ദുല്‍ഖർ സല്‍മാൻ നായകനായ പാൻ ഇന്ത്യൻ തെലുങ്ക് ചിത്രം ലക്കി ഭാസ്കർ അഡ്വാൻസ് ബുക്കിങ്ങിന് ഗംഭീര പ്രേക്ഷക പ്രതികരണം.

കേരളത്തിന് അകത്തും പുറത്തും വിദേശത്തും മികച്ച ബുക്കിംഗ് ആണ് ചിത്രത്തിന് ലഭിക്കുന്നത്. കേരളത്തിന് പുറമെ തമിഴിലും തെലുങ്കിലും ദുബായിലും വമ്ബൻ ബുക്കിംഗ് ആണ് ചിത്രത്തിന് ലഭിച്ചു കൊണ്ടിരിക്കുന്നത്.

ആന്ധ്ര, തെലുങ്കാന സംസ്ഥാനങ്ങളില്‍ ഒക്ടോബർ 30 വൈകുന്നേരം 6 മണി മുതല്‍ നൂറിലധികം പ്രീമിയർ ഷോകളാണ് ചിത്രത്തിനായി ഒരുക്കിയിരിക്കുന്നത്. ആ പ്രീമിയർ ഷോകളെല്ലാം ഇതിനോടകം തന്നെ ഹൗസ്‌ഫുള്ളിലേക്കു കുതിക്കുകയാണ്. ചിത്രത്തിന്റെ യുഎസ്‌എ പ്രീമിയർ ഷോകള്‍ക്കും മികച്ച ബുക്കിംഗ് ലഭിക്കുന്നുണ്ട്. ഒക്ടോബർ 31 ന് ദീപാവലിക്കാണ് ചിത്രം ആഗോള തലത്തില്‍ റിലീസ് ചെയ്യുക.

കേരളത്തില്‍ ഒരു കോടി രൂപയ്ക്കു മുകളില്‍ പ്രീ സെയില്‍സ് പ്രതീക്ഷിക്കുന്ന ചിത്രം ഓള്‍ ഇന്ത്യ തലത്തിലും വമ്ബൻ ഓപ്പണിങ് ആണ് ലക്ഷ്യം വെക്കുന്നത്. വെങ്കി അറ്റ്ലൂരി രചിച്ച്‌ സംവിധാനം ചെയ്ത ചിത്രം കേരളത്തിലും ഗള്‍ഫിലും വമ്ബൻ റിലീസായി വിതരണം ചെയ്യുന്നത് ദുല്‍ഖർ സല്‍മാന്റെ വേഫെറർ ഫിലിംസാണ്. ബുക്ക് മൈ ഷോ, ടിക്കറ്റ് ന്യൂ, പേ ടിഎം, ക്യാച്ച്‌ മൈ സീറ്റ് തുടങ്ങിയ ആപ്പുകളിലൂടെ ഇതിനോടകം ആയിരകണക്കിന് ടിക്കറ്റാണ് ചിത്രത്തിന്റേതായി കേരളം, തമിഴ്നാട്, ആന്ധ്ര സംസ്ഥാനങ്ങളില്‍ വിറ്റഴിഞ്ഞത്.

പീരീഡ് ഡ്രാമ ത്രില്ലറായി ഒരുക്കിയ ഈ ചിത്രം ദുല്‍ഖറിന്റെ കരിയറിലെ ഏറ്റവും വലിയ ആഗോള ഓപ്പണിങ് സ്വന്തമാകുമെന്നാണ് ഇപ്പോഴത്തെ ട്രെൻഡ് സൂചിപ്പിക്കുന്നത്. സൂര്യദേവര നാഗവംശി, സായി സൗജന്യ എന്നിവരുടെ നേതൃത്വത്തിലുള്ള സിതാര എന്റർടൈൻമെൻറ്സും ഫോർച്യൂണ്‍ ഫോർ സിനിമാസും ചേർന്ന് നിർമ്മിച്ച ചിത്രം അവതരിപ്പിക്കുന്നത് ശ്രീകര സ്റ്റുഡിയോസ്.