ജമ്മു: കാഷ്മീര് അതിര്ത്തിയില് നിന്നും പാക്കിസ്ഥാനിലേക്ക് നിര്മിച്ച ടണല് കണ്ടെത്തി. അതിര്ത്തിയോട് ചേര്ന്നുള്ള സാംബ സെക്ടറിലാണ് ടണല് കണ്ടെത്തിയത്. ടണലില് വായുസഞ്ചാരം ഉറപ്പിക്കാന് വേണ്ടി പൈപ്പും ഇട്ടിട്ടുണ്ട്. ടണല് ഇപ്പോള് ഉപയോഗിക്കുന്നതാണോയെന്ന കാര്യം സ്ഥിരീകരിച്ചിട്ടില്ല. കഴിഞ്ഞ ദിവസം രാത്രി പട്രോളിംഗിനിറങ്ങിയ ബിഎസ്എഫ് സംഘമാണ് ഇത് കണ്ടെത്തിയത്.
ബിഎസ്എഫ് പോസ്റ്റിന് സമീപത്തായിരുന്നു ഇത്. ഉപരിതലത്തിലെ മണ്ണിന് ഇളക്കം തട്ടിയത് ശ്രദ്ധയില്പെട്ട സുരക്ഷാസേന മഴയില് വെള്ളം വീണുണ്ടായ കിടങ്ങാണെന്നാണ് ആദ്യം കരുതിയതെങ്കിലും കൂടുതല് ഉപകരണങ്ങളെത്തിച്ച് നടത്തിയ വിശദമായ പരിശോധനയില് പാക്കിസ്ഥാനിലേക്കുള്ള ടണല് ആണെന്ന് ബോധ്യപ്പെടുകയായിരുന്നു. 12 അടിയോളം കുഴിച്ച ശേഷമാണ് പാക്കിസ്ഥാനിലേക്കുള്ള ടണല് കണ്ടെത്തിയത്.