കൊച്ചി: താരസംഘനടയായ 'അമ്മ' യുമായി ഇടഞ്ഞ് രാജിവെച്ച ആക്രമിക്കപ്പെട്ട നടി തിരികെ സംഘടനയിലേക്ക് എത്തുന്നുവെന്ന സൂചനകള് പുറത്ത്. ജനുവരിയില് നടക്കുന്ന എക്സിക്യൂട്ടീവ് യോഗത്തില് അന്തിമതീരുമാനമുണ്ടായേക്കുമെന്നാണ് ഒരു ഓണ്ലൈന് മാധ്യമം പുറത്തുവിട്ട റിപ്പോര്ട്ടുകളില് വ്യക്തമാക്കുന്നത്. ഇതുസംബന്ധിച്ച് സംഘടനയുടെ തലപ്പത്തുള്ള ചിലര് തന്നെ വ്യക്തമായ സൂചനകള് നല്കിയതായാണ് റിപ്പോര്ട്ട്.
നടി ആക്രമിക്കപ്പെട്ട കേസിന്റെ പ്രതിസ്ഥാനത്തുള്ള നടന് ദിലീപിന്റെ രാജി ആവശ്യം ഉയര്ത്തിയാണ് താരം സംഘടന വിട്ടത്. എന്നാല് നടി ഉയര്ത്തിയ ആ വിഷയത്തിന് ദിലീപിന്റെ രാജിയോടെ പരിഹാരമായെന്നാണ് അമ്മ എക്സിക്യൂട്ടീവ് ചുണ്ടിക്കാണിക്കുന്നത്. ദിലീപിനോട് രാജി ചോദിച്ചുവാങ്ങിയതാണെന്ന് പ്രസിഡന്റ് മോഹന്ലാല് തന്നെ വാര്ത്താസമ്മേളനത്തില് വെളിപ്പെടുത്തിയിരുന്നു. ഇക്കാര്യങ്ങള് ചൂണ്ടിക്കാട്ടി എക്സിക്യൂട്ടീവ് അംഗങ്ങള് ചിലര് സംസാരിച്ചപ്പോള് മടങ്ങി വരവിനെക്കുറിച്ച് അനുകൂല മറുപടി ലഭിച്ചതായും വിവരമുണ്ട്.
അതേസമയം സംഘടനയ്ക്കകത്തും വനിതാ സംഘടനയായ ഡബ്ല്യൂസിസിയുമായും മുറുമുറുപ്പ് രൂക്ഷമായ സമയത്തും നടി മഞ്ജു വാര്യരുടെ മൗനവും ചോദ്യമായി ഉയര്ന്നിരുന്നു. തുടക്കത്തില് മുന്നില് നിന്നിരുന്ന മഞ്ജു വാര്യര് പിന്നീട് ഡബ്ല്യൂസിസിയുടെ പ്രവര്ത്തനങ്ങളില് നിന്ന് വിട്ടു നില്ക്കുന്നത് അവര് അമ്മയ്ക്കൊപ്പമുണ്ടെന്ന സൂചന പുറത്ത് നല്കാന് കഴിഞ്ഞതായും ഇത് താരസംഘടനയുടെ മുഖംമിനുക്കാന് കാരണമായതായും വിലയിരുത്തുന്നു. എന്നാല് ആക്രമിക്കപ്പെട്ട നടിയോടൊപ്പം രാജിവെച്ച ഗീതുമോഹന്ദാസിന്റെയും റിമ കല്ലിങ്കലിന്റെയും, രമ്യ നമ്പീശന്റെയും കാര്യത്തില് ഇവര് തിരിച്ചുവരണമെന്ന താത്പര്യം അറിയിച്ചാല് മാത്രം പരിഗണിക്കുമെന്നാണ് വിവരം