സൂര്യ കൃഷ്ണമൂര്‍ത്തി ആര്‍ഷ ദര്‍ശന പുരസ്‌കാര സമിതി ചെയര്‍മാന്‍.
കേരള ഹിന്ദുസ് ഓഫ് നോര്‍ത്ത് അമേരിക്ക ( കെ.എച്ച്.എന്‍.എ) ഏര്‍പ്പെടുത്തിയിട്ടുള്ള ആര്‍ഷ ദര്‍ശന പുരസ്‌കാര നിര്‍ണ്ണയ സമിതിയുടെ ചെയര്‍മാനായി പ്രശസ്ത കലാകാരനും സൂര്യ ഫെസ്റ്റിന്റെ അമരക്കാരനുമായ സൂര്യ കൃഷ്ണ മൂര്‍ത്തിയെയും സമിതി അംഗങ്ങളായി പ്രശസ്ത ഭാഷാ പണ്ഡിതനും നോവലിസ്റ്റുമായ ഡോ: ജോര്‍ജ് ഓണക്കൂര്‍, ആനുകാലിക മലയാളസാഹിത്യത്തിന്റെ മഹാ പൈതൃകത്തിന്റെ
തുടര്‍ച്ചക്കാരനും എഴുത്തുകാരനും അമേരിക്കയിലെ പ്രമുഖ ഭിഷഗ്വരനുമായ ഡോ: എം.വി.പിള്ള എന്നിവരെയും നാമനിര്‍ദ്ദേശം ചെയ്തതായി കെ.എച്ച്.എന്‍.എ. പ്രസിഡന്റ് ഡോ: നിഷ പിള്ള അറിയിച്ചു.
ആര്‍ഷഭാരത ദര്‍ശനങ്ങളെ അധികരിച്ചു മലയാള ഭാഷയില്‍ നോവല്‍, കവിത, കഥ, നിരൂപണം, വൈജ്ഞാനിക സാഹിത്യം എന്നിവയില്‍ നല്‍കിയിട്ടുള്ള സമഗ്രസംഭാവനക്കു ഓരോ രണ്ടുവര്‍ഷത്തിലും നല്‍കുന്ന ഈ പുരസ്‌കാരം ഒരു ലക്ഷം രൂപയും
ശില്‍പ്പവും പ്രശസ്തിപത്രവും അടങ്ങുന്നതാണ്.
2017 ല്‍ ആരംഭിച്ച ആര്‍ഷ ദര്‍ശന പുരസ്‌കാരത്തിന്റെ പ്രഥമ ജേതാവ് മഹാകവി അക്കിത്തമായിരുന്നു.
തുടര്‍ന്ന് പ്രമുഖ നോവലിസ്റ്റും കഥാകാരനുമായ സി. രാധാകൃഷ്ണനും കവിയും ചലച്ചിത്ര പ്രതിഭയുമായ ശ്രീകുമാരന്‍ തമ്പിയും ഈ പുരസ്‌കാരത്തിന് അര്‍ഹരായിട്ടുണ്ട്.
സൂര്യ കൃഷ്ണമൂര്‍ത്തിയുടെ നേതൃത്വത്തിലുള്ള കമ്മിറ്റി കണ്ടെത്തുന്ന പുരസ്‌കാര ജേതാവിനെ തിരുവോണം നാളില്‍ പ്രഖ്യാപിക്കുന്നതും 2025 ജനുവരി മാസം കൊച്ചിയില്‍ നടക്കുന്ന കെ.എച്ച്.എന്‍.എ. കേരള സംഗമത്തില്‍ വെച്ച് പുരസ്‌കാര സമര്‍പ്പണം നടത്തുന്നതുമാണ്. ഇതു സംബന്ധിച്ച വിവിധ പ്രവര്‍ത്തനങ്ങള്‍ ഏകോപിപ്പിക്കുന്നത് ഡോ: നാരായണന്‍ നെയ്തലത്ത്, സുരേന്ദ്രന്‍ നായര്‍ എന്നിവര്‍ ഉള്‍പ്പെട്ട സബ് കമ്മിറ്റിയാണ്.
EMalayalee Available in MediaAppUSA
Copyright © 2024 emalayalee.com - All Rights Reserved.
Webmastered by MIPL, Web Hosting Calicut Kerala