കാലിഫോർണിയയിൽ നിന്ന് നിലവിലുള്ള കോൺഗ്രസ് അംഗങ്ങളായ അമി ബെറയും റോ ഖന്നയും വീണ്ടും വിജയിച്ചു.

57.5 ശതമാനം വോട്ട് നേടിയ അമി ബേര 72,152 വോട്ടുകൾ നേടി. റോ ഖന്നയ്ക്ക് 65.9 ശതമാനം  ലഭിച്ചു,  95,200 വോട്ടുകൾ. കാലിഫോർണിയയിലെ 17-ാം ഡിസ്ട്രിക്റ്റിനെ പ്രതിനിധീകരിക്കുന്ന റോ ഖന്നയുടെ എതിരാളി റിപ്പബ്ലിക്കൻ പാർട്ടിയിലെ അനിത ചെൻ   49,284 വോട്ടുകൾ നേടി അഥവാ 34.1 ശതമാനം.  2016-ൽ ആദ്യമായി തിരഞ്ഞെടുക്കപ്പെട്ട ഖന്ന, സാങ്കേതിക-തൊഴിൽ അവകാശങ്ങൾക്കുവേണ്ടിയുള്ള   പ്രമുഖ അഭിഭാഷകനാണ്.

കോൺഗ്രസിൽ ഏറ്റവും കൂടുതൽ കാലം സേവനമനുഷ്ഠിച്ച ഇന്ത്യൻ അമേരിക്കക്കാരനായ അമി ബെറ, സാക്രമെൻ്റോ കൗണ്ടി ഉൾപ്പെടുന്ന കാലിഫോർണിയയിലെ ആറാമത്തെ കോൺഗ്രസ്സ് ഡിസ്ട്രിക്റ്റിനെ പ്രതിനിധീകരിച്ച് ഏഴാം തവണയും വിജയിച്ചു. 2013 മുതൽ സേവനമനുഷ്ഠിച്ച ബെറ, ആരോഗ്യ സംരക്ഷണം, നയതന്ത്രം, ഉഭയകക്ഷി നയങ്ങൾ എന്നിവയിൽ ശ്രദ്ധ കേന്ദ്രീകരിച്ചതിന് പ്രശസ്തനാണ്. റിപ്പബ്ലിക്കൻ സ്ഥാനാർത്ഥി ക്രിസ്റ്റീൻ ബിഷിനെ 72,152 വോട്ടുകൾക്ക് (57.5 ശതമാനം) പരാജയപ്പെടുത്തി, ക്രിസ്റ്റീൻ ബിഷിന് 53,290 വോട്ടുകൾ (42.5 ശതമാനം) ലഭിച്ചു.

കൻസാസിലെ മൂന്നാം കോൺഗ്രസ്സ് ഡിസ്ട്രിക്റ്റിലെ റിപ്പബ്ലിക്കൻ സ്ഥാനാർത്ഥി  പ്രശാന്ത് റെഡ്ഡി  ഡെമോക്രാറ്റ് ഷാരിസ് ഡേവിഡ്സിനോട് തോറ്റു. റെഡ്ഢിക്ക്  162,286 വോട്ടുകൾ അല്ലെങ്കിൽ 42.8 ശതമാനം കിട്ടി.  എതിരാളിക്ക്  201,878 വോട്ടുകൾ അല്ലെങ്കിൽ 53.2 ശതമാനം.

ഇഞ്ചോടിഞ്ച് പോരാട്ടത്തിനൊടുവിൽ ജോർജിയ സ്റ്റേറ്റ്  സെനറ്റ് സീറ്റ് അശ്വിൻ രാമസ്വാമിക്ക് നഷ്ടമായി
രാമസ്വാമിക്ക് 48 ശതമാനം വോട്ട് ലഭിച്ചു, ആകെ 30,655 വോട്ടുകൾ. എതിർത്ത ഷോൺ സ്റ്റിലിനു  33,530 വോട്ടുകൾ ലഭിച്ചു.