ന്യൂഡല്ഹി: കൊവിഡ് വ്യാപനത്തിന്റെ പശ്ചാത്തലത്തില് പ്ലസ് വണ് പരീക്ഷ റദ്ദാക്കണമെന്ന ഹര്ജിയില് സുപ്രീം കോടതി കേരള സര്ക്കാരിനോട് നിലപാട് തേടി . സര്ക്കാരിനോട് ജസ്റ്റിസ് എ എം ഖാന്വില്ക്കര് അദ്ധ്യക്ഷനായ സുപ്രീം കോടതി ബെഞ്ച് ചൊവ്വാഴ്ച വിവരമറിയിക്കണമെന്ന് നിര്ദേശിച്ചു
സര്ക്കാര് നിലപാട് അറിയിക്കാത്ത പക്ഷം ഹര്ജിയില് ഉത്തരവ് പുറപ്പെടുവിക്കുമെന്ന് കോടതി വ്യക്തമാക്കി. ഒരാഴ്ചത്തെ സമയം കൂടി അനുവദിക്കണമെന്ന് സര്ക്കാര് ആവശ്യപ്പെട്ടെങ്കിലും അനുവദിക്കാനാവില്ലെന്ന് കോടതി അറിയിച്ചു.
സെപ്തംബര് ആറ് മുതല് 16 വരെ പ്ലസ് വണ് പരീക്ഷ നടത്താനാണ് സര്ക്കാരിന്റെ തീരുമാനം. കൊവിഡ് വ്യാപനത്തിന്റെ പശ്ചാത്തലത്തില് പരീക്ഷ റദ്ദാക്കണമെന്നാവശ്യപ്പെട്ട് വിദ്യാര്ത്ഥികളും മാതാപിതാക്കളും സുപ്രീം കോടതിയെ സമീപിക്കുകയായിരുന്നു.
പന്ത്രണ്ടാം ക്ലാസ് പരീക്ഷ റദ്ദാക്കണമെന്ന ഹര്ജിയിലും നാളെ വിശദമായ വാദം കേള്ക്കുമെന്ന് സുപ്രീം കോടതി അറിയിച്ചു