അമേരിക്കൻ പൗരന്മാരെ വിവാഹം കഴിച്ചു വർഷങ്ങളായി രാജ്യത്തു ജീവിക്കുന്ന അനധികൃത കുടിയേറ്റക്കാർക്കു നിയമ പരിരക്ഷ നൽകാനുള്ള പദ്ധതി പ്രസിഡന്റ് ജോ ബൈഡൻ പ്രഖ്യാപിച്ചു. ചൊവാഴ്ച്ച വൈറ്റ് ഹൗസ് പ്രഖ്യാപിച്ച പദ്ധതി അനുസരിച്ചു രേഖകൾ ഇല്ലാത്ത 500,000 പേർക്കെങ്കിലും ഇതിന്റെ പ്രയോജനം ലഭിക്കും. അവർക്കു ഗ്രീൻ കാർഡ് കിട്ടാൻ നാട്ടിലേക്കു മടങ്ങിപ്പോയി ദീർഘകാലം കാത്തിരിക്കേണ്ട ആവശ്യം ഉണ്ടാവില്ല. യുഎസിൽ തുടരുകയും ജോലി ചെയ്തു ജീവിക്കയും ചെയ്യാം.
അമേരിക്കൻ പൗരനെ വിവാഹം കഴിച്ചാലും ഗ്രീൻ കാർഡ് കിട്ടാൻ നാട്ടിലേക്കു മടങ്ങണം എന്ന വ്യവസ്ഥ നിലവിലുണ്ട്. എന്നാൽ ബൈഡൻ നൽകുന്ന ഇളവനുസരിച്ചു അവർക്കു യുഎസിൽ തുടരാം. ഇളവ് ലഭിക്കാൻ അവർ 10 വർഷമെങ്കിലും യുഎസിൽ താമസിച്ചിരിക്കണം. ക്രിമിനൽ റെക്കോർഡ് ഉണ്ടാവാൻ പാടില്ല.
തിരഞ്ഞെടുപ്പിൽ നിർണായകമാവുന്ന ജോർജിയ, അരിസോണ, നെവാഡ പോലുള്ള സംസ്ഥാനങ്ങളിൽ ഈ ഇളവ് ബൈഡനു വലിയ പ്രയോജനം നൽകുമെന്നു കരുതപ്പെടുന്നു. ലാറ്റിനോ വോട്ടർമാർക്ക് ഏറെ സന്തോഷം പകരുന്ന നടപടിയാണിത്.
സൈനികരുടെ കുടുംബങ്ങളിൽ ഇപ്പോൾ ലഭ്യമായ ഈ ആനുകൂല്യത്തിന് Parole in place എന്നാണ് പേര്. അതിർത്തിയിൽ അനധികൃത പ്രവേശനം തടയാൻ ബൈഡൻ കൊണ്ടുവന്ന പുതിയ ചട്ടങ്ങളിൽ രോഷം പൂണ്ടവർക്കും ഇത് സന്തോഷം നൽകുമെന്നാണ് പ്രതീക്ഷ.
യുഎസ് പൗരന്മാരെ വിവാഹം കഴിച്ചു രേഖകൾ ഇല്ലാതെ 10 വർഷം യുഎസിൽ കഴിഞ്ഞവർ രാജ്യത്തിൻറെ സമ്പദ് വ്യവസ്ഥയ്ക്കു സംഭാവനകൾ നൽകിയിട്ടുണ്ടെന്ന് റെപ്. ജീസസ് ഗാർഷ്യ (ഡെമോക്രാറ്റ്-ഇല്ലിനോയ്) ചൂണ്ടിക്കാട്ടി. അവർ നാടുകടത്തൽ ഭയന്നാണ് ജീവിക്കുന്നത്. അക്കൂട്ടർക്കാണ് ഈ ആനുകൂല്യം കിട്ടുന്നത്.
ബൈഡൻ അനധികൃത കുടിയേറ്റക്കാർക്ക് പൊതുമാപ്പ് നൽകുകയാണെന്നു റിപ്പബ്ലിക്കൻ പക്ഷം ആക്ഷേപിച്ചു.
Biden announces relief to undocumented immigrants