ഡല്‍ഹി: വഖഫ് നിയമ ഭേദഗതിക്കെതിരായ പ്രതിഷേധം അക്രമാസക്തമായ മുര്‍ഷിദാബാദിലേക്ക് കേന്ദ്ര സേനയെത്തും. മുര്‍ഷിദാബാദിലെ സംഘര്‍ഷ സാഹചര്യം വിലയിരുത്തിയ കേന്ദ്ര ആഭ്യന്തരമന്ത്രാലയം അഞ്ചു കമ്പനി ബിഎസ്എഫ് സേനയെ ഇവിടെ വിന്യസിക്കാന്‍ തീരുമാനിച്ചു. മേഖലയിലെ സ്ഥിതി സാധാരണ നിലയിലേക്ക് എത്തിക്കാന്‍ സംസ്ഥാന സര്‍ക്കാരിന് എല്ലാവിധ പിന്തുണയും നല്‍കുമെന്ന് കേന്ദ്രസര്‍ക്കാര്‍ വ്യക്തമാക്കി. പശ്ചിമ ബംഗാള്‍ ചീഫ് സെക്രട്ടറി, ഡിജിപി എന്നിവരുമായി കേന്ദ്ര ആഭ്യന്തര സെക്രട്ടറി വീഡിയോ കോണ്‍ഫറന്‍സ് വഴി സംസാരിച്ചു.

കേന്ദ്രസേനയെ വിന്യസിക്കാന്‍ കൊല്‍ക്കത്ത ഹൈക്കോടതിയാണ് ഉത്തരവിട്ടത്. പ്രതിപക്ഷ നേതാവ് സുവേന്ദു അധികാരിയുടെ ഹര്‍ജിയിലാണ് കോടതി ഈ തീരുമാനമെടുത്തത്. വഖഫ് നിയമഭേദഗതി പാര്‍ലമെന്റ് പാസാക്കിയതിന് പിന്നാലെ മുര്‍ഷിദാബാദില്‍ നടന്ന പ്രതിഷേധമാണ് സംഘര്‍ഷത്തിന് തുടക്കമിട്ടത്. നിയമം പാസാക്കി ഒരാഴ്ച്ച പിന്നിടുമ്പോഴും വ്യാപക അക്രമമാണ് മുര്‍ഷിദാബാദിലെ പല പ്രദേശങ്ങളിലും നടക്കുന്നത്.