ദൃശ്യം 2 - ന്റെ വിശേഷങ്ങൾ പറഞ്ഞിട്ടും പറഞ്ഞിട്ടും തീരാതെ തുടരുകയാണ്. ഭൂരിഭാഗം മലയാളികളും സിനിമ ഇതിനോടകം കണ്ടുകഴിഞ്ഞുവെന്ന് കരുതാം. രണ്ടാം ഭാഗം കടന്ന് ദൃശ്യം -3 നും സാധ്യതയുണ്ടെന്ന് സംവിധായകൻ കോട്ടയത്ത് വച്ച് പറഞ്ഞതും യാഥാർത്ഥ്യമാകാനിടയുണ്ട്.

ഇങ്ങനെ ദൃശ്യാത്ഭുതങ്ങൾക്കിടയിൽ വ്യത്യസ്തമായ ഒരു കാര്യം എടുത്തു പറയാനുള്ളത് പോലീസ് സ്റ്റേഷന് തൊട്ടടുത്തുള്ള ചായക്കടയിൽ സപ്ലയർ ജോലി ചെയ്യുന്ന, പൊക്കം കുറഞ്ഞ രഘു എന്ന കഥാപാത്രത്തെപ്പറ്റിയാണ്. അദ്ദേഹത്തിന്റെ യഥാർത്ഥ പേരും രഘു എന്ന് തന്നെയാണ്.

കാലം പോകെ രഘുവിനെ പരിമിത എണ്ണം സിനിമകളിലേ കാണാൻ കഴിഞ്ഞുള്ളു. ശാരീരിക പരിമിതികൾ കഥാപാത്രങ്ങൾക്ക് ചേർച്ച പകരാനാവാത്തതാവാം കാരണം. എന്തായാലും മേളയിൽ ഉജ്ജ്വലമായ അഭിനയത്തികവാണ് രഘു കാഴ്ചവച്ചത്.

മമ്മൂട്ടിക്കൊപ്പം മേളയിലെത്തിയ രഘു കാലങ്ങൾക്കുശേഷം മോഹൻലാലിനൊപ്പം ദൃശ്യം - 2 ലും അഭിനയിച്ചു. ഇക്കാലമത്രയും രഘു എന്തായിരുന്നു എവിടെയായിരുന്നു എന്നതിലൊന്നുമല്ല കാര്യം. ദൃശ്യം കണ്ടവർ രഘുവിനെ തിരിച്ചറിയുകയും മേളയിലെ നായകനെ ഒരിക്കൽ കൂടി ഓർമ്മയിൽ ചേർത്തു വയ്ക്കുകയും ചെയ്യുന്നു എന്നതാണ് പ്രധാനം. ഏതായാലും മേള ഒരിക്കൽ കൂടി കാണുക തന്നെ...

യുട്യൂബിന് നന്ദി...

വരുംദിനങ്ങളിൽ സിനിമ രഘുവിന് ഇനിയും നന്മ വരുത്തട്ടെ എന്ന പ്രാർത്ഥനയും ചേർത്തു വയ്ക്കുന്നു.