ബേണിങ് മാൻ  ഫെസ്റ്റിവൽ എന്ന്  കേട്ടിട്ടുണ്ടോ ?
ഇല്ലെങ്കിലും ഇന്നലത്തെ ചാനൽ ന്യൂസുകളിൽ സുപ്രധാനമായ ഒരു വാർത്ത ശ്രദ്ധേയമായിരുന്നു.

"കനത്ത മഴയെ തുടർന്ന് ബേണിംഗ് മാൻ ഫെസ്റ്റിവലിൽ കുടുങ്ങിയത് ആയിരങ്ങൾ"

ലാസ് വെഗാസ് ഉൾക്കൊള്ളുന്ന  നെവാഡയിലെ  മരുഭൂമിയിൽ  ബേണിംഗ് മാൻ ഫെസ്റ്റിവലിൽ ആയിരക്കണക്കിന് ആളുകൾ എല്ലാ വർഷവും വരുന്നു. 

അപ്രതീക്ഷിതമായി പെയ്ത  കനത്ത മഴ  മൂലം വെള്ളപ്പൊക്കമുണ്ടാക്കുകയും, കണങ്കാൽ ആഴത്തിൽ  കട്ടിയായ ചെളി നിറയുകയും ചെയ്തു.

പങ്കെടുക്കാൻ എത്തിയവരുടെ   ഷൂവിലും  വാഹന ടയറുകളിലും ചെളി കട്ടയായി മാറിയ സാഹചര്യത്തിൽ അവിടെനിന്നും രക്ഷപെടാനോ രക്ഷാപ്രവർത്തനങ്ങൾ നടത്താനോ വയ്യാതായിരിക്കുന്നു. അതാണ് സംഭവം.

70,000ത്തിൽ പരം ആളുകളുടെ വാഹനങ്ങൾ കുടുങ്ങിക്കിടക്കുന്ന സാറ്റലൈറ്  ദൃശ്യം മീഡിയ പുറത്തു വിട്ടിരുന്നു. 

വെറും 24 മണിക്കൂറിനുള്ളിൽ 2 - 3 മാസത്തിൽ പെയ്യേണ്ട   മഴ പെട്ടെന്ന് ഇവിടെ പെയ്തു. കനത്ത മഴ, വരണ്ട മരുഭൂമിയിൽ വീണു, കട്ടിയുള്ളതും കളിമണ്ണ് പോലെയുള്ളതുമായ ചെളി അടിച്ചുകയറ്റി, നടക്കാനോ ബൈക്ക് ഓടിക്കാനോ പറ്റാതായി.

മുൻ അസി. സോളിസിറ്റർ ജനറലും ഇന്ത്യാക്കാരനുമായ നീൽ  കട്ടിയാൽ  അഞ്ചു മൈൽ ചെളിയിലൂടെ നടന്ന് അതിസാഹസികമായി സമീപത്തെ മെയിൻ റോഡിൽ എത്തി. ചിത്രങ്ങൾ അദ്ദേഹത്തിന്റെ ട്വിറ്റർ ഹാന്ഡിലിൽ നിന്ന് 

ബേണിംഗ് മാൻ അഥവാ കത്തുന്ന മനുഷ്യൻ  വാസ്‌തവത്തിൽ ഒരു ഉത്സവമല്ല. ബേണിംഗ് മാൻ ഒരു സമൂഹവും ആഗോള സാംസ്കാരിക പ്രസ്ഥാനവുമാണ്. പങ്കെടുക്കുന്നവർ ഒരുമിച്ച്,  നെവാഡയിൽ, ബ്ലാക്ക് റോക്ക് സിറ്റിയിലെ താഴ്‌വര ഒരു ഒരു താത്കാലികമായ  നഗരമാക്കി മാറ്റുന്നു. എല്ലാ വർഷവും പതിനായിരക്കണക്കിന് ആളുകൾ അവിടെ  ഒത്തുചേരുന്നു. ചുട്ടുപൊള്ളുന്ന സൂര്യനു കീഴിലും തണുത്തുറഞ്ഞ രാത്രികളിലും അവർ സമൂഹത്തിന്റെയും കലയുടെയും പ്രതിസംസ്‌കാരത്തിന്റെയും സ്വതന്ത്രമായ ആവിഷ്‌കാരത്തിന്റെയും സ്വത്വത്തിന്റെയും  ആഘോഷത്തിന്റെയും ഒരാഴ്ച ആസ്വദിക്കുന്നു. 

നീൽ  കട്ടിയാൽ

ഒരു വലിയ തടി കോമരം പ്രതീകാത്മകമായി കത്തിക്കുന്നതിലാണ് പാർട്ടിയുടെ പര്യവസാനം. അതിനുശേഷം പങ്കെടുക്കുന്നവരെല്ലാം ആ പ്രദേശം  സൂക്ഷ്മമായി വൃത്തിയാക്കുന്നു. 

പിന്നീട് അവർ തങ്ങളുടെ സാധാരണ ജീവിതത്തിലേക്ക് മടങ്ങുന്നു, അവരുടെ സാന്നിധ്യത്തിന്റെ വ്യക്തമായ സൂചനകളൊന്നുമില്ല. ഇതാണ് ബേണിംഗ് മാൻ ഫെസ്റ്റിവലിന്റെ പ്രത്യേകത.

ലളിതമായി പറഞ്ഞാൽ, ബേണിംഗ് മാൻ, ബേണർമാരെ പരസ്പരം നല്ലവരായിരിക്കാനും ലോകത്തോട് നല്ലവരായിരിക്കാനും പ്രോത്സാഹിപ്പിക്കുന്നു. വേനൽക്കാലത്തിന്റെ കൊടുമുടിയിൽ, മരുഭൂമിയുടെ നടുവിൽ ഒരുമിച്ചുകൂടുന്ന ഒരു കൂട്ടം ആളുകൾക്ക്, പരസ്‌പരം ഉപകരിക്കാൻ  നോക്കുകയല്ലാതെ മറ്റ് മാർഗമില്ലായിരിക്കാം. ഇത്  മാനവികതയുടെ പ്രത്യാശയുടെയും ആത്മീയ യാത്രയുടെയും വിളക്കുമാടമെന്നു ഒരു കൂട്ടർ.  ലൈംഗികാസക്തികളുടേയും മയക്കുമരുന്ന് ദുരുപയോഗങ്ങളുടേയും കേന്ദ്രമെന്നും  അക്ഷരാർത്ഥത്തിൽ വിശേഷിപ്പിക്കുന്നവരും ഉണ്ടാകാം. ബേണിംഗ് മാൻ-ൽ സംഭവിക്കുന്നത് പലതും നല്ലതും ചീത്തയും,  ആശയക്കുഴപ്പവും ആവേശകരവും, അപകടകരവും വിമോചനവും എന്നൊക്കെ  ഒറ്റയടിക്ക് തോന്നാം.

70,000-ത്തോളം വരുന്ന ജനക്കൂട്ടം അവരുടെ സ്വന്തം ഉപകരണങ്ങൾ  ഉപയോഗിച്ച്   അടിസ്ഥാന സൗകര്യങ്ങൾ നിർമ്മിക്കുന്നു. കാപ്പിയും ഐസും ഒഴികെ, ബേണിംഗ് മാനിൽ ഒന്നും വിൽക്കുന്നില്ല. ഭൗതിക ചരക്കുകളുടെയും സേവനങ്ങളുടെയും എല്ലാ ഇടപാടുകളും പരസ്പരം കൈമാറ്റം ചെയ്യപ്പെടുന്നു.  (അല്ലെങ്കിൽ, ഇവന്റിന്റെ ഭാഷയിൽ, സമ്മാനം). ബേണിംഗ് മാനിൽ, ക്യാമ്പുകളും സ്റ്റേജുകളും നിർമ്മിക്കാൻ ഉപയോഗിക്കുന്ന ഡിസൈൻ മെറ്റീരിയലുകൾ മുതൽ വിസ്കി ബാറുകൾ, ഫുഡ് ഗാർഡനുകൾ, വർക്ക്ഷോപ്പുകൾ എന്നിവ വരെ എല്ലാം സമ്മാനിക്കുന്നു; നിരവധി ആർട്ട് ഇൻസ്റ്റലേഷനുകൾ മുതൽ, ബ്രേക്കുകൾ, ചങ്ങലകൾ, കൂടാതെ ജോലി ആവശ്യമുള്ള മറ്റെന്തെങ്കിലും അറ്റകുറ്റപ്പണികൾ വാഗ്ദാനം ചെയ്യുന്ന മെക്കാനിക്കുകളുടെ ഒരു സംഘം,  തറയിൽ സ്ഥാപിച്ച ഒരു ബൈക്ക് ടെന്റ് വരെ. 

ബ്ലാക്ക് റോക്ക് സിറ്റിയിൽ  ൾ ഈ ആഘോഷത്തിൽ കണ്ടെത്തുന്നതെല്ലാം സൗജന്യമായി സമ്മാനിച്ചതാണ്.

കൂടാതെ വൈൻ ടേസ്റ്റിംഗ്, മസാജുകൾ, സിപ്പ് ലൈനിംഗ്, ടാറ്റൂകൾ എന്നിങ്ങനെയുള്ള മറ്റ് പ്രവർത്തനങ്ങൾ വിവിധ കോണുകളിൽ നടക്കുന്നു. എല്ലാം യാതൊരു ചെലവുമില്ലാതെ ആർക്കും ഫ്രീ  ആയി തുറന്നിരിക്കുന്നു. ദി ബേണിംഗ് മാൻ ഫെസ്റ്റിവലിൽ  പലരും വിവാഹിതരാകുമെന്ന് റിപ്പോർട്ടുകൾ പറയുന്നു.

ബർണർമാരുടെ ശരാശരി പ്രായം 33-34 വയസ്സാണ്. 1 ശതമാനത്തിനടുത്ത് ബർണർമാർ 70 വയസോ അതിൽ കൂടുതലോ പ്രായമുള്ളവരാണ്.  ബർണറുകളിൽ 58 ശതമാനം സ്ത്രീകളാണ് എന്ന് കൂടി പറയുമ്പോൾ സംഗതിയുടെ കളറും കൊഴുപ്പും ഏകദേശ രൂപമായല്ലോ. തെറ്റിദ്ധരിക്കേണ്ട 83 ശതമാനം ബർണറുകളും വെള്ളക്കാരാണ്.  

ബേണിംഗ് മാനിൽ ഡ്രസ് കോഡ് ഇല്ല, അതിനാൽ  വസ്ത്രം ഓപ്ഷണൽ!  എന്നിരുന്നാലും, നഗ്നത പ്രോത്സാഹിപ്പിക്കണമെന്നില്ല. ഓരോരുത്തർക്കും അവർക്ക് എന്താണ് സുഖമെന്ന് തോന്നുന്നുവോ അതനുസരിച്ചു തീരുമാനിക്കാം. പൊതുവേ,  മിക്ക ആളുകൾക്കും നഗ്നത ഒരു പ്രശ്‌നമേയല്ല, കൂടാതെ ഉത്സവത്തിൽ നിങ്ങൾക്ക്‌ ധാരാളം നഗ്നരായ ആളുകളെ കാണാം . 

എന്തൊക്കെ ആയാലും വളരെ അച്ചടക്കത്തിൽ ഈ കൂട്ടായ്മ പര്യവസാനിക്കുന്നു.  "ഒരു തുമ്പും അവശേഷിപ്പിക്കരുത്" എന്ന നിർദ്ദേശമാണ് ഒരുപക്ഷേ ഇതിന്റെ ഏറ്റവും മികച്ച മുദ്രാവാക്യം. "ബേണിംഗ് മാൻ സമാപനത്തിൽ, പങ്കെടുക്കുന്നവർ ചവറ്റുകുട്ടകൾക്കും അവശിഷ്ടങ്ങൾക്കുമായി നിലം പരതുന്നു.  അവരുടേതായതും,  മറ്റ് "ബേണർമാർ" എന്ന് വിളിക്കപ്പെടുന്നവർ  ഉപേക്ഷിച്ചതും, എല്ലാം ക്ളീൻ ആക്കിയെ പറ്റൂ. ബ്ലാക്ക് റോക്ക് സിറ്റിയിൽ ട്രാഷ്‌കാനുകളൊന്നുമില്ല, അതിനാൽ ബർണർമാർ അവർ കൊണ്ടുവന്നതെല്ലാം എടുത്തുകൊണ്ടു പോകേണ്ടി വരും" 

ഇതിന്റെ സംഘാടകനായ മരിയൻ ഗുഡൽ വിശദീകരിക്കുന്നു, "ഈ സമ്പ്രദായം, നിങ്ങൾ മാലിന്യങ്ങളെയും നിങ്ങളെയും,  നിങ്ങൾ ലോകത്തിലേക്ക് കൊണ്ടുവരുന്നതിനെയും കൈകാര്യം ചെയ്യുന്ന കാഴ്ചപ്പാടിന്റെ  രീതിയെ തന്നെ മാറ്റുന്നു." 

വിചിത്രമായ ഒരു ആഘോഷം അല്ലേ !