വ്യാപാര യുദ്ധം മുറുകുന്നതിനിടയിൽ ചൈന നിർണായകമായ ഒട്ടനവധി മിനറലുകളും മാഗ്നറ്റുകളും കയറ്റുമതി ചെയ്യുന്നത് നിർത്തി വച്ചു. വാഹന നിർമാതാക്കൾ, എയ്‌റോസ്‌പേസ് നിർമാതാക്കൾ, സെമി കണ്ടക്‌ടർ കമ്പനികൾ, മിലിറ്ററി കോൺട്രാക്ടർമാർ എന്നിവരെ ഇതു നേരിട്ടു ബാധിക്കും.

കാറുകൾ മുതൽ ഡ്രോണുകളും റോബട്ടുകളും മിസൈലുകളും വരെ നിർമിക്കുന്നതിൽ സുപ്രധാന ഘടകമാണ് മാഗ്നറ്റ്. ചൈനയുടെ പല തുറമുഖങ്ങളിലും ഇവയുടെ കയറ്റുമതി നിർത്തി വച്ചതായി 'ന്യൂ യോർക്ക് ടൈംസ്' റിപ്പോർട്ടിൽ പറയുന്നു.

പ്രസിഡന്റ് ട്രംപ് ചൈനയിൽ നിന്നുള്ള ഇറക്കുമതിക്കു തീരുവ 145% വരെ ഉയർത്തിയപ്പോൾ 125% വരെ കൂട്ടി നിർത്തിവച്ച ചൈന അതു കൊണ്ടു നിർത്തുന്നു എന്ന് പറഞ്ഞിരുന്നു. ചർച്ചയ്ക്കും തയ്യാറില്ല എന്നാണ് ചൈനയുടെ നിലപാട്. എന്നാൽ ഈ കയറ്റുമതി നിരോധനം വ്യാപാര യുദ്ധത്തിൽ പുതിയൊരു ആയുധമാവുന്നു. അമേരിക്കൻ മിലിറ്ററി കോൺട്രാക്ടർമാരെയും ഇത് ബാധിക്കും എന്നതാണ് ശ്രദ്ധിക്കേണ്ടത്.

പ്രത്യേക ലൈസൻസ് നൽകുന്ന സംവിധാനം ഇല്ല

ആറു റെയർ ഏർത് മെറ്റലുകൾ കയറ്റുമതി ചെയ്യുന്നത് ഏപ്രിൽ 4 മുതൽ ചൈന നിർത്തിയിരുന്നു. ഇവ ചൈനയിൽ മാത്രം റിഫൈൻ ചെയ്യുന്നതാണ്. കയറ്റുമതി നിരോധിച്ച റെയർ ഏർത് മാഗ്നറ്റ് ആവട്ടെ, 90 ശതമാനവും ചൈനയിൽ ഉത്പാദിപ്പിക്കുന്നതാണ്. ഈ മെറ്റലുകളും അവ കൊണ്ട് നിർമിക്കുന്ന സ്പെഷ്യൽ മാഗ്നറ്റുകളും ഇനി ചൈനയിൽ നിന്നു കയറ്റുമതി ചെയ്യണമെങ്കിൽ പ്രത്യേക കയറ്റുമതി ലൈസൻസ് വേണം.

എന്നാൽ അങ്ങിനെ ലൈസൻസ് നൽകുന്ന സംവിധാനം ചൈനയിൽ ഇല്ല. അതു കൊണ്ടു ഈ ഉത്പന്നങ്ങൾ ലഭിക്കാതെ വരുമെന്ന ആശങ്ക നിർമാതാക്കൾക്കിടയിൽ ഉയർന്നു.  

ഇലക്ട്രിക്ക് മോട്ടോറുകൾക്കും നിർണായകമായ റെയർ ഏർത് മെറ്റലുകൾ കിട്ടാതെ വന്നാൽ ഒട്ടേറെ ഇലക്ട്രിക് ഉപകരണങ്ങളുടെ നിർമാണത്തെ ബാധിക്കും. ഇലക്ട്രിക്ക് കാറുകൾ, ഡ്രോണുകൾ, മിസൈലുകൾ, സ്‌പേസ്ക്രാഫ്റ്റ് എന്നിവയൊക്കെ നിർമിക്കാൻ ഇവ ആവശ്യമാണ്.

യുഎസുമായി കരാറിനു ചർച്ച നടത്താൻ ചൈനീസ് പ്രസിഡന്റ് ഷി ജിൻപിങ് തയാറായിട്ടില്ല. അത് അനാദരവായി കണ്ടു തീരുവ കൂട്ടുക എന്നതാണ് ട്രംപിന്റെ നയം. യുഎസ്, ചൈനീസ് സമ്പദ്‌വ്യവസ്ഥകൾ ഏറെ കെട്ടുപിണഞ്ഞു കിടക്കുന്നതു കൊണ്ട് ഈ പ്രതിസന്ധി ഏറെ നീട്ടിക്കൊണ്ടു പോകാനും വയ്യ.  

China halts export of critical minerals, magnets