വരിക്കോലി: യാക്കോബായ -ഓര്ത്തഡോക്സ്
സംഘര്ഷത്തെ തുടര്ന്ന് എറണാകുളം വരിക്കോലി പള്ളി അടച്ചു. ആര്ഡിഒ
എത്തിയാണ് പള്ളി താല്ക്കാലികമായി പള്ളി പൂട്ടിയത്. നേരത്തെ യാക്കോബായ
വിഭാഗം തടഞ്ഞുവെച്ചിരുന്ന കാതോലിക്കാ ബാവയെ പുറത്തെത്തിച്ചിരുന്നു.
യാക്കോബായ വിശ്വാസികളുടെ പ്രതിഷേധത്തിനിടെ പോലീസ് സുരക്ഷയിലാണ് കാതോലിക്കാ
ബാവയെ പുറത്തെത്തിച്ചത്. രാവിലെ കുര്ബാന അര്പ്പിച്ച്
പുറത്തേക്കിറങ്ങവേയാണ് കാതോലിക്കാബാവയെ തടഞ്ഞുവെച്ചത്.
നിലവിലെ സുപ്രീം കോടതി വിധിപ്രകാരം ഓര്ത്തഡോക്സ് വിഭാഗത്തിന്
അനുവദിക്കപ്പെട്ട പള്ളികളിലൊന്നാണ് വരിക്കോലി പള്ളി. കഴിഞ്ഞ ഏതാനും
നാളുകളായി ഇവിടെ പ്രശ്നങ്ങള് നിലനിന്നിരുന്നു. പള്ളിയിലെ അന്തോഖ്യ
സിംഹാസനത്തിന്റെ ചിഹ്നം പെയിന്റടിച്ച് മറച്ചതിനെ തുടര്ന്നാണ്
സംഘര്ഷങ്ങള് തുടങ്ങിയത്.
രാവിലെ മുതല് നിലനിന്ന സംഘര്ഷാവസ്ഥയ്ക്ക്
വൈകീട്ടോടെയാണ് അയവുവന്നത്. സംഘര്ഷ സാധ്യത മുന്നില് കണ്ടാണ് ആര്ഡിഒ
പള്ളി താല്ക്കാലികമായി പൂട്ടാന് നിര്ദ്ദേശിച്ചത്.
അതേസമയം തങ്ങള് കാതോലിക്കാ ബാവയെ തടഞ്ഞുവെച്ചുവെന്ന ആരോപണം യാക്കോബായ
വിഭാഗം തള്ളിക്കളഞ്ഞു.
തങ്ങള് ആരെയും തടഞ്ഞുവെച്ചില്ലെന്നും പുറത്തേക്ക്
പോകാന് സൗകര്യം ഒരുക്കിയിരുന്നുവെന്നുമാണ് അവര് പറയുന്നത്. എന്നാല്
കാതോലിക്കാ ബാവയ്ക്ക് സംരക്ഷണം ഉറപ്പുവരുത്തുന്നതില് സര്ക്കാരും പോലീസും
പരാജയപ്പെട്ടുവെന്ന് ഓര്ത്തഡോക്സ് വിഭാഗം ആരോപിക്കുന്നു. പോലീസിന്റെ
നിഷ്ക്രിയത്വമാണ് പ്രശ്നം വഷളാകാന് കാരണമെന്നാണ് അവര് ആരോപിക്കുന്നത്.
സംഘര്ഷത്തെ തുടര്ന്ന് പള്ളി പൂട്ടി സീല് ചെയ്ത് താക്കോലുമായി ആര്ഡിഒ
മടങ്ങി. (Mathrubhumi)