ഒ.സി.ഐ നിയമം കര്ശനമാക്കി, സര്ട്ടിഫിക്കറ്റ് നിലവിലുള്ള പാസ്പോര്ട്ടിലേക്ക് മാറ്റാത്തവരെ മടക്കി അയക്കുന്നു
ലണ്ടന് : 20 വയസിനു താഴെയും 50-നു മുകളിലും പ്രായമുള്ളവര് ഓവര്സീസ് സിറ്റിസണ് ഓഫ് ഇന്ത്യ (ഒ.സി.ഐ) സര്ട്ടിഫിക്കറ്റ് നിലവിലുള്ള പാസ്പോര്ട്ടിലേക്ക് മാറ്റിയിട്ടില്ലെങ്കില് യാത്ര ചെയ്യാനാവില്ല-കേരള കൗമുദിയുടെ റിപ്പോര്ട്ടില് പറയുന്നു. ഇന്ത്യയിലേക്ക് വിസ കൂടാതെ യാത്ര ചെയ്യാനുള്ള ഒ.സി.ഐ നിയമം കര്ശനമായി നടപ്പാക്കുമെന്ന് ഇന്ത്യന് ഹൈക്കമ്മിഷന് നേരത്തെ അറിയിച്ചിരുന്നു.
പുതിയ പാസ്പോര്ട്ടിലേക്ക് ഒ.സി.ഐ സര്ട്ടിഫിക്കറ്റ് മാറ്റാത്തതിനാല് ഇന്ന് എയര്പോര്ട്ടിലെത്തിയവരെ എമിരെറ്റസ് എയര്ലൈന്സ് മടക്കി അയച്ചു. ഒ.സി.ഐയും പഴയ പാസ്പോര്ട്ടും ഉണ്ടായിരുന്നിട്ടും മടക്കി അയക്കുകയായിരുന്നു.
'ഇന്ത്യന് ഹൈക്കമ്മിഷന് അറിയിപ്പനുസരിച്ച് പുതിയ പാസ്പോര്ട്ടിലേക്ക് ഒ.സി.ഐ മാറ്റാന് സമയമുണ്ടായിരുന്നില്ല, അതുകൊണ്ടാണ് ഇതിനു മുന്പ് യാത്രയ്ക്കെത്തിയത് പോലെ വന്നത് ' എന്ന് യാത്രക്കാരന് കേരളകൗമുദിയോടു പറഞ്ഞു. യാത്രക്കാര്ക്ക് സമയം അനുവദിക്കാതെ പരിഷ്ക്കാരങ്ങള് വരുത്തുമ്പോള് വലിയ ബുദ്ധിമുട്ടുകളാണ് അനുഭവിക്കേണ്ടി വരുന്നത്. ഈ പ്രശ്നം ഇന്ത്യന് ഹൈക്കമ്മിഷന് മനസിലാക്കണമെന്നും പ്രവാസികള് ആവശ്യപ്പെട്ടു.
പുതിയ നിര്ദേശം എന്തെന്നു റിപ്പോര്ട്ടില് നിന്നു വ്യക്തമല്ല. ഒ.സി.ഐ. നിയമ പ്രകാരം 20 വയസു കഴിയുമ്പോഴും 50 കഴിയുമ്പോഴും ഒ.സി.ഐ. കാര്ഡ് പുതുക്കേണ്ടതുണ്ട്.ആളുകളുടെ മുഖവും മറ്റും മാറും എന്നതാണു ന്യായം. 50 വയസ് കഴിഞ്ഞ് ആണു ഒസി.ഐ. എടുക്കുന്നതെങ്കില് പിന്നെ മാറ്റേണ്ടതില്ല. പുതുക്കുക എന്നാല് ആദ്യം മുതല് വീണ്ടും അപേക്ഷിക്കുക എന്നതാണു സ്ഥിതി. അതും പ്രവാസികളെ ഉപദ്രവിക്കാനുള്ള ഒരു ചട്ടമാണെന്നു ചൂണ്ടിക്കാട്ടിയിട്ടും മാറ്റം വന്നിട്ടില്ല.
ഒ.സി.ഐ. പുതുക്കാത്തതാണോ പ്രശ്നം ഇവിടെ എന്നു വ്യക്തമല്ല. അമേരിക്കയില് ഈ പ്രശ്നം ഇതു വരെ നേരിട്ടതായും അറിവില്ല.
ഒ.സി.ഐ.ഇല്ലെങ്കില് കൂടി വിസ ഓണ് അറൈവല് പ്രകാരം ഇന്ത്യയില് ചെന്നു വിസ എടുക്കാം. അപ്പോള് എയര്ലൈന്സ് തിരിച്ചു വിട്ടതിന്റെ കാരണവും വ്യക്തമല്ല.