ഫിഷറീസ് വകുപ്പ് മന്ത്രി സജി ചെറിയാനെതിരെ രൂക്ഷ വിമർശനവുമായി കേരള സ്വതന്ത്ര മത്സ്യത്തൊഴിലാളി ഫെഡറേഷൻ രംഗത്ത്. സജി ചെറിയാൻ മനസാക്ഷിയില്ലാത്ത മന്ത്രിയാണെന്ന് ഫെഡറേഷൻ ആരോപിച്ചു. പ്രളയകാലത്ത് ചെങ്ങന്നൂരിൽ മത്സ്യത്തൊഴിലാളികൾ ജീവൻ പണയം വെച്ച് സഹായം നൽകിയത് മന്ത്രി ഓർക്കണം. അവരുടെ സഹായം കൊണ്ടാണ് സജി ചെറിയാൻ മന്ത്രിയായത്. എന്നാൽ ഇപ്പോൾ തങ്ങളുടെ ആവശ്യങ്ങൾ അറിയിച്ചപ്പോൾ മന്ത്രി തിരിഞ്ഞുനോക്കുന്നില്ലെന്നും ഫെഡറേഷൻ കുറ്റപ്പെടുത്തി.

മുതലപ്പൊഴിയിലെ മണൽ അടിഞ്ഞുകൂടിയ പ്രശ്നം നാലുദിവസത്തിനകം പരിഹരിക്കാമെന്ന് മന്ത്രി ഉറപ്പുനൽകിയിരുന്നു. എന്നാൽ ഡ്രഡ്ജിംഗ് നടപടികൾ ഇപ്പോഴും മന്ദഗതിയിലാണ്. വോട്ട് ചെയ്ത് അധികാരത്തിലെത്തിച്ചത് അദാനിയെയല്ല, സജി ചെറിയാനെയാണെന്ന് ഫെഡറേഷൻ ഓർമ്മിപ്പിച്ചു. അഴിമുഖം പൂർണ്ണമായും അടഞ്ഞതോടെ ആയിരക്കണക്കിന് മത്സ്യത്തൊഴിലാളികളുടെ ജീവിതം വഴിമുട്ടിയിരിക്കുകയാണ്. ഇതിന് മന്ത്രി ഉടൻ പരിഹാരം കാണണം. എന്ത് ചോദിച്ചാലും അദാനിയാണ് ചെയ്യേണ്ടതെന്ന മറുപടി ഇനി അംഗീകരിക്കില്ല. അടിയന്തര നടപടി ഉണ്ടായില്ലെങ്കിൽ മുതലപ്പൊഴിയിലെ ജനങ്ങൾ മറ്റ് വഴികൾ തേടാൻ നിർബന്ധിതരാകുമെന്നും ഫെഡറേഷൻ മുന്നറിയിപ്പ് നൽകി.

മുതലപ്പൊഴിയിലെ മണൽ നീക്കം വൈകുന്നതിനാൽ മത്സ്യത്തൊഴിലാളികൾ തൊട്ടടുത്തുള്ള മരിയനാട്, പുതുക്കുറിച്ചി, അഞ്ചുതെങ്ങ് തുടങ്ങിയ മത്സ്യബന്ധന മേഖലകളിലേക്ക് പലായനം ചെയ്യുകയാണ്.

English summery:

Saji Cherian is a minister without a conscience; strong criticism from the Fishermen's Federation.