മെരിലാന്ഡ്: ഫൊക്കാന കണ്വന്ഷന് സമാപന വേദിയില് പുതിയ പ്രസിഡന്റ് സജിമോന് ആന്റണി, സെക്രട്ടറി ശ്രീകുമാർ ഉണ്ണിത്താൻ, ട്രഷറർ ജോയ് ചാക്കപ്പൻ, മറ്റ് ടീമംഗങ്ങൾ എന്നിവർ സത്യപ്രതിജ്ഞ ചെയ്ത് അധികാരമേറ്റു. ഇലക്ഷന് കമ്മിറ്റി ചെയര്മാന് ഫിലിപ്പോസ് ഫിലിപ്പ് സത്യവാചകം ചൊല്ലിക്കൊടുത്തു.
അധികാരമേറ്റ ശേഷം ചെയ്ത ഹ്രസ്വ പ്രസംഗത്തില് ചെറിയ സ്വപ്നങ്ങള് കാണേണ്ട സംഘടനയല്ല ഫൊക്കാന എന്നു പറഞ്ഞാണ് തങ്ങള് ഡ്രീം ടീമിന് രൂപം കൊടുത്തതെന്ന് സജിമോന് ആന്റണി അനുസ്മരിച്ചു .
ഇലക്ഷനില് ശക്തമായ മത്സരം കാഴ്ചവെച്ച രണ്ട് എതിര് ടീമുകള്ക്കും നന്ദി പറയുന്നു. ലോകത്തില് മാറ്റം ഒഴിച്ച് മറ്റൊന്നും സ്ഥിരമല്ല. ഒരാള്ക്ക് തനിച്ച് വലിയ കാര്യങ്ങള് പറ്റിയില്ലെന്ന് വരാം. എന്നാല് ജലാശയത്തില് വന്ന് വീഴുന്ന കല്ല് ഓളങ്ങള് ഉണ്ടാക്കുന്നു.
ബാബു സ്റ്റീഫന് നേതൃത്വമേറ്റ 2022-ല് ഫൊക്കാനയ്ക്ക് വലിയ മാറ്റമുണ്ടായി. ഇനിയും അത് ആവര്ത്തിക്കും.
ഞങ്ങൾക്കെതിരെ മത്സരിച്ചവരെ ഞങ്ങള് അംഗീകരിക്കും. ഞങ്ങളേയും അംഗീകരിക്കണമെന്നഭ്യര്ത്ഥിക്കുന്നു. 'ടീം ലഗസി'യുടെ ഭാഗമായിരുന്ന എല്ലാവരോടും അഭിനന്ദനവും സ്നേഹവും അറിയിക്കുന്നു. നമുക്ക് ഒരുമിച്ച് പ്രവര്ത്തിക്കാം.
ഇലക്ഷന് കമ്മിറ്റി ചെയര് ഫിലിപ്പോസ് ഫിലിപ്പിന്റെ പ്രസംഗത്തില് പ്രസിഡന്റ് ബാബു സ്റ്റീഫന്റെ കര്മ്മശേഷികൊണ്ടാണ് കണ്വന്ഷനും ഇലക്ഷനും ഇത്ര ഭംഗിയായി പോയതെന്ന് ചൂണ്ടിക്കാട്ടി. ഇത്രയും ആളുകള് പങ്കെടുക്കുന്ന ഇലക്ഷന് മുമ്പുണ്ടായിട്ടില്ല. 557 പേര് വോട്ട് ചെയ്തു.
നീതിപൂര്വ്വവും സുതാര്യവുമായാണ് ഇലക്ഷന് നടന്നത്. അതിന് സഹകരിച്ച എല്ലാവർക്കും അദ്ദേഹം നന്ദി പറഞ്ഞു .
കണ്വന്ഷന് ചെയര് ജോണ്സണ് തങ്കച്ചന് സ്വാഗതവും ട്രഷറര് ബിജു ജോണ് കൊട്ടാരക്കര നന്ദിയും പറഞ്ഞു.