തിരുവനന്തപുരം: ഐഎസ്ആർഒ ചാരക്കേസ് കെട്ടിച്ചമച്ചതെന്ന് സിബിഐ. സിഐ ആയിരുന്ന എസ്. വിജയനാണ് കേസ് കെട്ടിച്ചമച്ചതെന്ന് സിബിഐ കണ്ടെത്തി. ഗൂഢാലോചന കുറ്റപത്രത്തിലാണ് സിബിഐ കണ്ടെത്തൽ. കുറ്റസമ്മതം നടത്താൻ മറിയം റഷീദയെ കസ്റ്റഡിയിൽ പീഡിപ്പിച്ചെന്നും തെളിവുകളില്ലാതെയാണ് നമ്പി നാരായണനെ സിബി മാത്യൂസ് അറസ് ചെയ്തതെന്നും കുറ്റപത്രത്തിൽ പറയുന്നു.
കുറ്റപത്രം അംഗീകരിച്ച കോടതി ജൂലായ് 26ന് പ്രതികള് നേരിട്ട് ഹാജരാകാന് ആവശ്യപ്പെട്ടു. ഹോട്ടലില് വെച്ച് വിജയന് മറിയം റഷീദയെ കടന്നുപിടിച്ചപ്പോള് തടഞ്ഞതാണ് വിരോധമെന്ന് കുറ്റപത്രത്തില് പറയുന്നു.
മറിയം റഷീദയെ അറസ്റ്റ് ചെയ്ത് ദിവസങ്ങള് കഴിഞ്ഞാണ് ചാരക്കേസ് രജിസ്റ്റര് ചെയ്തത്. അവര്ക്കെതിരെ വഞ്ചിയൂര് സ്റ്റേഷനില് തെളിവുകളില്ലാതെ കേസെടുപ്പിച്ചു. മറിയം റഷീദയെ അന്യായ തടങ്കലില് വയ്ക്കുകയും ഐബിയെ ചോദ്യം ചെയ്യാന് അനുവദിക്കുകയും ചെയ്തു. മറിയം റഷീദയെ കസ്റ്റഡിയില് വച്ച് പീഡിപ്പിച്ചു. കുറ്റസമ്മതം നടത്താനായിരുന്നു പീഡനമെന്നും കുറ്റപത്രത്തില് പറയുന്നു.
രണ്ടാം പ്രതി സിബി മാത്യൂസ് തെളിവുകളൊന്നുമില്ലാതെയാണ് നമ്പി നാരായണനെ അറസ്റ്റ് ചെയ്തതെന്ന കുറ്റപത്രത്തില് പറയുന്നു. എസ്ഐടി കസ്റ്റഡിയിലുള്ളപ്പോള് പോലും ഐബി ഉദ്യോഗസ്ഥര് നിയമവിരുദ്ധമായി ചോദ്യം ചെയ്തെന്നും വ്യാജ രേഖകള് ഉണ്ടാക്കിയത് അന്വേഷണ സംഘത്തിലുണ്ടായിരുന്ന ഡിവൈഎസ്പി കെകെ ജോഷ്വയായിരുന്നുവെന്നും കുറ്റപത്രത്തില് പറയുന്നു. ചാരവൃത്തി നടത്തിയെന്ന് എഴുതി ചേര്ത്ത കേസില് ഒരു തെളിവുമില്ല. പ്രതി ചേര്ത്തവരുടെ വീട്ടില് നിന്നും ഒന്നും കണ്ടെത്തിയതുമില്ല.
മുൻ ഐബി ഉദ്യോഗസ്ഥൻ ജയപ്രകാശ് കസ്റ്റഡിയില് വെച്ച് നമ്ബി നാരായണനെ മർദിച്ചുവെന്നും കുറ്റപത്രത്തില് പറയുന്നു.