ദുബായ്: ഇന്ത്യയും യുഎഇയും തമ്മിലുള്ള നയതന്ത്രവും വാണിജ്യപരവുമായ സൗഹൃദം ലോകത്തിന് മാതൃകയാണെന്ന് ഇന്ത്യന്‍ യൂണിയന്‍ മുസ് ലിം ലീഗ് പ്രസിഡന്റും മുന്‍ കേന്ദ്ര മന്ത്രിയുമായ ഇ.അഹമ്മദ് എംപി അഭിപ്രായപെട്ടു. 45–ാമത് യുഎഇ ദേശീയ ദിനാഘോഷത്തിന്റെ ഭാഗമായി ദുബായ് കെഎംസിസി സംഘടിപ്പിച്ച സ്‌പോര്‍ട്‌സ് മീറ്റ് ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.

സഹിഷ്ണുതയും സമാധാനവും നില നില്‍ക്കുന്ന അപൂര്‍വം ചില രാജ്യങ്ങളില്‍ ഒന്നാണ് യുഎഇ എന്നും ഇവിടുത്തെ ഭരണാധികാരികളുടെ ദീര്‍ഘവീക്ഷണത്തോടെയുള്ള നേതൃത്വം അനുകരണീയമാണെന്നും ഇ.അഹമ്മദ് പറഞ്ഞു. 

ദുബായ് കെഎംസിസി പ്രസിഡന്റ് പി.കെ അന്‍വര്‍ നഹ അധ്യക്ഷത വഹിച്ച പരിപാടിയില്‍ യുഎഇ കെഎംസിസി ജനറല്‍ സെക്രട്ടറി ഇബ്രാഹിം എളേറ്റില്‍, സംസ്ഥാന ജനറല്‍ സെക്രട്ടറി ഇബ്രാഹിം മുറിച്ചാണ്ടി, സ്‌പോര്‍ട്‌സ് വിംഗ് ചെയര്‍മാന്‍ ആവയില്‍ ഉമ്മര്‍ ഹാജി എന്നിവര്‍ പ്രസംഗിച്ചു. കേന്ദ്ര കമ്മിറ്റി അംഗം ഹസൈനാര്‍ ഹാജി എടച്ചാകൈ, ത്വല്‍ഹത്ത് ഫോറം ഗ്രൂപ്പ് ഷാഫി മുട്ടം, വി.പി. ഷഫീഖ് എന്നിവര്‍ സംബന്ധിച്ചു. 

കെഎംസിസി സ്‌പോര്‍ട്‌സ് മീറ്റിന് തുടക്കം

ദുബായ് കെഎംസിസിയുടെ സ്‌പോര്‍ട്‌സ് മീറ്റില്‍ പല മത്സരങ്ങളും സംസ്ഥാന മീറ്റിന്റെ നിലവാരത്തിലേക്ക് ഉയര്‍ന്നു. ഹൈജംപ്, നൂറു മീറ്റര്‍ ഓട്ടം എന്നീ മത്സരത്തില്‍ പങ്കെടുത്ത മത്സരാര്‍ഥികള്‍ സംസ്ഥാന മീറ്റ് റിക്കാര്‍ഡിന്റെ നിലവാരത്തിലുള്ള പ്രകടനമാണ് കാഴ്ചവച്ചത്. പതിനാല് ജില്ലകളില്‍ നിന്നായി മുന്നൂറോളം മത്സരാര്‍ഥികള്‍ അങ്കത്തിനിറങ്ങിയപ്പോള്‍ മത്സരങ്ങള്‍ വീറും വാശിയും നിറഞ്ഞതായി. ഇതുവരെ നടന്ന മത്സര ഫലമനുസരിച്ച് 40 പോയന്റുമായി കണ്ണൂര്‍ ജില്ല ഒന്നാം സ്ഥാനത്തും 30 പോയിന്റുമായി മലപ്പുറം ജില്ല രണ്ടാം സ്ഥാനത്തും 18 പോയിന്റുമായി കോഴിക്കോട് ജില്ല മൂന്നാം സ്ഥാനത്തുമാണ്. സംസ്ഥാന ഭാരവാഹികളായ ഒ.കെ. ഇബ്രാഹിം, മുസ്തഫ തിരൂര്‍, മുഹമ്മദ് പട്ടാമ്പി, എന്‍.കെ. ഇബ്രാഹിം, അഡ്വ. സാജിദ് അബൂബക്കര്‍, ഇസ്മായില്‍ ഏറാമല, അഷ്‌റഫ് കൊടുങ്ങല്ലൂര്‍, ആര്‍.ഷുക്കൂര്‍ സ്‌പോര്‍ട്‌സ് കമ്മിറ്റി കണ്‍വീനര്‍ അബ്ദുള്ള ആറങ്ങാടി എന്നിവര്‍ നേതൃത്വം നല്‍കി. 

റിപ്പോര്‍ട്ട്: നിഹ്മത്തുള്ള തൈയില്‍