പ്രധാനമന്ത്രി നരേന്ദ്ര മോദി ധ്യാനിക്കാന്‍ തെരഞ്ഞെടുത്ത ഉത്തരാഖണ്ഡിലെ കേദാര്‍നാഥ്‌ ഗുഹ വാടകയ്‌ക്ക്‌ ലഭിക്കും. പുതുതലമുറ സൗകര്യങ്ങള്‍ മുഴുവനുള്ള ഗുഹയ്‌ക്ക്‌ വെറും 990 രൂപയാണ്‌ ദിവസ വാടകയെന്നും ഇംഗ്ലീഷ്‌ ദിനപത്രം ഹിന്ദുസ്ഥാന്‍ ടൈംസ്‌ റിപ്പോര്‍ട്ട്‌ ചെയ്യുന്നു.

സത്യത്തില്‍ കേദാര്‍നാഥ്‌ പ്രളയത്തിന്‌ ശേഷം മോദി സര്‍ക്കാര്‍ ആരംഭിച്ച ഒരു പദ്ധതികളില്‍ ഒന്നാണ്‌ ഈ ധ്യാന ടൂറിസം. കഴിഞ്ഞ വര്‍ഷമാണ്‌ ഈ ഗുഹകള്‍ ഇങ്ങനെ നവീകരിച്ചത്‌. ഗര്‍വാല്‍ മണ്ഡല്‍ വികാസ്‌ നിഗം ആണ്‌ ഗുഹ പദ്ധതിയുടെ പിന്നില്‍. രുദ്ര മെഡിറ്റേഷന്‍ കേവ്‌ എന്നാണ്‌ മോദി ധ്യാനിക്കാന്‍ പോയ ഗുഹയുടെ പേര്‌.

ആദ്യം 3000 രൂപയ്‌ക്കാണ്‌ ഗുഹയുടെ വാടക നിശ്ചയിച്ചിരുന്നത്‌. അതിഥികള്‍ എത്താതിരുന്നത്‌ കൊണ്ട്‌ ഗുഹയുടെ വാടക കുറയ്‌ക്കാന്‍ തീരുമാനിക്കുകയായിരുന്നു. അത്‌ മാത്രമല്ല ഗുഹ, കുറഞ്ഞത്‌ മൂന്ന്‌ ദിവസമെങ്കിലും ബുക്ക്‌ ചെയ്യണം എന്നതായിരുന്നു നേരത്തെ ഉണ്ടായിരുന്ന വ്യവസ്ഥ.

ടോയ്‌ലറ്റ്‌, കുടിവെള്ളം, വൈദ്യുതി സംവിധാനങ്ങള്‍ക്കൊപ്പം മൂന്നുനേരം ഭക്ഷണവും ലഭിക്കും. 24 മണിക്കൂറും സേവന സജ്ജരായി അറ്റന്‍ഡര്‍മാരും ഉണ്ടാകും എന്നതാണ്‌ പ്രത്യേകത.