കേരളത്തിലെ കാര്ഷികോത്പന്നങ്ങളുടെ മൂല്യവര്ധിത സാധ്യതകള് പ്രവാസികളുടെ സഹായത്തോടെ പ്രയോജനപ്പെടുത്താന് സര്ക്കാര് സന്നദ്ധമാണെന്ന് കൃഷിമന്ത്രി വി.എസ്. സുനില്കുമാര്. ലോക കേരള സഭയുടെ ഭാഗമായ ഉപസമ്മേളനത്തില് സംസാരിക്കുകയായിരുന്നു അദ്ദേഹം.
വിദേശത്ത് ദീര്ഘകാലം ചെലവഴിച്ച പ്രവാസികളുടെ അറിവും നിക്ഷേപവും പുത്തന് ടെക്നോളജികളും ഉപയോഗിച്ച് കാര്ഷിക മേഖലയില് എന്ത് ചെയ്യാനാകുമെന്നത് ഗൗരവമായി ആലോചിക്കുകയാണ്. മൂല്യവര്ധിത സാധ്യതകള് ചര്ച്ച ചെയ്യാന് വൈഗ എന്ന പേരില് നടത്തുന്ന സമ്മേളനത്തില് പ്രവാസികളെ ക്ഷണിച്ച് നിര്ദ്ദേശങ്ങള് സ്വീകരിക്കുകയും തുടര് നടപടികള് കൈക്കൊള്ളുകയും ചെയ്യും. ംംം.ളെമരസലൃമഹമ.ീൃഴ എന്ന വെബ്സൈറ്റില് വൈഗയെക്കുറിച്ചുള്ള വിവരങ്ങള് ലഭ്യമാകും. കാര്ഷികസംരംഭങ്ങള്ക്ക് വായ്പ ലഭ്യമാക്കുന്നതിന് ബാങ്കുകളെ വൈഗയിലേക്ക് ക്ഷണിച്ച് ചര്ച്ച നടത്തും.
ചക്ക, തേങ്ങ, തേന്, ഏത്തന്പഴം തുടങ്ങി കേരളത്തില് സുലഭമായി ലഭിക്കുന്ന തനത് കാര്ഷികോത്പന്നങ്ങളെ മൂല്യവര്ധിതോതോപ്ന്നങ്ങളാക്കാവുന്ന ടെക്നോളജി ഇവിടെയുണ്ട്. ഇത് പ്രവാസികള്ക്ക് ലഭ്യമാക്കാന് സര്ക്കാരിന് കഴിയും. നാളികേരത്തിലെ നിക്ഷേപ സാധ്യതകളും പഠിക്കും. സംസ്ഥാനത്തെ കാര്ഷികോത്പന്നങ്ങളുടെ വിപണനത്തിന് കേരള ഓര്ഗാനിക് എന്ന ബ്രാന്ഡ് നിലവിലുണ്ട്. ഇത് ലോകവിപണിയിലെത്തിക്കുന്നതിനുള്ള നടപടി പ്രവാസികളുടെ കൂടി സഹായത്തോടെ സ്വീകരിക്കാനാകും. കൃഷിക്കു വേണ്ട പരിശീലനം, സാങ്കേതികവിദ്യ, സബ്സിഡി, പ്രോജക്ട് തയ്യാറാക്കുന്നതിലെ സഹായം തുടങ്ങിയവയും ലഭ്യമാക്കാം. സാധാരണക്കാരായ പ്രവാസികള്ക്കും ചെറിയ നിക്ഷേപത്തിലൂടെ വലിയ മാറ്റമുണ്ടാക്കാന് കഴിയുന്ന സുരക്ഷിത മേഖലയാണ് കൃഷിയെന്നും മന്ത്രി പറഞ്ഞു.
മത്സ്യകൃഷിയിലെ പ്രവാസികളുടെ നിക്ഷേപ സാധ്യത വലുതാണെന്ന് ഫിഷറീസ് മന്ത്രി മേഴ്സിക്കുട്ടി അമ്മ പറഞ്ഞു. കൊച്ചിയില് ലഭ്യമായിട്ടുള്ള പ്രദേശത്ത് വന്കിട മത്സ്യകൃഷിക്ക് പ്രത്യേക ഇടം ലഭ്യമാക്കാന് കഴിയും. ഇവിടെ പ്രവാസികള്ക്ക് നിക്ഷേപം നടത്താനും അവസരമുണ്ടാകും. കേരളത്തിലെ കശുവണ്ടിക്ക് ലോകവിപണിയില് വലിയ പ്രിയമുണ്ട്. സ്വാദും ഗുണനിലവാരവും ദീര്കാലം കേടുകൂടാതെയിരിക്കുന്നതുമാണ് അതിന് കാരണം. പുറത്തു നിന്ന് ലഭിക്കുന്ന അസംസ്കൃത അണ്ടിയുടെ കുറവ് ഈ രംഗത്ത് ഭീഷണി ഉയര്ത്തുന്നുണ്ട്.
റിപ്പോര്ട്ട് : ശ്രീകുമാര്