ഉറങ്ങാനാവാതെ (രാജു തോമസ്)

വസന്തത്തിൽ
നവാങ്കുരങ്ങളുടെ മർമ്മരം--
കൈകാലുകളിളക്കിക്കളിക്കൂം
ശിശുവിന്റെ ഹൃദ്യലീല;
ഗ്രീഷ്‌മത്തിൽ, കാമിച്ചുപോകും
പത്രസമൃദ്ധിയുടെ ഭേരി--
പച്ചനോട്ടുകളെണ്ണുന്ന
ഉണ്ടായ്‌മയുടെ രജോജാഗ്രത;
ശരത്തിൽ, കൊഴിയുംമുമ്പു
വിറച്ചുപാർത്ഥിക്കുന്ന
പഴുത്തിലകളുടെ വിതുമ്പൽ--
അനിവാര്യതയ്‌ക്കു മുന്നിൽ
ഡയറിയുടെ മങ്ങിയ താളുകൾ
മറിച്ചുനോക്കുന്ന തയ്യാറെടുപ്പ്;
ശിശിരത്തിൽ, ശിഖരപഞ്ജരങ്ങളിലൂടെ
ചൂളംവിളിക്കുന്ന ശീതം--
ശ്‌മശാനത്തിലെ നിശ്ശൂന്യത.

നിർന്നിദ്രയാമങ്ങളിൽ
വെളിവാകുമവയെല്ലാം:
എണ്ണമറ്റ മനുഷ്യജന്തുസസ്യങ്ങളുടെ
ജനനമരണങ്ങൾക്കിടയിലെ
പാടിത്തീരാത്ത കഥകൾ--
കാമനയുടെ മുഗ്ദ്ധതയുടെ,
വീണപൂക്കളുടെ അദൃശ്യതയുടെ,
ഉദഗ്രാവേഗങ്ങളിലെ
അമിതാത്മവിശ്വാസത്തിന്റെ,
അവയുടെയടിക്കൽസ്വാർത്ഥതയുടെ,
വാർദ്ധക്യത്തിന്റെ ദൈന്യതയുടെ--
സംക്രമങ്ങളുടെ സൗരഗാനവും,
‘വെളിപ്പാടു’ കൊടുക്കാതെ
അവയ്‌ക്കെല്ലാമെപ്പൊഴും
അനുപല്ലിവിപാടി ഗൂഢ-
തമമായേ മുഴങ്ങും സനാ-
തനസാഗരസ്വരങ്ങളും.

അശാന്തസമുദ്രത്തിൽ
ആമയും തിമിംഗലവുംവരെ
ജീവികളെല്ലാം ചത്തുമലച്ച്
കപ്പലിനെ നിശ്ചലമാക്കുമ്പോൾ,
ദിക്കുകാട്ടാത്ത രാത്രിയിൽ
കാലസന്ധിയിലകപ്പെട്ടവൻ
ഉറങ്ങുവതെങ്ങനെ?
കടലിന്റെ ചീയുംഗന്ധവും
കഴുത്തിൽ തൂക്കപ്പെട്ട
അഴുകുന്ന ‘ആലബട്രോസ്സും’
തന്നെ ഉറക്കുകയില്ല.
കൂടെപ്പോന്നവർ ‘ലോട്ടസ്‌ക്കനി’ തിന്ന്
ഉറങ്ങിപ്പോയിരിക്കുന്നു.
ഇനി ശത്രു കള്ളനെപ്പോലെ വരുമ്പോൾ
അയാൾ തിരിച്ചറിഞ്ഞൂപിടിക്കപ്പെടുന്നതും
കുറ്റംവിധിക്കപ്പെടുന്നതും
ഉറങ്ങാതിരിക്കയാലാവും.

Facebook Comments

Comments

(ഡോ.കെ) 2024-08-19 19:36:10

ധാരാളം ദാർശനികമായ പലപ്രകാരത്തിലുള്ള ചർച്ചകളിലേക്ക് പോകാൻ സാഹചര്യമൊരുക്കുന്നഈ ദാർശനിക കവിത കലാപരിധിയില്ലാത്ത സ്നേഹത്തിന്റെ ഗ്യാരണ്ടിയാണ് താൻ ഭാഗമായി ജീവിക്കുന്ന പ്രകൃതിയോട് പ്രകാശിപ്പിക്കുന്നത്. ജനന മരണങ്ങളുടെ ആവർത്തനം ജൻമ്മങ്ങളിൽ നിന്നും ജന്മാന്തരത്തിലേക്കുള്ള നിരന്തര യാത്രയാണ്‌ ഈ സംസാരലോകം.പ്രകൃതിക്കും ഈ സംസാരലോകം ബാധകമാണെന്ന് കവി ഋതുക്കളിലുള്ള മാറ്റങ്ങൾ ചൂണ്ടിക്കാണിച്ച് നന്മെ ബോധ്യപെടുത്തുന്നുണ്ട്. പ്രകൃതിയിലെ നാല് ഋതുക്കളിലുള്ള മാറ്റങ്ങൾ അങ്ങേയറ്റം ആത്മാർഥമായി ലയിച്ച് ചിലപ്പോൾ സന്തോഷത്തോടും ചിലപ്പോൾ സന്താപത്തോടും വിവരിക്കുന്നത് അത്യന്തം ആദരവും ആശ്ചര്യവും കലർന്നതാണ്. പ്രകൃതിയെ ഇത്രമാത്രം ആരാധിക്കുന്നു ഹൃദയസംസ്‌ക്കാരം ശ്രീ രാജുവെന്ന കവിക്കല്ലാതെ മറ്റാർക്കും അവകാശപ്പെടാനാവില്ല. പ്രകൃതിയും,ദൈവവും,സകല പ്രാണികളും ,മനുഷ്യനും ഒന്ന് തന്നെയെന്ന് കരുതുന്ന കവിയുടെ മനസ്സ് വർണ്ണനാതീതമാണ് . ആശ്രമ ജീവിതം (തപസ്സ് )കൂടാതെ ഇപ്രകാരമൊരു കവിത എഴുതാൻ സാധ്യമല്ല .ആ പൂർവ്വകമായ “ശ്രമ്മ് തപസി” എന്ന ധാതുവിൽ നിന്നാണ് ആശ്രമം എന്ന ശബ്ദം സിദ്ധമാകുന്നത് .ലക്ഷ്യ പ്രാപ്തി (കവിതയെഴുതി തീരുന്നതുവരെ ) പരിപൂർണ്ണമായി തപസ്സ് ചെയ്യാനുള്ള ഘട്ടമാണ് ആശ്രമം.കേരളത്തിൽ നിന്നുപോലും ഇതുപോലൊരു കവിതജനിക്കില്ല.

(ഡോ.കെ) 2024-08-19 22:57:39

കാലപരിധിയില്ലാത്ത*

Raju Thomas 2024-08-20 12:35:34

ഒരു രചനയെപ്പറ്റി ഒന്നും പറയാതിരിക്കുക എന്നാൽ അതിനെ അവഗണിക്കുക എന്നുമാവും. അത് തന്ത്രപരമായൊരു ഖണ്ഡനവിമർശനരീതിയുമാണ്. അതുകൊണ്ടാണല്ലോ, വിവരവും വ്യുൽപത്തിയുമുള്ള എഴുത്തുകാരുടെയും വായനക്കാരുടെയും നീണ്ടൊരു നിരയുള്ള ഈമലയാളിയിൽ, ഡോ കേയെപ്പോലുള്ളവരുടെ ആർജ്ജവം മൗഢ്യമാവുന്നത്. മറ്റൊരാളെ അഭിനന്ദിച്ചാൽ നമ്മുടെ മഹത്വത്തിനു മങ്ങലേൽക്കുമല്ലൊ. നമുക്ക് ഇങ്ങനെതന്നങ്ങു പോകാം-- ഇനിയും ധാരാളം സമയമുണ്ടല്ലോ! Vanity unashamed! As for myself doing poetry, I just try to be true to myself and to Saraswathy.

ഉറങ്ങാനാവാതെ (രാജു തോമസ്)

PATHRANGAL

US WEBSITES

EMalayalee Available in MediaAppUSA