ന്യു യോര്ക്ക്: ഫൊക്കാന വൈസ് പ്രസിഡന്റ് ഏബ്രഹാം കളത്തിലിനെ സസ്പെന്ഡ് ചെയ്തതിനെച്ചൊല്ലി ഫൊക്കാനയില് രണ്ടഭിപ്രായം.
രണ്ടു വ്യക്തികള് തമ്മിലുള്ള പ്രശ്നത്തില് ഫൊക്കാന ഇടപെടുന്നതില് അര്ഥമില്ലെന്നു ഒരു വിഭാഗം ചൂണ്ടിക്കാണിക്കുന്നു. എന്നാല് ഫൊക്കാന നാഷനല് കമ്മിറ്റിയിലുള്ളവരാണു ഇതിലെ കക്ഷികളെന്നു എതിര്വിഭാഗം ചൂണ്ടിക്കാട്ടുന്നു. ഒരു തവണയല്ല പ്രശ്നം ഉണ്ടാകുന്നത്.
ഇതു സംബന്ധിച്ച് അന്വേഷണം നടത്താന് ഒരു അഞ്ചംഗ കമ്മിറ്റിയെ നിയോഗിച്ചിട്ടുണ്ട്. പ്രസിഡന്റ് മാധവന് നായര്, സെക്രട്ടറി ടോമി കോക്കാട്ട്, ട്രസ്റ്റി ബോര്ഡ് ചെയര് മാമ്മന് സി. ജേക്കബ്, സെക്രട്ടറി വിനോദ് കെയാര്കെ, ഫിലിപ്പോസ് ഫിലിപ്പ് എന്നിവരാണു കമ്മിറ്റിയില്.
മാര്ച്ച്-7-നു ന്യു യോര്ക്കിലെ ടൈസണ് സെന്ററില് ജനറല് ബോഡി ചേരുന്നുണ്ട്. അതിനു മുന്പ് കമ്മിറ്റി തീരുമാനമെടുക്കുമോ എന്നു വ്യക്തമല്ല. ഏതായാലും ഈ വിഷയം ജനറല് ബോഡിയില് വന്നാല് അത് രൂക്ഷമായ ചര്ച്ചകള്ക്ക് കാരണമാവുമെന്നുറപ്പ്.
ഫൊക്കാനയുടെ മികവിനു കാരണം ഏതാനും പേരുടെ പ്രവര്ത്തനങ്ങളാണെന്ന് ചിക്കാഗോയില് നിന്നുള്ള നാഷണല് കമിറ്റി അംഗം പ്രവീണ് തോമസ് പറഞ്ഞതിനെച്ചൊല്ലി ആയിരുന്നു തര്ക്കം ആരംഭിച്ചത്. ഇത് ഫ്ലോറിഡയില് നിന്നുള്ള ഏബ്രഹാം കളത്തില് ചോദ്യം ചെയ്തു. പിന്നീടത് വാഗ്വാദത്തിനു വഴിതെളിച്ചു.
മീറ്റിംഗ് കഴിഞ്ഞ ശേഷവും ഇരുവരും തമ്മില് ഇതേച്ചൊല്ലി ഫോണില് തര്ക്കം തുടര്ന്നു. പ്രവീണിന്റെ ഭാര്യയേയും കുഞ്ഞിനെയും ഭീഷണിപ്പെടുത്തിയെന്നും പറയുന്നു. എന്തായാലും മേലില് ബന്ധപ്പെടരുതെന്നു പോലീസ് എബ്രഹാമിനു മുന്നറിയിപ്പ് നല്കി. എന്നാല് തന്നോടു പറഞ്ഞതിനു അര്ഹമായ മറുപടി പറയുക മാത്രമേ ഉണ്ടായിട്ടുള്ളു എന്നു ഏബ്രഹാം പറഞ്ഞു.
സസ്പന്ഷന് കാര്യത്തില് നിയമ നടപടികളുമായി മുന്നോട്ടു പോകും. സംസാരിച്ചു തീരാവുന്ന പ്രശ്നം വഷളാക്കുകയായിരുന്നെന്നു എബ്രഹാം പറയുന്നു.
വിഷയം നാഷണല് കമ്മിറ്റി ട്രസ്റ്റി ബോര്ഡിനു വിടുകയായിരുന്നു. ട്രസ്റ്റി ബോര്ഡ് ചെയര് മാമ്മന് സി. ജേക്കബ് ആണു സസ്പെന്ഷന് ഉത്തരവിട്ടത്. എന്നാല് ബോര്ഡിലെ 9 അംഗങ്ങളില് 5 പേര് സസ്പെന്ഷനു എതിരായിരുന്നുവെന്നു ഒരു വിഭാഗം അറിയിച്ചു. ഇക്കാര്യത്തിലൊന്നും പ്രതികാരിക്കാനില്ലെന്നു മാമ്മന് സി ജേക്കബ് പറഞ്ഞു
കണ് വന്ഷന് അടുത്തു വരുമ്പോള് ഇത്തരമൊരു സംഭവം ദൗര്ഭാഗ്യകരമെന്നു ഫൊക്കാന വ്രുത്തങ്ങള് പറഞ്ഞു. പ്രശ്നം സംസാരിച്ചു തീര്ക്കുമെന്ന് ഭാരവാഹികള് സൂചിപ്പിച്ചു.