ഇന്ഡ്യയിലെ ഇലക്ഷന് മാമാങ്കം കഴിഞ്ഞ് വിജയിച്ചവരും പരാജയപ്പെട്ടവരും ജനമെന്ന കഴുതയും ജയപരാജയങ്ങളുടെ കാരണം ചികഞ്ഞുകൊണ്ടിരിക്കയാണല്ലോ. അയ്യഞ്ചുവര്ഷങ്ങള് കൂടുമ്പോഴുള്ള ഇതുപോലത്തെ മാമാങ്കങ്ങളാണ് ജനത്തെ ജീവിക്കാന് പ്രേരിപ്പിക്കുന്നത്. പത്രങ്ങളിലും ചാനലുകളിലും വരുന്ന വര്ത്തകള് ആസ്വദിച്ച് ഇലക്ഷന്ദിവസം ഉടുത്തൊരുങ്ങി എലിമെന്ററി സ്കൂളില്പോയി ക്യൂനിന്ന് വോട്ടുചെയത് ഒരുമാസത്തെ കാത്തിരിപ്പിനുശേഷം റിസല്ട്ടുവരുമ്പോള് തങ്ങള് വോട്ടുചെയ്ത സ്ഥാനാര്ഥി വിജയിച്ചെങ്കില് ആഹ്ളാദിക്കുകയും തോറ്റെങ്കില് ‘നീപോയി തൂങ്ങടാ’ എന്നുപറഞ്ഞ് അടുത്ത അഞ്ചുവര്ഷങ്ങള് കഴിഞ്ഞുള്ള മാമാങ്കത്തിനവേണ്ടി കാത്തിരിക്കയും ചെയ്യുന്ന പാവം ജനങ്ങള്.
ഇലക്ഷന്കഴിഞ്ഞുള്ള ജയാപജങ്ങളുടെ വിശകലനങ്ങള് കേള്ക്കുമ്പോള് ചിരിക്കാതിരിക്കുന്നത് എങ്ങനെ? മോദി വീണ്ടും അധികാരത്തില്വന്നപ്പോള്, ദേശീയതലത്തില് കോണ്ഗ്രസ്സും കേരളത്തില് സിപിഎമ്മും തകര്ന്നടിഞ്ഞപ്പോള് ഈരണ്ടുപാര്ട്ടികളും മരണമടഞ്ഞെന്നും ഇനിയൊരിക്കലും ഉയര്ത്തെഴുന്നേല്ക്കില്ലെന്നും മറ്റുമാണ് ചില വിദഗ്ധന്മാരുടെ അഭിപ്രായം. ജയപരാജയങ്ങളുടെ കാരണവും ഇക്കൂട്ടര് കണ്ടുപിടിക്കുന്നുണ്ട്. കേരളത്തില് സിപിഎം പരാജയപ്പെട്ടത് പിണറായി വിജയന്റെ അഹങ്കാരത്തിന്റെ ഫലമായിട്ടാണ്. ശബരിമല വഷയത്തില് വിശ്വാസികളെ നോവിച്ചതുകൊണ്ടാണ്. പ്രളയത്തന്റെ കാരണക്കാര് ഇടതുപക്ഷ സര്ക്കാരാണ്. ഇങ്ങനെയെല്ലാംപോകുന്നു അഭിപ്രായങ്ങള്.
കേന്ദ്രത്തില് മോദിവിജയിച്ചത് കഴിഞ്ഞ അഞ്ചുവര്ഷത്തെ സല്ഭരണത്തിന്റെ ഫലമായിട്ടാണ്. ഭരണതലത്തില് അഴിമതി ഉന്മൂലനം ചെയ്തു. നോട്ട് നിരോധിച്ച് കള്ളപ്പണം പിടിച്ചെടുത്തു.ജിഎസ്ടി നടപ്പിലാക്കി. ഇന്ഡ്യയെ ലോകത്തിലെ മൂന്നാമത്തെ സാമ്പത്തികശക്തിയാക്കി ഉയര്ത്തി. ഇതുകൊണ്ടൊക്കെയാണ് വീണ്ടും അധികാരത്തില് കയറിയത്.
എങ്ങനെയുണ്ട് കാര്യങ്ങള്? സത്യത്തില് പാകിസ്ഥാനോടാണ് മോദിയും ബിജെപിയും കടപ്പെട്ടിരിക്കുന്നത്. പുല്ഗാമ ഭീകരാക്രമണം വീണുകിട്ടിയ വരമായിട്ടാണ് ബീജെപി കണക്കാക്കുന്നത്. ഇലക്ഷന് പ്രഖ്യാപിക്കുന്നതിനുമുന്പ് നടന്ന ഭീകരാക്രമണത്തില് നാല്പത് ഇന്ഡ്യന് ഭടന്മാര് മരിച്ചത് ജനങ്ങളെ അത്രക്കധികം വേദനിപ്പിച്ച സംഭവമായിരുന്നു. അതിന് പ്രതികാരം ചെയ്യാന് ബെലാക്കോട്ടെ ഭീകരക്യാമ്പുകള് ബോംബിട്ട് തകര്ത്തെന്നും മുന്നൂറോളം ഭീകരരെ വധിച്ചെന്നുമുള്ള വാര്ത്ത മോദിയെ ഇന്ഡ്യക്കാരുടെ, പ്രത്യകിച്ചും ഹിന്ദിബെല്റ്റില്, ഹീറോയാക്കി മാറ്റുകയുണ്ടായി. ഈയൊരു ഹീറോപരിവേഷമാണ് വടക്കേയിന്ഡ്യ തൂത്തുവാരാന് ബീജെപിക്ക് സഹായകമായത്.
ഏതാനും മാസങ്ങള്ക്കുമുന്പ് രാജസ്ഥാനിലും മധ്യപ്രദേശിലും ഛത്തീഘട്ടിലും അധികാത്തില്കയറിയ കോണ്ഗ്രസ്സിന് പാര്ലമെന്റ് ഇലക് ഷനില് ഒറ്റസീറ്റുപോലും നേടന് സാധിച്ചില്ലെന്നുള്ളത് കണക്കാക്കുമ്പോള് ജനങ്ങളുടെ ദേശീയവികാമാണ് ബിജെപിയെ തുണച്ചതെന്ന് നിസംശയം പറയാം. അല്ലാതെ മൂന്നുമാസം ഭരിച്ച കോണ്ഗ്രസ്സ് ഗവണ്മെന്റുകളോടുള്ള ഭരണവിരുദ്ധവികാരമാണെന്ന് ആരും പറയില്ല. പാകിസ്ഥന് രണ്ടടികൊടുക്കുന്ന ഗവണ്മെന്റിനെ വടക്കേ ഇന്ഡ്യാക്കാര് പിന്തുണക്കും എന്നുള്ളതിന്റെ ഉദാഹരണമാണ് ബംഗ്ളാദേശ് പാകിസ്ഥാനില്നിന്ന് സ്വതന്ത്രമാക്കിയ ഇന്ദിരാ ഗാന്ധിയെ മൂന്നില്രണ്ട് ഭൂരിപക്ഷത്തോടെ വീണ്ടും അധികാരത്തില് കയറ്റിയത്. കാര്ഗില് യുദ്ധമാണ് രണ്ടാമതും അധികാരത്തില് കയറാന് ബാജ്പേയ്ക്ക് തുണയായി തീര്ന്നത്. ലോകത്തെവിടെയും ശത്രുവിനെ അടിക്കുന്നവനെ ജനം ഹീറോയായി കണക്കാക്കും. വാര്പ്രസിഡണ്ട് ആയതുകൊണ്ടാണ് ഡബ്ളിയു ബുഷ് രണ്ടാമതും വിജയിച്ചത്. അല്ലാതെ അദ്ദേഹത്തിന്റെ ഭരണത്തിന്റെ മെച്ചംകൊണ്ടായിരുന്നില്ല.
ഇനി കേരളത്തിലേക്ക് വരാം. അസംബ്ളി ഇലക്ഷനും പാര്ലമെന്റ് ഇലക്ഷനും രണ്ടും രണ്ടായിട്ടാണ് കേരളീയര് കണക്കാക്കുന്നത്. പാര്ലമെന്റ് ഇലക്ഷനില് എന്നും യുഡി എഫിനായിരുന്നു മുന്തൂക്കം ഉണ്ടായിരുന്നത്. ഇരുപതില് പതിനാറും പത്തൊന്പതും സീറ്റുകള്വരെ അവര് നേടിയ ചരിത്രമുണ്ട് അവര്ക്ക്. എട്ടോപത്തോ ഇടതുപക്ഷക്കാരെ തെരഞ്ഞെടുത്തുവിട്ടാല് അവര്ക്ക് കേന്ദ്രത്തില് ഒന്നുംചെയ്യാനില്ലെന്ന് ജനങ്ങള്ക്കറിയാം. കോണ്ഗ്രസ്സുകാരെ പറഞ്ഞുവിട്ടാല് കേരളത്തിന് രണ്ടോമൂന്നോ മന്ത്രിമാരെ കിട്ടും അവര് നാടിനുവേണ്ടി ഒന്നും ചെയ്യില്ലെങ്കിലും നമുക്ക് കേന്ദ്രത്തില് മൂന്ന് മന്ത്രിമാരുണ്ടെന്ന് അഭിമാനിക്കാമല്ലോ.
പഴയ ചരിത്രം ഒന്നൂകൂടി ആവര്ത്തിക്കുകയാണ് ഇപ്പോഴുണ്ടായത്. അല്ലാതെ പിണറായിയോടുള്ള വിരോധമോ ഭരണവിരുദ്ധവികാരമോ അല്ല യുഡിഎഫിന്റെ വന്വിജയത്തിന് കാരണമായിതീര്ന്നത്. ചിലര് പറയുന്നതുപോലെ ശബരിമല വിഷയം ഈ ഇലക്ഷനില് യുഡിഎഫിന്റെ വിജയത്തിനോ എല്ഡിഎഫിന്റെ പരാജയത്തിനോ ഇടയാക്കിയില്ല. ബിജെപിക്ക് അഞ്ചാറ് വോട്ട് കൂടുതല്കിട്ടിയെന്നുള്ളതല്ലാതെ ആ പാര്ട്ടിനടത്തിയ പേക്കൂത്തുകള്കൊണ്ട് പ്രയോജനമൊന്നും ഉണ്ടായില്ല. ജനങ്ങളെ ബുദ്ധിമുട്ടിക്കാനല്ലാതെ ബിജെപിയുടെ സമരങ്ങളും നിത്യഹര്ത്തലുകളുംആ പാര്ട്ടിക്കുപോലും ഗുണംചെയ്തില്ല. കേരളത്തിലെ ബിജെപിയുടെ മാടമ്പിത്തരങ്ങളോടുള്ള വെറുപ്പും കേന്ദ്രംഭരിക്കുന്ന മോദിയോടുള്ള ജനങ്ങളുടെ ഭയവുമാണ് വോട്ടായി മാറിയത്. അത് ആര്ക്കുചെയ്യണമെന്ന് ജനം രണ്ടുവട്ടം ആലോചിച്ചു. ഇടതുപക്ഷത്തിന് ചെയ്താല് അവര്ക്ക് കേന്ദ്രത്തില് പ്രത്യേകിച്ച് റോളൊന്നും ഇല്ലാത്തതുകൊണ്ട് കോണ്ഗ്രസ്സിനുചെയ്യാമെന്ന് അവര് വിചാരിച്ചെങ്കില് കുറ്റംപറയാന് സാധിക്കില്ല. പിന്നെ രാഹുല്ഗാന്ധിയുടെ വയനാട്ടിലേക്കുള്ള വരവ് കേരളജനതയെ വളരെയധികം സ്വാധീനിച്ചു. അദ്ദേഹം ജയിച്ച് പ്രധാനമന്ത്രിയായാല് നമുക്ക് അഭിമാനിക്കാമെല്ലോയെന്ന് അവര് വിചാരിച്ചു. അല്ലാതെ വിദഗ്ധന്മാര് പറയുന്നതുപോലെ പിണറായി പ്രളയം സൃഷ്ടിച്ചതുകൊണ്ടോ അതിന്റെപേരില് അഹങ്കരിച്ചതുകൊണ്ടോ ആണെന്ന് സാധാരണ കോണ്ഗ്രസ്സുകാര്പോലും വിചാരിക്കുന്നുണ്ടാവില്ല. നാളെ അസംബ്ളിയിലേക്കുള്ള ഇലക്ഷന് നടന്നാല് കഥ മറ്റൊന്നായിരിക്കുമെന്ന് അവര്ക്ക് ആരും പറഞ്ഞുകൊടുക്കേണ്ടതില്ല.