വാഷിംഗ്‌ടൺ: പ്രസിഡന്റ് ഡൊണാൾഡ് ട്രംപിന്റെ താരിഫ് നയങ്ങൾക്കെതിരെ ശക്തമായ ആക്രമണം നടത്തി, റെപ്. റോ ഖന്ന (ഡെമോക്രാറ്റ്-കലിഫോർണിയ). നിർമ്മാണ ജോലികൾ അമേരിക്കയിലേക്ക് തിരികെ കൊണ്ടുവരുന്നതിനു പകരം അമേരിക്കൻ ഇലക്ട്രോണിക്‌സ് വിലകൾ ഉയർത്തുമെന്നു ഖന്ന ചൂണ്ടിക്കാട്ടി. സമ്പദ്‌ വ്യവസ്ഥയെക്കുറിച്ച് 21-ാം നൂറ്റാണ്ടിലെ ഒരു ധാരണ ഉണ്ടായിരിക്കണമെന്നും ഞായറാഴ്ച സിബിഎസിന്റെ "ഫേസ് ദി നേഷൻ" എന്ന പരിപാടിയിൽ പങ്കെടുത്തു അദ്ദേഹം മുന്നറിയിപ്പ് നൽകി.

ട്രംപ് ഭരണകൂടത്തിന്റെ സംരക്ഷണവാദ വ്യാപാര സമീപനത്തെയും പ്രസിഡന്റ് വില്യം മക്കിൻലിയോടുള്ള അദ്ദേഹത്തിന്റെ ആരാധനയെയും പരാമർശിച്ചു കൊണ്ട്,  ട്രംപിന്റെ താരിഫ് നയത്തെ വിമർശിക്കുന്നവർ വാദിക്കുന്നത് മക്കിൻലിയുടെ 19-ാം നൂറ്റാണ്ടിലെ അമേരിക്കയുടെ പാഠങ്ങൾ ഇന്ന് ബാധകമല്ല എന്നാണ്.

കഴിഞ്ഞയാഴ്ച വ്യാപകമായ ആഗോള താരിഫ് പ്രഖ്യാപനത്തെത്തുടർന്ന് സാമ്പത്തിക വിപണികൾ കുഴപ്പത്തിലായി. അപ്പോൾ സ്മാർട്ട്‌ ഫോണുകളെയും കമ്പ്യൂട്ടറുകളെയും താരിഫ് ഭരണത്തിൽ നിന്ന് ഒഴിവാക്കാനുള്ള ട്രംപ് ഭരണകൂടത്തിന്റെ തീരുമാനത്തിലേക്ക് വിരൽ ചൂണ്ടിക്കൊണ്ട്, ആഭ്യന്തര ഉൽപ്പാദനം പുനരുജ്ജീവിപ്പിക്കാനുള്ള വൈറ്റ് ഹൗസിന്റെ പദ്ധതി ഇതിനകം തന്നെ പൊളിയുകയാണെന്ന് ഖന്ന പറഞ്ഞു.

"ഞങ്ങൾ അമേരിക്കയിലേക്ക് ഉൽപ്പാദനവും ഇലക്ട്രോണിക്സ് നിർമ്മാണവും തിരികെ കൊണ്ടുവരുമെന്ന് അവർ പറഞ്ഞു, പക്ഷെ അത് സംഭവിക്കാൻ പോകുന്നില്ലെന്ന് അവർ പെട്ടെന്ന് മനസ്സിലാക്കി.

"യഥാർത്ഥത്തിൽ, ഐഫോണിന്റെ വില 2,000 ഡോളർ വരെ ഉയരും," അദ്ദേഹം തുടർന്നു. "അത് മലേഷ്യയിലേക്കോ വിയറ്റ്നാമിലേക്കോ മാറാൻ സാധ്യതയുമുണ്ട്."

"യുഎസ് ചൈനയുമായി മത്സരിക്കാനും നൂതന ഉൽപ്പാദനം പുനർനിർമ്മിക്കാനും ആഗ്രഹിക്കുന്നുവെങ്കിൽ, അതിന് നിക്ഷേപം ആവശ്യമാണ് -- താരിഫുകളല്ല," സിലിക്കൺ വാലി ഉൾപ്പെടുന്ന ജില്ലയിൽ താമസിക്കുന്ന ഖന്ന വാദിച്ചു.

വൈസ് പ്രസിഡന്റ് ജെ ഡി വാൻസിന്റെ സ്വന്തം സംസ്ഥാനമായ ഒഹായോയിൽ തിങ്കളാഴ്ച അദ്ദേഹം നടത്തുമെന്ന് പ്രതീക്ഷിക്കുന്ന ഒരു പ്രസംഗത്തിന് മുന്നോടിയായാണ് ഖന്നയുടെ പരാമർശങ്ങൾ.

Ro Khanna attacks Trump tariff policy