ഏതാനും ദിവസങ്ങള്‍കൊണ്ട് അല്ലെങ്കില്‍ ഒന്നോരണ്ടോ ആഴ്ച്ചകള്‍കൊണ്ട് യുക്രേനെന്ന സ്വതന്ത്രരാജ്യത്തെ കീഴ്‌പെടുത്തി റഷ്യയുടെ പാവഗവണ്മെന്റിനെ അവിടെസ്ഥാപിക്കാമെന്ന് സ്വപ്നംകണ്ട് അധിനിവേശംതുടങ്ങിയ പുടിന്‍ ഇപ്പോള്‍  തന്റെ അതിക്രമത്തിന്റെ  ആനിവേഴ്‌സറി ആഘോഷിക്കയാണ്. ലോകത്തിലെ രണ്ടാം സൈനികശക്തിയായ റഷ്യക്കുമുന്‍പില്‍ പിടിച്ചുനില്‍കാന്‍ യുക്രേന് പഴയ സോവ്യറ്റ് കാലഘട്ടത്തിലെ കുറെ പഴഞ്ചന്‍ തോക്കുകളും ടാങ്കുകളും മാത്രമെ ഉണ്ടായിരുന്നുള്ളു. അയല്‍രാജ്യത്തെ ആക്രമിക്കാന്‍ പുടിന്‍ കണ്ടെത്തിയ ന്യായങ്ങള്‍ നമ്മള്‍ ഒന്നാംക്‌ളാസ്സില്‍ പഠിച്ച ചെന്നയയുടെയും ആട്ടിന്‍കുട്ടിയുടെയും കഥയെ ഓര്‍മ്മിപ്പിക്കുന്നതായിരുന്നു. രണ്ടാം സൈനികശക്തിയുടെ കയ്യിലിപ്പോള്‍ കുറെ അണുവായുധങ്ങളൊഴിച്ച് ഒരു തോക്കുപോലുമില്ല. അതാണെങ്കില്‍ ശത്രുവിനെതിരെ പ്രയോഗിക്കാനും വയ്യ. ചൈനയും ഇറാനും സഹായിച്ചില്ലെങ്കില്‍ ഒരടി മുമ്പോട്ടുവെയ്ക്കാന്‍ പുടിനാകില്ല.

റഷ്യന്‍ടാങ്കുകള്‍ യുക്രേനിലേക്ക് ഇരച്ചുകയറിയപ്പോള്‍ സെലന്‍സ്‌കി തന്റെ നാട്ടുകാരോട് പറഞ്ഞത് ഒഴിഞ്ഞ ബിയര്‍കുപ്പികളില്‍ പെട്രോള്‍നിറച്ച് അവയുടെനേരെ എറിയാനാണ്. തുടര്‍ച്ചയായ ബോംബിങ്ങിലും മിസൈല്‍ വര്‍ഷത്തിലും പകച്ചുപോയ ജനം കയ്യില്‍കിട്ടിയതും വാരിയെടുത്ത് അയല്‍രാജ്യങ്ങളിലേക്ക് പാലായനംചെയ്തു. ഒരുകോടിയില്‍പരം യുക്രേന്‍കാരാണ് പോളണ്ടിലേക്കും ഹങ്കറിയിലേക്കും അഭയാര്‍ഥികളായി പോയത്. നേറ്റോ രാജ്യങ്ങളില്‍നിന്നും അമേരിക്കയില്‍നിന്നും ആയുധങ്ങള്‍ സെലന്‍സ്‌കിയുടെ പോരാളികള്‍ക്ക് കിട്ടിയപ്പോള്‍ മുതലാണ് അവരുടെ ചെറുത്തുനില്‍പ് ആരംഭിക്കുന്നത്. അതോടുകൂടി റഷ്യന്‍സേനയുടെ മുന്നേറ്റം നിലച്ചു. റഷ്യ പിടിച്ചെടുത്ത ഗ്രാമങ്ങളും പട്ടണങ്ങളും യുക്രേന്‍സേന തിരിച്ചുപിടിക്കുന്നത് ലോകം അത്ഭുതത്തോടെ നോക്കിനിന്നു. ലോകശക്തി പിന്നോട്ടോടുന്ന കാഴ്ച്ച രസാവഹമായി തോന്നി.

യുദ്ധം ഈരണ്ടുരാജ്യങ്ങളെ മാത്രമല്ല ദുരിതത്തിലാക്കിയത്. ആഫ്രിക്കയിലെയും ഏഷ്യയിലെയും ദരിദ്രരാജ്യങ്ങളില്‍ ആഹാരത്തിനും ഇന്ധനത്തിനും ബുദ്ധിമുട്ടനുഭവിച്ചു. ലോക സബത്ത്‌വ്യവസ്ഥതന്നെ തകിടം മറിഞ്ഞു. സമ്പന്ന രാജ്യങ്ങള്‍വരെ ബുദ്ധിമുട്ടിലായി. ഇവിടങ്ങളിലൊക്കെ പ്രധാന ആഹാരമായ ഗോതമ്പിന് ദൗര്‍ലഭ്യം അനുഭവപ്പെട്ടു. അല്‍പമെങ്കിലും പിടിച്ചുനിന്നത് അമേരിക്കയും ഇന്‍ഡ്യയുമാണ്. എന്നാല്‍ അവിടങ്ങളിലും സാധനങ്ങുടെ വില കുതിച്ചുയരുന്ന കാഴ്ച്ചയാണ്. 

(ആട്ടമാവ് 20 പൗണ്ടിന്റെ ബാഗിന് 15 ഡോളര്‍ വിലയുണ്ടായിരുന്ന സ്ഥാനത്ത് ഇന്‍ഡ്യന്‍ സ്റ്റോറില്‍ 80 ഡോളര്‍ വിലകണ്ട് തലയില്‍ കൈവച്ചുപോയി.)

പുടിന്റെ യുദ്ധം ലോകത്തെയാകെ കഷ്ടത്തിലാക്കി. ഇനിയും യുദ്ധംചെയ്യാനാണ് പുടിന്റെ ഭാവമെങ്കില്‍ ലോകത്തിന്റെ അവസ്ഥ എന്തായിരിക്കുമെന്ന് ആശങ്കപ്പെടേണ്ടിയിരിക്കുന്നു. റഷ്യന്‍പട്ടാളക്കാര്‍ക്ക് അറിയില്ല തങ്ങള്‍ എന്തിനുവേണ്ടിയാണ് യുദ്ധംചെയ്യുന്നതെന്ന്. അതുകൊണ്ട് എതിരാളിയുടെ മുന്‍പില്‍ വിരിമാറുകാട്ടാന്‍ അവര്‍ക്ക് താത്പര്യമില്ല. റഷ്യന്‍സേന തോറ്റുപിന്മാറുന്നത് അതുകൊണ്ടാണ്. ഇത് റഷ്യയുടെ യുദ്ധമല്ലെന്നും പുടിന്റെ ആത്മാഭിമാനത്തിന്റേതാണന്നും അവര്‍ക്കറിയാം. പുടിനുവേണ്ടി ജീവന്‍ ബലികഴിക്കാന്‍ അവര്‍ക്ക് ആവേശമില്ല.  

കയ്ച്ചിട്ട് ഇറക്കാനും മധുരിച്ചിട്ട് തുപ്പാനും വയ്യാത്ത പരുവത്തിലാണ് പുടിന്‍. യുദ്ധം ഏകപക്ഷീയമായിട്ട് നിറുത്തിയാല്‍ അയാളുടെ കസേരതെറിക്കും. നിരപരാധികളെ കൊന്നൊടുക്കിയതിന് വിചാരണ നേരിടേണ്ടിവരും. ശിഷ്ടകാലം ജയില്‍വാസം അനുഭവിക്കേണ്ടിവരും. ഇപ്പോള്‍ ഇയാള്‍ യുദ്ധംചെയ്യുന്നത് യുക്രേനിലെ സാധിരണക്കാരായ പൗരന്മാരുടെ നേരെയാണ്. മിസൈല്‍വര്‍ഷം നടത്തി യുക്രേനിലെ ഇന്‍ഫ്രാസ്രക്ച്ചറുകള്‍ നശിപ്പിക്കുന്നു. അതിന് സഹായകമായി ഇറാന്റെയും ഉത്തരകൊറിയയുടെയും ട്രോണുകളും മറ്റായുധങ്ങളും ഉപയോഗിക്കുന്നു. ചൈന ആയുധങ്ങള്‍ നല്‍കുന്നില്ലെന്ന് പറയുന്നുണ്ടെങ്കിലും വിശ്വസനീയമല്ല അവരുടെ വാക്കുകള്‍. എന്ത് നെറികെട്ട പ്രവര്‍ത്തികള്‍  ചെയ്യാനും അവരെപ്പോലെ വിദഗ്ധരായവര്‍ ലോകത്തില്ല.

ഇന്‍ഡ്യയുടെ നിഷ്പക്ഷനയം പരിപൂര്‍ണമായി ശരിയല്ലെങ്കിലും ആപത്ഘട്ടങ്ങളില്‍ സഹായിച്ച റഷ്യക്കെതിരെ നിലകൊള്ളാന്‍ നമുക്കാവില്ല. മറ്റൊരുവിധത്തില്‍ നോക്കിയാല്‍ റഷ്യയുടെ യുദ്ധം മുതലെടുത്തത് ഇന്‍ഡ്യയാണ്. റഷ്യന്‍ ഓയില്‍ 30 ശതമാനം കിഴിവില്‍വാങ്ങുന്നതുകൊണ്ട് പെട്രോള്‍വില അമിതമായി കൂടതിരിക്കാന്‍ ഇടയാകുന്നു. തന്നെയുമല്ല ഇങ്ങനെവാങ്ങുന്ന ക്രൂഡോയില്‍ ശുദ്ധീകരിച്ച് അന്യരാജ്യങ്ങള്‍ക്കുവിറ്റ് ഡോളറും സമ്പാതിക്കുന്നു. യുദ്ധംകൊണ്ട് ഇന്‍ഡ്യക്ക് നേട്ടമുണ്ടെങ്കിലും ഈ അനാവശ്യയുദ്ധം എത്രയുംപെട്ടന്ന് അവസാനിക്കട്ടെയെന്ന് ആശിക്കാം.

സാം നിലമ്പള്ളില്‍
samnilampallil@gmail.com.

#Ukraine war 1st anniversary