ഗൗരവമുള്ള ഒരു വിഷയമായതിനാല്, മുഖവുരയൊന്നുമില്ലാതെ കാര്യത്തിലേക്ക് നേരിട്ട് കടക്കുകയാണ്. ഈ കഴിഞ്ഞ ഒരു ദിവസം പള്ളിയില് വെച്ച് എന്റെ ഷൂസ് മോഷണം പോയി. കൃത്യം നടത്തിയത് പള്ളിയില് വച്ചാതിനാല് ഇത് ഒരു 'വിശുദ്ധ മോഷണ' മായി ഞാന് പ്രഖ്യാപിക്കുകയാണ്. പള്ളിക്കകത്ത് മോഷണങ്ങള് കാലാകലങ്ങളായി നടന്നു, വരുന്നുണ്ടെന്ന് നമുക്കറിയാം- 'കള്ളന് കപ്പില്ത്തന്നെ' ആയതുകൊണ്ട് നമ്മളത് വലിയ വിഷയമാക്കാറില്ല- അഥവാ ആരെങ്കിലും അതിനു മുതിര്ന്നാല്, അവരെ പടിയടച്ച് പിണ്ഡം വയ്ക്കും.
സംഭവം ഇതാണ്- എന്റെ ഒരു സ്നേഹിതന് അയാളുടെ പിതാവിന്റെ നാല്പ്പതാം ചരമദിനം ആചരിക്കുന്നു. ഞാന് കുടുംബ സമേതം അതില് പങ്കെടുക്കണമെന്ന് അയാള്ക്ക് നിര്ബന്ധം. മുന്നാലു ടോള് പിരിവുള്ള പാലങ്ങള് കടന്നുവേണം അവിടെയെത്താന്.
എന്റെ ഒരു അസാന്നിധ്യംകൊണ്ട് അയാളുടെ തന്തപ്പടിയുടെ ആത്മാവിന് മോക്ഷം കിട്ടാതിരുന്നാലോ? അത് മോശമല്ലേ. അതിനാല് അതിരാവിലെ തന്നെ വച്ചുപിടിച്ചു.
പള്ളിയുടെ പ്രവേശന കവാടത്തില് 'പാദരക്ഷകള് ദയവായി പുറത്തു സൂക്ഷിക്കുക' എന്നൊരു അറിയിപ്പ് പതിച്ചിട്ടുണ്ട്.
പണ്ട് സായിപ്പിന്റെ പള്ളികള് വാടകയ്ക്ക് എടുത്ത് കുര്ബാന നടത്തിയപ്പോള് ഈ 'പാദരക്ഷ പുറത്ത്' എന്നൊരു നിയമം ഇല്ലായിരുന്നു. 'വല്ലവന്റേം മുതലല്ലേ നമുക്കെന്തുചേതം' എന്ന ആറ്റിറ്റിയൂഡ്.
സ്വന്തമായി പള്ളികള് ഉണ്ടായപ്പോഴാണ് ഈ 'ചെരുപ്പ് പുറത്ത്' നിയമം പ്രാബല്യത്തിലാക്കിയത്. 'നീ നില്ക്കുന്ന സ്ഥലം വിശുദ്ധഭൂമിയാകയാല് കാലില് നിന്നും ചെരുപ്പ് ഊരിക്കളയുക' എന്നു കര്ത്താവ് പണ്ട് മോശയോട് പറഞ്ഞത് മുന്നിര്ത്തിയാണ് വിശുദ്ധ സ്ഥലമായ പള്ളിയില് ചെരുപ്പ് ഇടാന് അനുവദിക്കാത്തത്.
എന്നാല് അതിവിശുദ്ധ സ്ഥലമായി കണക്കാക്കുന്ന മദ്ബഹായില്, അച്ചന്മാര്ക്കും തിരുമേനിമാര്ക്കും കിന്നരി തുന്നിപ്പിടിപ്പിച്ച ചെരുപ്പ് ധരിച്ച് നടക്കാം. അല്ലെങ്കില് തന്നെ കര്ത്താവിന്റെ കല്പനകളൊന്നും കത്തനാര്മാര്ക്ക് ബാധകമല്ലല്ലോ!
പള്ളിയിലെ ധൂപ പ്രാര്ത്ഥന കഴിഞ്ഞ് വന്നവര്ക്കെല്ലാം ഹാളില് ഭക്ഷണം തയാറാക്കിയിരുന്നു.
കോവിഡ് കാലമായതിനാല് പള്ളിക്കകത്ത് 'മാസ്ക്' നിര്ബന്ധം. എന്നാല് ഭക്ഷണശാലയില് മാസ്ക് വേണ്ട. പരസ്പരം കെട്ടിപ്പിടുത്തവും, പൊട്ടിച്ചിരിയും.
പള്ളിക്ക് പുറത്തു കടന്ന ഞാന് എന്റെ ഷൂസ് ഭദ്രമായി വച്ചിരുന്ന സ്ഥലത്ത് പോയി നോക്കിയപ്പോള് അതിവിടെ കാണാനില്ല. ആരെങ്കിലും അബദ്ധത്തില് മാറിക്കൊണ്ടുപോയിക്കാണുമെന്നു കരുതി, ഞാന് അവിടെതന്നെ നിന്നു. അവസാനം ഒരു ജോഡി ഷൂ മാത്രം അവിടെ ശേഷിച്ചു. കണ്ടിട്ട് 'സാല്വേഷന് ആര്മി'ക്കാരു ദാനം കൊടുത്തതാണെന്നു തോന്നും. ആകപ്പാടെ കീറിപ്പറിഞ്ഞ ഒരു സാധനം. ആ ഷൂസില് തൊട്ടാല് 'മങ്കി പോക്സ്' വരുമെന്നുറപ്പ്.
എന്റെ ഷൂസ് നല്ല കുടുംബത്തില് പിറന്ന ഒരനിമായിരുന്നു. എന്റെ അമിത ഭാരം താങ്ങാനുള്ളതായതുകൊണ്ട് ഞാന് വിലയുടെ കാര്യത്തില് പിശുക്ക് കാണിച്ചില്ല. 'താറാവ് പാദങ്ങള്' ഉള്ള എനിക്ക് 'വൈഡ് വിത്ത്' ഷൂസ് മാത്രമേ ധരിക്കാന് പറ്റുകയുള്ളൂ.
ആ 'ഇറ്റാലിയന്' ഷൂസ് അടിച്ചു മാറ്റിയിട്ടാണ് ആ പരമദ്രോഹി ഈ 'സോമാലിയന്' ഷൂസ് ഇവിടെ ഇട്ടിട്ടുപോയത്.
പണ്ട് പാഞ്ചാലിയുടെ പാദരക്ഷ ഒരു പട്ടി കടിച്ചുകൊണ്ട് പോയെന്നും, അതില് കോപിഷ്ഠയായ അവര് പട്ടിയെ ശപിച്ചെന്നും, പുരാണങ്ങളിലൊന്നും ഇല്ലാത്ത ഒരു 'കെട്ടുകഥ' പ്രചാരത്തിലൂണ്ട്.
അതുപോലെ ഒരു ശാപം എന്റെ മനസില് തെളിഞ്ഞുവന്നതാണ്. ഇനിയും വാങ്ങിക്കുമ്പോള് ദാസേട്ടനെപ്പോലെ, വെള്ള നിറത്തിലൂള്ള ഷൂസ് വാങ്ങിച്ചാലോ എന്നു ഞാന് ആലോചിക്കുകയാണ്.
ഷൂസുമായി സിന്ഡ്രലയെ അന്വേഷിച്ച് നടന്ന രാജകുമാരനെപ്പോലെ, ഷൂസുമായി എന്നെത്തേടി അയാള് അലയുമെന്നു കരുതുന്നില്ല. കാരണം അത് കരുതിക്കൂട്ടി നടത്തിയ ഒരു മോഷണമാണ്. ജയരാജന് സഖാവ് പറഞ്ഞതുപോലെ 'കക്കാന് പഠിച്ചാല് നിക്കാന് പഠിച്ച' ഒരു കള്ളനാണവന്.
ഏതായാലും ഞാനൊരു സത്യക്രിസ്ത്യാനി ആയിപ്പോയല്ലോ! 'ശത്രുക്കളെ സ്നേഹിപ്പിന്, അവര്ക്കുവേണ്ടി പ്രാര്ത്ഥിപ്പിന്' എന്നാണല്ലോ തിരുവചനം.
അതുകൊണ്ട് എന്റെ ചെരുപ്പ് മോഷ്ടിച്ചവനുവേണ്ടി ഞാന് എന്നും പ്രാര്ത്ഥിക്കാറുണ്ട്.
'കര്ത്താവേ ! എന്റെ ചെരുപ്പ് കട്ടവനെ ഞാന് സ്നേഹിക്കുന്നു. അവന് ഒരുകാലത്തും ഗുണം പിടിക്കല്ലേ- അമീന്'