ദൃശ്യം 2 നേടിയ മഹാവിജയം മോഹന്ലാലിന് അന്യഭാഷാ സിനിമാ ഇന്ഡസ്ട്രികളില് നേടിക്കൊടുത്ത ജനപ്രീതി വളരെ വലുതാണ്. അതിനാല് താരത്തിന്റെ ഡേറ്റിനു വേണ്ടി മറ്റു സിനിമാ ഇന്ഡസ്ട്രികളും കാത്തിരിക്കുകയാണ്. പ്രഭാസ് നായകനായ ബ്രഹ്മാണ്ഡ ചിത്രം സലാറിലേക്കു മോഹന്ലാലിനെ ക്ഷണിച്ചിരുന്നെങ്കിലും അദ്ദേഹത്തിന് തിരക്കുകള് മൂലം അതിന്റെ ഭാഗമാകാന് സാധിച്ചില്ല. അതിനു ശേഷം അല്ലു അര്ജുന്- കൊരടാല ശിവ ടീമിന്റെ ചിത്രത്തിലേക്കും മോഹന്ലാലിനെ ലഭിക്കാനുള്ള ശ്രമങ്ങള് തുടരുന്നുണ്ട് .
പ്രശസ്ത ഹോളിവുഡ് സീരിസായ ബോണ് സീരിസില് നിന്ന് പ്രചോദനമുള്ക്കൊണ്ട് നിര്മ്മിക്കുന്ന തെലുങ്കു ചിത്രത്തില് അഭിനയിക്കാന് മോഹന്ലാലിനെ സമീപിച്ചിരിക്കുകയാണ് തെലുങ്ക് സംവിധായകനായ സുരീന്ദര് റെഡ്ഢി.
അനില് സുങ്കര നിര്മ്മിക്കുന്ന ഈ ബിഗ് ബജറ്റ് ചിത്രത്തില് മോഹന്ലാലിനൊപ്പം തെലുങ്കിലെ യുവ താരമായ അഖില് അക്കിനേനിയും അഭിനയിക്കുമെന്നാണ് റിപ്പോര്ട്ടുകള്. ചിത്രത്തിന്റെ പ്രീ-പ്രൊഡക്ഷന് ജോലികള് ആരംഭിക്കാന് പോവുകയാണെന്നും വാര്ത്തകള് പറയുന്നു. ചിത്രത്തിന്റെ കഥ ഇഷ്ടമായെങ്കിലും തിരക്കുകള് മൂലം മോഹന്ലാല് ഇതുവരെ അഭിനയിക്കാന് സമ്മതം മൂളിയിട്ടില്ല എന്നാണ് അറിവ്.
തന്റെ ആദ്യ സംവിധാന സംരംഭമായ ബറോസ് ഒരുക്കുന്നതിന്റെ തിരക്കിലാണ് മോഹന്ലാല് ഇപ്പോള്. അതിനു ശേഷം ജീത്തു ജോസഫ് ഒരുക്കുന്ന റാം, പൃഥ്വിരാജ് ഒരുക്കുന്ന എമ്പുരാന് തുടങ്ങി ഒട്ടേറെ ചിത്രങ്ങളാണ് മലയാളത്തില് ഒരുങ്ങുന്നത്.