചു വളരുന്നു.
വേള്ഡ് ട്രെയ്ഡ് സെന്ററിനു നേരെയുണ്ടായ
സെപ്റ്റംബര് 11 ആക്രമണം, ബാലി അടക്കമുള്ള ടൂറിസ്റ്റ് കേന്ദ്രങ്ങള്
ഭീകരരുടെ ലക്ഷ്യമായത്, സുനാമി, എച്ച്1എന്1 വൈറസ്, ആഗോള
സാമ്പത്തികമാന്ദ്യം തുടങ്ങിയ ഘടകങ്ങള് ഇതിനിടെ ലോക ടൂറിസത്തിനും
തിരിച്ചടികളും സമ്മാനിച്ചു.
നാലു ശതമാനം വാര്ഷിക ശരാശരിയില്
അന്താരാഷ്ട്ര ടൂറിസം ഇനിയും വളര്ന്നുകൊണ്ടിരിക്കുമെന്ന് വേള്ഡ് ടൂറിസം
ഓര്ഗനൈസേഷന്റെ അനുമാനം. ഇ-കൊമേഴ്സിന്റെ വര്ധിച്ച പ്രഭാവത്തോടെ
ഇന്റര്നെറ്റിലൂടെ ഏറ്റവുമധികം വിറ്റഴിയപ്പെടുന്നതു ടൂറിസം
ഉത്പന്നങ്ങളായിരിക്കുന്നു. ഹോട്ടലുകള്, എയര്ലൈനുകള് തുടങ്ങിയ ടൂറിസം
വ്യവസായ മേഖലകള് നേരിട്ടോ അടനിലക്കാര് മുഖേനയോ ഉത്പന്നങ്ങളും
സേവനങ്ങളും വിറ്റഴിക്കുന്നു.
ഇരുപത്തൊന്നാം നൂറ്റാണ്ടിന്റെ
ആദ്യപാദത്തില്ത്തന്നെ സ്പേസ് ടൂറിസം ടോപ് ഗിയറിലാകുമെന്നാണു
പ്രതീക്ഷിക്കുന്നത്. പക്ഷേ, ഇതിനുള്ള ചെലവ് കുറയാന് മാത്രം വികസനം
സാങ്കേതികവിദ്യയിലുണ്ടാകു വരെ സ്പേസ് ടൂറിസ്റ്റുകളുടെ എണ്ണം പരമ്പരാഗത
ടൂറിസ്റ്റുകളെ അപേക്ഷിച്ചു തുച്ഛമായി തുടരാനേ സാധ്യതയുള്ളൂ.
സാങ്കേതികവിദ്യാ വികസനത്തിനൊപ്പം സ്പേസ്ഷിപ്പ് ഹോട്ടലുകളും
വെള്ളത്തിനടിയിലുള്ള ഹോട്ടലുകളും സമുദ്രത്തില് പൊങ്ങിക്കിടക്കുന്ന
നഗരങ്ങളും വരെ യാഥാര്ഥ്യമാകും. സൗരോര്ജംകൊണ്ടു പ്രവര്ത്തിക്കുന്ന വമ്പന്
വിമാനങ്ങളെയാണ് ആകാശഹോട്ടലുകളാക്കി മാറ്റാന് ശ്രമം നടക്കുന്നത്.
ഹൈഡ്രോപൊളിസ് എന്ന വെള്ളത്തിനടിയിലെ ഹോട്ടല് ദുബായില്
പൂര്ത്തിയായിക്കൊണ്ടിരിക്കുന്നു.
1.4 ടൂറിസം
ലോകവേദിയില്
വേള്ഡ് ടൂറിസം ഓര്ഗനൈസേഷന്
ടൂറിസവുമായി
ബന്ധപ്പെട്ട വിഷയങ്ങള് കൈകാര്യം ചെയ്യാന് ഐക്യരാഷ്ട്രസഭ രൂപംകൊടുത്ത
പ്രസ്ഥാനമാണ് വേള്ഡ് ടൂറിസം ഓര്ഗനൈസേഷന് (യുഎന്ഡബ്ല്യുടിഒ).
സ്പെയിനിലെ മാഡ്രിഡ് ആണിതിന്റെ ആസ്ഥാനം. ലോക ടൂറിസം റാങ്കിങ്
തയാറാക്കുന്നതും മറ്റും ഈ സംഘടനയാണ്. അന്താരാഷ്ട്ര ടൂറിസം സംബന്ധിച്ച,
സാധ്യമായ എല്ലാ സ്ഥിതിവിവരക്കണക്കുകളും യുഎന്ഡബ്ല്യുടിഒ
ശേഖരിക്കുന്നു. ലോകത്തെ മിക്ക രാജ്യങ്ങളുടെയും പൊതുമേഖലാ ടൂറിസം
ഭരണസമിതികള്ക്ക് ഇതില് അംഗത്വമുണ്ട്. ഈ
രാജ്യങ്ങളില്നിന്നെല്ലാമുള്ള കണക്കുകള് ശേഖരിച്ചു താരതമ്യം ചെയ്തു
പ്രസിദ്ധീകരിക്കാറുമുണ്ട്. ഇതിലൂടെ ആഗോള ടൂറിസം രംഗത്തെ നൂതന പ്രവണതകളും
വളര്ച്ചയുടെ ഗതിവേഗവും ദിശയുമെല്ലാം വ്യക്തമാകുന്നു. അറബി, ഇംഗ്ലീഷ്,
ഫ്രഞ്ച്, റഷ്യന്, സ്പാനിഷ് എന്നിവയാണ് യുഎന്ഡബ്ല്യുടിഒയുടെ ഔദ്യോഗിക
ഭാഷകള്.
പരിസ്ഥിതിസൗഹാര്പരവും ഉത്തരവാദിത്വപൂര്ണവും
ആഗോളതലത്തില് സ്വീകാര്യതയുള്ളതുമായ ടൂറിസം വികസനനയങ്ങളെ മാത്രമാണ്
യുഎന്ഡബ്ല്യുടിഒ പ്രോത്സാഹിപ്പിക്കുന്നത്. വികസ്വര രാജ്യങ്ങളുടെ
താത്പര്യങ്ങള്ക്കു പ്രത്യേക പരിഗണനയും നല്കുന്നു.
ടൂറിസത്തിന്
ആഗോള പെരുമാറ്റച്ചട്ടം ഏര്പ്പെടുത്തുക യുഎന്ഡബ്ല്യുടിഒ പ്രഖ്യാപിത
ലക്ഷ്യങ്ങളിലൊന്നാണ്. സാമൂഹിക, പാരിസ്ഥിതിക പ്രത്യാഘാതങ്ങള്
കുറച്ചുകൊണ്ടുതന്നെ, സാമ്പത്തിക, സാമൂഹിക, സാംസ്കാരിക നേട്ടങ്ങള്
പരമാവധി സ്വന്തമാക്കാന് അംഗരാജ്യങ്ങളെയും വിനോദസഞ്ചാര
കേന്ദ്രങ്ങളെയും ബന്ധപ്പെട്ട വ്യവസായങ്ങളെയും സഹായിക്കുകയാണ് ഇതുകൊണ്ട്
ഉദ്ദേശിക്കുന്നത്. ദാരിദ്ര്യം കുറയ്ക്കുകയും ചൂഷണരഹിത വികസനം
വര്ധിപ്പിക്കുകയും ചെയ്യുക എന്ന ഐക്യരാഷ്ട്രസഭയുടെ സഹസ്രാബ്ദ വികസന
പദ്ധതിയില് അധിഷ്ടിതമായാണ് യുഎന്ഡബ്ല്യുടിഒ
പ്രവര്ത്തിക്കുന്നത്.
1952ല് ഹേഗില് രൂപംകൊണ്ട ഇന്റര്നാഷണല്
കോണ്ഗ്രസ് ഓഫ് ഒഫീഷ്യല് ടൂറിസ്റ്റ് ട്രാഫിക് അസോസിയേഷന്സ് (ഒസിഒടിടി)
ആണ് യുഎന്ഡബ്ല്യുടിഒയുടെ ആദ്യരൂപം. ഇന്റര്നാഷണല് യൂണിയന് ഓഫ്
ഒഫീഷ്യല് ടൂറിസ്റ്റ് പബ്ലിസിറ്റി ഓര്ഗനൈസേഷനിലും (ഐയുഒടിപിഒ) ഇതിനു
വേരുകളുണ്ട്. രണ്ടാം ലോകമഹായുദ്ധം അവസാനിക്കുകയും അന്താരാഷ്ട്ര
സഞ്ചാരികളുടെ എണ്ണം ഗണ്യമായി കൂടുകയും ചെയ്തതോടെ ഐയുഒടിപിഒ, ഐയുഒടിഒ
ആയി പുനസംഘടിപ്പിക്കപ്പെട്ടു- ഇന്റര്നാഷണല് യൂണിയന് ഓഫ് ഒഫീഷ്യല്
ട്രാവല് ഓര്ഗനൈസേഷന്സ്. ഒരു സാങ്കേതിക, സക്കാരിതര സംഘടനയായിരുന്ന
ഇതില് ദേശീയ ടൂറിസ്റ്റ് സംഘടനകളും വ്യവസായികളും ഉപയോക്താക്കളും
അംഗങ്ങളായിരുന്നു. ടൂറിസത്തിന്റെ പൊതുവിലുള്ള വികസനം
മാത്രമായിരുന്നില്ല ഇതിന്റെ ലക്ഷ്യം. അന്താരാഷ്ട്ര വ്യവസായമെന്ന നിലയില്
ടൂറിസത്തിന്റെ പരമാവധി ഗുണഫലങ്ങള് പുറത്തുകൊണ്ടുവരികയും വികസ്വര
രാജ്യങ്ങള്ക്കു നല്ലൊരു വികസനമാര്ഗമായി ടൂറിസം വ്യവസായത്തെ
മാറ്റിയെടുക്കുകയും കൂടിയായിരുന്നു.
1960കളുടെ അവസാനത്തോടെ,
അന്താരാഷ്ട്ര പങ്കാളിത്തം തുടരാന് കൂടുതല് മാറ്റങ്ങള് ആവശ്യമാണെന്ന്
ഐയുഒടിഒ തിരിച്ചറിഞ്ഞു. 1967ല് ടോക്യോയില് കൂടിയ ഇരുപതാം ഐയുഒടിഒ
ജനറല് അസംബ്ലി #ൊരു പ്രഖ്യാപനം നടത്തി. ഐഖ്യരാഷ്ട്രസഭ അടക്കമുള്ള
അന്താരാഷ്ട്ര ഏജന്സികളുമായി സഹകരിച്ച് അന്താരാഷ്ട്രതലത്തില്
പ്രവര്ത്തിക്കുവാന് മതിയായ സന്നാഹങ്ങളോടു കൂടി ഒരു അന്തര്-സര്ക്കാര്
സ്ഥാപനത്തിന്റെ രൂപീകരണമാണ് അതില് പ്രധാനമായും ആവശ്യപ്പെട്ടത്.
ഐയുഒടിഒയുടെ പ്രവര്ത്തനകാലഘട്ടത്തില് അത് ഐക്യരാഷ്ട്രസഭയുമായി വളരെ
നല്ല ബന്ധം സ്ഥാപിച്ചു കഴിഞ്ഞിരുന്നു. അതുകൊണ്ടുതന്നെ ഇരുപതാം
സമ്മേളനത്തിന്റെ പ്രഖ്യാപനം യുഎന് മുഖവിലയ്ക്കെടുക്കുകയും ചെയ്തു.
ഐയുഒടിഒ തന്നെ യുഎന്റെ ഭാഗമാകുക എന്ന നിര്ദേശമാണ് ആദ്യ ഉയര്ന്നുവന്നത്.
ഭരണപരവും സാമ്പത്തികവുമായ സ്വയംഭരണത്തോടെ യുഎന്നുമായി ചേര്ന്നു
പ്രവര്ത്തിച്ചാല് മതിയാകുമെന്ന സമവായം
പിന്നീടുണ്ടായി.
അങ്ങനെയാണ് 1970ല് ഡബ്ല്യുടിഒ രൂപീകരണത്തിന്
അനുകൂലമായി ഐയുഒടിഒ ജനറല് അസംബ്ലി വോട്ടു ചെയ്യുന്നത്. 1974 നവംബര്
ഒന്നിന് 51 അംഗരാജ്യങ്ങളുമായി പുതിയ സംഘടന ഡബ്ല്യുടിഒ നിലവില് വന്നു.
2003ല് നടന്ന ഡബ്ല്യുടിഒയുടെ പതിനഞ്ചാം ജനറല് കൗണ്സിലും യുഎന്നും ചേര്ന്ന്
സംഘടനയെ യുഎന്റെ പ്രത്യേക ഏജന്സിയാക്കി മാറ്റാനും തീരുമാനിച്ചു.
ഡബ്ല്യുടിഒയ്ക്ക് ഇതോടെ കൂടുതല് സ്വീകാര്യതയുണ്ടാകുമെന്നും
മനുഷ്യസമൂഹത്തിന്റെ മറ്റു പ്രധാന പ്രവര്ത്തനങ്ങള്ക്കൊപ്പം ടൂറിസത്തിനു
ംസ്ഥാനം ലഭിക്കുമെന്നും സംഘടനയുടെ അന്നത്തെ സെക്രടഡ്ടറി ജനറല്
ഫ്രാന്സിസ്കോ ഫ്രാങ്കിയാലി അഭിപ്രായപ്പെട്ടു.
2007 ആയതോടെ
യുഎന്ഡബ്ല്യുടിഒയില് 150 അംഗരാജ്യങ്ങളും ഏഴു പ്രവിശ്യകളും സ്വകാര്യ
മേഖലയെയും വിദ്യാഭ്യാസ സ്ഥാപനങ്ങളെയും ടൂറിസം അസോസിയേഷനുകളെയും
പ്രാദേശിക ടൂറിസം ഭരണസമിതികളെയും പ്രതിനിധീകരിച്ച് 350-ലേറെ
അഫിലിയേറ്റ് അംഗങ്ങളായി.
ജനീവ ആസ്ഥാനമായ വേള്ഡ് ട്രേഡ്
ഓര്ഗനൈസേഷന്റെയും (ഡബ്ല്യുടിഒ) നമ്മുടെ വേള്ഡ് ടൂറിസം ഓര്ഗനൈസേഷന്റെയും
ചുരുക്കപ്പേരുകള് തമ്മിലുള്ള ആശയക്കുഴപ്പം പരിഹരിക്കപ്പെട്ടത് 2005
ഡിബംസര് ഒന്നിന്. യുഎന്ഡബ്ല്യുടിഒ എന്ന പേര് ടൂറിസം ഓര്ഗനൈസേഷനു
നല്കാന് ജനറല് അസംബ്ലി തീരുമാനിച്ചത് അന്നാണ്. ഇതോടെ ഇംഗ്ലീഷിലും
റഷ്യനിലും സംഘടനയുടെ ചുരുക്കപ്പേര് യുഎന്ഡബ്ല്യുടിഒ എന്നു മാറിയപ്പോള്
ഫ്രഞ്ചിലും സ്പാനിഷിലും ഒഎംടി എന്നു നിലനിര്ത്തി.
യുഎന്ഡബ്ല്യുടിഒ
സെക്രട്ടറി ജനറല്മാര്:
1975-1985: റോബര്ട്ട് ലോനാറ്റി
(ഫ്രാന്സ്)
1986-1989: വില്ലിബാള്ഡ് പാര് (ഓസ്ട്രിയ)
1990-1996:
അന്റോണിയോ എന്റിക്സ് സാവിഗ്നാക് (മെക്സിക്കോ)
1998-2008: ഫ്രാന്സിസ്കോ
ഫ്രാങ്കിയാലി (ഫ്രാന്സ്)
2008-: തലെബ് റിഫായ് (ജോര്ദാന്)
ജനറല്
അസംബ്ലി
യുഎന്ഡബ്ല്യുടിഒയുടെ പരമപ്രധാന ഘടകമാണു ജനറല് അസംബ്ലി.
രണ്ടു വര്ഷം കൂടുമ്പോഴാണു ജനറല് അസംബ്ലി സാധാരണഗതിയില് സമ്മേളിക്കാറ്.
പൂര്ണ അംഗങ്ങളുടെയും അസോസിയേറ്റ് അംഗങ്ങളുടെയും ബിസിനസ്
കൗണ്സിലിന്റെയും പ്രതിനിധികള് ഇതില് പങ്കെടുക്കും. മുതിര്ന്ന ടൂറിസം
ഉദ്യോഗസ്ഥരുടെയും ആഗോളതലത്തിലെ സ്വകാരമേഖലയില്നിന്നുള്ള ഉന്നത
പ്രതിനിധികളുടെയും പ്രധാന സമ്മേളന വേദി ഇതു തന്നെ.
മേഖലാ
കമ്മീഷനുകള്
ജനറല് അസംബ്ലിയുടെ സബ്സിഡിയറി ആയി 1975ല് ആറു മേഖലാ
കമ്മീഷനുകള് രൂപീകരിച്ചു. ഇവ വര്ഷത്തിലൊരിക്കല് യോഗം ചേരുന്നു.
ജനറല് അസംബ്ലിയുടെ ഇടവേളകളില് അംഗരാജ്യങ്ങള് തമ്മിലുള്ള
ആശയവിനിമയം നിലനിര്ത്താനും സെക്രട്ടേറിയറ്റുമായുള്ള ബന്ധം തുടരാനും
സഹായിക്കുന്നത് മേഖലാ കമ്മീഷനുകളാണ്. ഇവ പ്രസക്തമായ വിഷയങ്ങളിലുള്ള
അഭിപ്രായങ്ങളും നിര്ദേശങ്ങളും ആശങ്കകളും സെര്ട്ടേറിയറ്റിനു
റിപ്പോര്ട്ട് ചെയ്യുന്നു. ഓരോ കമ്മീഷനും പ്രത്യേകം ചെയര്മാനും വൈസ്
ചെയര്മാന്മാരുമുണ്ടാകും. ജനറല് അസംബ്ലിയുടെ ഒരു സമ്മേളനം മുതല്
അടുത്തതു വരെയുള്ള രണ്ടു വര്ഷമാണ് ഇവരുടെ
കാലാവധി.
എക്സിക്യൂട്ടീവ് കൗണ്സില്
അസംബ്ലിയുടെ
തീരുമാനങ്ങളും ശുപാര്ശകളും നടപ്പാക്കാന് സെക്രട്ടറി ജനറലുമായി
ആലോചിച്ച്, വേണ്ട നടപടികള് കൈക്കൊള്ളുകയാണ് എക്സിക്യൂട്ടീവ്
കൗണ്സിലിന്റെ ചുമതല. നടപടി റിപ്പോര്ട്ടുകള് അസംബ്ലിയില്
സമര്പ്പിക്കുകയും വേണം. വര്ഷത്തില് കുറഞ്ഞതു രണ്ടു തവണ കൗണ്സില് കൂടും.
അഞ്ചു പൂര്ണ അംഗങ്ങള്ക്ക് ഒരു പ്രതിനിധി എന്ന നിലയിലാണു എക്സിക്യൂട്ടീവ്
കൗണ്സിലിലേക്കുള്ള തെരഞ്ഞെടുപ്പ്. ഭൂമിശാസ്ത്രപരമായി എല്ലാ
പ്രദേശങ്ങള്ക്കും പ്രാതനിധ്യം കിട്ടുംവിധമാണ് തെരഞ്ഞെടുപ്പിനുള്ള
ചട്ടങ്ങളും നടപടിക്രമങ്ങളും തയാറാക്കിയിരിക്കുന്നത്. സ്പെയിന് മാത്രം
ഇതില് സ്ഥിരാംഗമാണ്. മറ്റ് അംഗങ്ങളുടെ കാലാവധി നാലു വര്ഷം വീതം. രണ്ടു
വര്ഷം കൂടുമ്പോള് നാലിലൊന്ന് അംഗങ്ങളെ വീതമാണു
തെരഞ്ഞെടുക്കുക.
യുഎന്ഡബ്ല്യുടിഒയിലെ വിവിധ
കമ്മിറ്റികള്:
വേള്ഡ് കമ്മിറ്റി ഓണ് ടൂറിസം എത്തിക്സ്
പ്രോഗ്രാം
കമ്മിറ്റി
കമ്മിറ്റി ഓണ് ബജറ്റ് ആന്ഡ് ഫിനാന്സ്
കമ്മിറ്റി ഓണ്
മാര്ക്കറ്റ് ആന്ഡ് കമ്പറ്റിറ്റീവ്നെസ്
കമ്മിറ്റി ഓണ്
സ്റ്റാറ്റിസ്റ്റിക്സ് ആന്ഡ് ദ ടൂറിസം സാറ്റലൈറ്റ്
അക്കൗണ്ട്
സസ്റ്റെയ്നബിള് ഡെവലപ്മെന്റ് ഓഫ് ടൂറിസം
കമ്മിറ്റി
കമ്മിറ്റി ഓണ് പോവര്ട്ടി റിഡക്ഷന്
കമ്മിറ്റി ഫോര് ദ റിവ്യൂ
ഓഫ് ആപ്ലിക്കേഷന്സ് ഫോര് അഫിലിയേറ്റഡ്
മെംബര്ഷിപ്പ്
സെക്രട്ടേറിയറ്റ്
സെക്രട്ടറി ജനറലിന്റെ
നേതൃത്വത്തിലാണു സെക്രട്ടേറിയറ്റ്. മാഡ്രിഡിലെ യുഎന്ഡബ്ല്യുടിഒ
ആസ്ഥാനത്തുള്ള 110 സ്ഥിരം ജോലിക്കാരും സെക്രട്ടറി ജനറലിന്റെ നേരിട്ടുള്ള
നിയന്ത്രണത്തിലാണു പ്രവര്ത്തിക്കുന്നത്. അദ്ദേഹത്തെ സഹായിക്കാന്
ഡെപ്യൂട്ടി സെക്രട്ടറി ജനറലുമുണ്ട്. പദ്ധതികള് നടപ്പാക്കുന്നതും
അംഗങ്ങളുടെ ആവശ്യങ്ങള് പരിഗണിക്കുന്നതും യുഎന്ഡബ്ല്യുടിഒ
ഉദ്യോഗസ്ഥരുടെ ഉത്തരവാദിത്വമാണ്. അഫിലിയേറ്റ് അംഗങ്ങള്ക്കായി
മുഴുവന് സമയ എക്സിക്യൂട്ടീവ് ഡയറക്ടറും മാഡ്രിഡിലെ ആസ്ഥാനത്തുണ്ട്.
ജപ്പാനിലെ ഒസാക്കയില് ഏഷ്യ-പസഫിക് മേഖലയുടെ ആവശ്യങ്ങള്ക്കായി
റീജ്യനല് സപ്പോര്ട്ട് ഓഫീസ് പ്രവര്ത്തിക്കുന്നു. ജാപ്പനീസ് സര്ക്കാരാണ്
ഇതിന്റെ പ്രവര്ത്തനത്തിനാവശ്യമായ ഫണ്ട് നല്കുന്നത്.
ലോക ടൂറിസം
ദിനം
1980 മുതല് യുഎന്ഡബ്ല്യുടിഒ സെപ്റ്റംബര് 27 ലോക ടൂറിസം ദിനമായി
ആഘോഷിക്കുന്നു. യുഎന്ഡബ്ല്യുടിഒ സ്റ്റാറ്റിയൂട്ടുകള് അംഗീകരിച്ചത്
1970ല് ഇതേ ദിവസമായിരുന്നു. ആഗോള ടൂറിസം മേഖലയിലെ സുപ്രധാന
നാഴികക്കല്ലായി എണ്ണപ്പെട്ട സംഭവമായിരുന്നു ഈ അംഗീകാരം. അന്താരാഷ്ട്ര
സമൂഹത്തില് ടൂറിസത്തിന്റെ പങ്കിനെപ്പറ്റി ബോധവത്കരണം നടത്തുകയും
സാമൂഹിക, സാംസ്കാരിക, രാഷ്ട്രീയ, സാമ്പത്തിക മൂല്യങ്ങളെ അതെങ്ങനെ
ബാധിക്കുന്നു എന്നു വ്യക്തമാക്കുകയുമാണ് ടൂറിസം ദിനാഘോഷത്തിന്റെ
ലക്ഷ്യം.
ആഘോഷത്തില് യുഎന്ഡബ്ല്യുടിഒയുടെ പങ്കാളിയായി ഓരോ വര്ഷവും
വ്യത്യസ്ത ആതിഥേയ രാജ്യങ്ങളെ തെരഞ്ഞെടുക്കാന് തീരുമാനിച്ചത് 1997ല്
ടര്ക്കിയിലെ ഇശ്റാബുളില് ചേര്ന്ന പന്ത്രണ്ടാം സെഷനാണ്. ടൂറിസം
ദിനാഘോഷത്തിനായ യൂറോപ്പ്, ദക്ഷിണേഷ്യ, അമേരിക്ക, ആഫ്രിക്ക എന്ന ക്രമം
തീരുമാനിക്കപ്പെട്ടത് 2003ല് ചൈനയിലെ ബീജിങ്ങില് ചേര്ന്ന പതിനഞ്ചാം
സെഷനിലും.
ലോക ടൂറിസം റാങ്കിങ്
വേള്ഡ് ടൂറിസം ബാരോമീറ്റര്
പബ്ലിക്കേഷന്റെ ഭാഗമായി യുഎന്ഡബ്ല്യുടിഒ ലോക ടൂറിസം റാങ്കിങ്
തയാറാക്കുന്നു. 2007ല് ആകെയുണ്ടായിരുന്ന 90.3 കോടി ടൂറിസ്റ്റുകളില്
ഏറ്റവും കൂടുതല് പേര് സന്ദര്ശിച്ചത് 50 രാജ്യങ്ങളാണ്. 2008 ജൂണില്
പ്രസിദ്ധീകരിച്ച റാങ്കിങ് ഇപ്രകാരം:
1. ഫ്രാന്സ്
2.
സ്പെയിന്
3. യുഎസ്എ
4. ചൈന
5. ഇറ്റലി
6. യുകെ
7. ജര്മനി
8.
യുക്രെയ്ന്
9. ടര്ക്കി
10. മെക്സിക്കോ
11. മലേഷ്യ
12.
ഓസ്ട്രിയ
13. റഷ്യ
14. ക്യാനഡ
15. ഹോങ്കോങ്
16. ഗ്രീസ്
17.
പോളണ്ട്
18. തായ്ലന്ഡ്
19. മക്കാവു
20. പോര്ച്ചുഗലര്
21. സൗദി
അറേബ്യ
22. നെതര്ലാന്ഡ്സ്
23. ഈജിപ്റ്റ്
24. ക്രൊയേഷ്യ
25.
ദക്ഷിണാഫ്രിക്ക
26. ഹംഗറി
27. സ്വിറ്റ്സര്ലന്ഡ്
28. ജപ്പാന്
29.
സിംഗപ്പൂര്
30. ഐസ്ലന്ഡ്
31. മൊറോക്കോ
32. യുഎഇ
33.
ബെല്ജിയം
34. ടുണീഷ്യ
35. ചെക്ക് റിപ്പബ്ലിക്
36. ദക്ഷിണ കൊറിയ
37.
ഇന്തോനേഷ്യ
38. സ്വീഡന്
39. ബള്ഗേറിയ
40. ഓസ്ട്രേലിയ
41.
ബ്രസീല്
42. ഇന്ത്യ
43. ഡെന്മാര്ക്ക്
44. അര്ജന്റീന
45.
ബഹ്റൈന്
46. വിയറ്റ്നാം
47. ഡൊമിനിക്കന് റിപ്പബ്ലിക്
48.
നോര്വേ
49. തായ്വാന്
50. പ്യൂര്ട്ടോറിക്കോ
വേള്ഡ്
ട്രാവല് മോനിട്ടര്
ലോകവ്യാപക ടൂറിസം ഇന്ഫര്മേഷന്
സിസ്റ്റമാണ് വേള്ഡ് ട്രാവല് മോനിറ്റര് (ഡബ്ല്യുടിഎം), അഥവാ യൂറോപ്യന്
ട്രാവല് മോനിറ്റര്. ഓരോ രാജ്യത്തെയും സ്ഥിരതാമസക്കാര് ഇതര
രാജ്യങ്ങലിലേക്കു നടത്തുന്ന വിനോദ സഞ്ചാരങ്ങളാണ് ഇതു പരിഗണിക്കുക. 1988
മുതല് ഇടിഎം എല്ലാ യൂറോപ്യന് രാജ്യങ്ങളില്നിന്നുമുള്ള ഔട്ട്ബൗണ്ട് ടൂറിസം
പ്രവണതകള് പഠനവിധേയമാക്കുന്നു. യുഎസ്എ, ക്യാനഡ, അര്ജന്റീന,
ബ്രസീല്, യുഎഇ, സൗദി അറേബ്യ, ജപ്പാന്, ചൈന, ഇന്ത്യ തുടങ്ങിയ
രാജ്യങ്ങളെക്കൂടി ഉള്പ്പെടുത്താനാണ് ഇടിഎമ്മിനെ ഡബ്ല്യുടിഎം ആയി
വികസിപ്പിച്ചത്. വിവിധ രാജ്യങ്ങളില്നിന്നുള്ള വിവരങ്ങള് ശേഖരിച്ച്,
ആഗോള യാത്രവഴികളുടെ 90 ശതമാനത്തോളം കണക്കില്പ്പെടുത്താന് ഇന്നു
ഡബ്ല്യുടിഎമ്മിനു കഴിയുന്നു. യാത്രയുടെ ഉദ്ദേശ്യ ംപരിഗണിക്കാതെ, ഒരു
രാത്രിയിലെ താമസമെങ്കിലും ഉള്ക്കൊള്ളുന്ന എല്ലാ ഔട്ട്ബൗണ്ട് ടൂറുകലും
പരിധിയില് വരുത്താനാണു ശ്രമിക്കുന്നത്. വിനോദയാത്രകള് മാത്രമല്ല,
ബിസിനസ് ട്രിപ്പുകളും ബന്ധുക്കളെയോ സുഹൃത്തുക്കളെയോ സന്ദര്ശിക്കാനുള്ള
സ്വകാര്യ യാത്രകളും വരെ ഇങ്ങനെ രേഖപ്പെടുത്തുന്നു.
ഇടിഎം നിലവില്
വരുന്നതിനു മുമ്പു തന്നെ ടൂറിസം മേഖലയില് വിവിധ സര്വേകള്
സംഘടിപ്പിക്കപ്പെടുകുംയ സ്ഥിതിവിവരക്കണക്കുകള് ശേഖരിക്കുകയും
ചെയ്തിട്ടുണ്ട്. പക്ഷേ, ഇവയ്ക്ക് ഒരു ഏകീകൃത രൂപം അന്നൊന്നും
ഉണ്ടായിരുന്നില്ല. സാമ്പ്ളിങ്ങിലെയും സര്വേ രീതികളിലെയും വ്യത്യാസം
കാരണം ഇവ ഒരിക്കലും താരതമ്യ വിധേയമാക്കാനും സാധിച്ചിരുന്നില്ല. ഇടിഎം
വന്നതോടെ ഇത്തരം സര്വേകളും പഠനങ്ങളും സഹകരണ അടിസ്ഥാനത്തിലായി.
സര്വേകള്ക്ക് ലോകം അംഗീകരിച്ച രീതികളും പിന്തുടര്ന്നു തുടങ്ങി.
കമ്പ്യൂട്ടര് സഹായത്തോടെയുള്ള ടെലിഫോണ് ഇന്റര്വ്യൂകളും നേരിട്ടുള്ള
അഭിമുഖങ്ങളും സ്വീകരിക്കപ്പെട്ടു. ഇന്നു ഡബ്ല്യുടിഎമ്മിനായി ലോക
വ്യാപകമായി എടുക്കുന്നത് ഏകദേശം അഞ്ചു ലക്ഷം അഭിമുഖങ്ങള്. സാമ്പിള് ഡേറ്റ
വലുതാകുമ്പോള് സ്ഥിതിവിരക്കണക്കുകള് സ്വാഭാവികമായു ംകൂടുതല്
വിശ്വസനീയമാകുന്നു. സ്റ്റാന്ഡേര്ഡ് ചോദ്യാവലി ഉപയോഗിച്ച് യാത്രയുടെ
എല്ലാ മുഖങ്ങളും വിശകലനം ചെയ്യപ്പെടുന്നു. 1938 മുതല് ഇതിലെ അടിസ്ഥാന
ചോദ്യങ്ങള് മാറിയിട്ടില്ല.
ഇവയിലൂടെ ലഭിക്കുന്നു
വിവരങ്ങള്:
ഔട്ട്ബൗണ്ട് ട്രിപ്പുകളുടെ എണ്ണം
ലക്ഷ്യമാക്കുന്ന
രാജ്യം
ലക്ഷ്യമാക്കുന്ന പ്രദേശങ്ങള്/നഗരങ്ങള്
യാത്രയുടെ
ഉദ്ദേശ്യം
ഒഴിവുദിവസങ്ങളുടെ സ്വഭാവം
ഒഴിവുകാല
വിനോദങ്ങള്/പ്രവര്ത്തനങ്ങള്
ബിസിനസ് ട്രിപ്പാണെങ്കില് അതിന്റെ
രീതി
ട്രിപ്പിന്റെ ദൈര്ഘ്യം
ഗതാഗത മാര്ഗം
പുറപ്പെടുന്ന
വിമാനത്താവളം
താമസസൗകര്യത്തിന്റെ സ്വഭാവം
ബുക്കിങ്
രീതി
ഇന്റര്നെറ്റ് ഉപയോഗം
ട്രാവല് ഇന്ഫര്മേഷന്
സ്രോതസ്
കുട്ടികൊളുമൊത്തുള്ള യാത്ര
യാത്രാ
സീസണ്
യാത്രാസംഘം
ലക്ഷ്യമാക്കുന്ന പ്രാദേശിക
മാര്ക്കറ്റുകള്
യാത്രയുടെ നൈരന്തര്യം
യാത്രയുടെ
ഇന്റന്സിറ്റി.
(തുടരും.....)