അങ്ങനെ ട്രമ്പ് വിജയിച്ചു. സന്തോഷം കൊണ്ട് ഇരിക്കാന്‍ മേലാ- എനിക്കല്ല, എന്റെ പ്രിയതമ പുഷ്പാജിക്ക്.

എന്തുകൊണ്ടോ അവള്‍ക്ക് കമലാ മാഡത്തിനെ അത്ര ഇഷ്ടമല്ല., ' ആ പെണ്ണുംപിള്ള എപ്പോഴും ഇളിച്ചുകൊണ്ടാ നടക്കുന്നത്. ഒരുമാതിരി വളിച്ച ചിരി' -അതവള്‍ക്ക് സഹിക്കാന്‍ കഴിയുന്നില്ല.

കമലാ ഹാരിസ് ചിലപ്പോള്‍ എന്നെ നോക്കിയാണ് ചിരിക്കുന്നത് എന്നവള്‍ക്ക് തോന്നും.

'എന്തോന്നാ ഇത്രകണ്ട് ന്യൂസ് കാണാന്‍- എഴുന്നേറ്റ് പോകരുതോ? ആ എരണം കെട്ടവളുടെ ഒരു ചിരി കാണാന്‍ കുത്തിയിരിക്കുന്നു'.

ഏതെങ്കിലും അല്പസ്വല്പം ചന്തമുള്ള ഒരു തരുണീ മണി എന്നെ നോക്കി ഒന്നു പുഞ്ചിരിച്ചാല്‍, ഒരു സംശയദൃഷ്ടിയോടെ അവള്‍ എന്നെയൊന്ന് നോക്കും.- എന്നിട്ടൊരു കമന്റും.

' എനിക്കൊന്നും അറിയത്തില്ല എന്നാ ഇങ്ങേരുടെ വിചാരം. ഞാനത്ര പൊട്ടിയൊന്നുമല്ല' അതിന് അകമ്പടിയായി അമക്കിയൊരു മൂളലും.

അമേരിക്കയില്‍, മലയാളികളുടെ ഗൃഹഭരണത്തിന്റെ അവസാന വാക്ക്, സ്ത്രീകള്‍ ആണെങ്കില്‍ തന്നെയും, നാടു ഭരിക്കുന്നത് പുരുഷന്മാരായിരിക്കണം എന്ന ചിന്താഗതിയുള്ള ധാരാളം വനിതകളുണ്ട്. അതുകൊണ്ടാണ് ദേവാലയങ്ങളിലും, മറ്റ് സംഘടനകളിലും മലയാളി പുംഗവന്മാര്‍ കിടന്നു വിലസുന്നത്.

പറഞ്ഞുവന്നത് ട്രംമ്പ്- കമലാ മത്സരത്തിനെപ്പറ്റിയാണല്ലോ! തിരഞ്ഞെടുപ്പ് ദിവസം വോട്ടെണ്ണല്‍ തുടങ്ങുന്നതിനു മുമ്പ് തന്നെ, ട്രംമ്പ് വിജയിച്ചു എന്നുള്ള സന്തോഷ വാര്‍ത്ത നാട്ടിലുള്ള ബന്ധുമിത്രാദികളെയൊക്കെ വിളിച്ചറിയിച്ച് എന്റെ ഭാര്യ ആഹ്ലാദ പ്രകടനം നടത്തി.

ദോഷം പറയരുതല്ലോ! എനിക്കും ഒരു ചെറിയ ട്രംമ്പ് ചായ് വ് ഉണ്ടായിരുന്നു. രണ്ട് സ്ഥാനാര്‍ത്ഥികളും മെച്ചമൊന്നുമല്ല- എങ്കിലും 'തമ്മില്‍ ഭേദം തൊമ്മന്‍' എന്നൊരു ലൈന്‍!

പത്തു ദിവസം മുമ്പ് തന്നെ ഞങ്ങള്‍ തപാല്‍ വഴി വോട്ട് രേഖപ്പെടുത്തി. 
'ആരു ജയിച്ചാലും നമുക്കെന്താ?' എന്നൊരു നിസ്സംഗതയായിരുന്നു എനിക്ക്.

എങ്കിലും പതിവ് തെറ്റിക്കാതെ പാതിരാത്രി വരെ ഉറക്കമിളച്ചിരുന്നു ഞാന്‍ വാര്‍ത്ത കണ്ടു.

ഇടയ്ക്ക് ചാനലൊന്നു മാറ്റിയപ്പോള്‍ പാലക്കാട്ട് പൂരമടി- അവിടെ ഉപതെരഞ്ഞെടുപ്പ് നടക്കുകയാണ്. ആര് ജയിച്ചാലും തോറ്റാലും ഭരണത്തിലൊരു മാറ്റവും ഉണ്ടാകാന്‍ പോകുന്നില്ല. പോലീസും, പാര്‍ട്ടിക്കാരും, ചേരി തിരിഞ്ഞ് ചീത്ത പറച്ചിലും ഉന്തും തള്ളും- അവിടെ ആരോ കള്ളപ്പണം കൊണ്ടുവന്നെന്നും, ്അത് വീതിച്ച് നല്‍കിയെന്നും, പോലീസ് വന്നപ്പോള്‍ കണ്ടുംവഴി ഓടിയെന്നും മറ്റുമാണ് കഥ.

അമേരിക്കയില്‍ ലോക രാഷ്ട്രത്തലവന്റെ തിരഞ്ഞെടുപ്പ് നടക്കുകയാണ്. സായിപ്പ്, മദാമ്മയ്‌ക്കൊരു 'ഗുഡ് നൈറ്റ്' കിസും നല്‍കിയിട്ട് കൂര്‍ക്കംവലിച്ച് കിടന്ന് ഉറങ്ങുകയാണ്. ആര് ജയിച്ചാലും തോറ്റാലും പിറ്റേന്ന് രാവിലെ എഴുന്നേറ്റ് ജോലിക്ക് പോയില്ലെങ്കില്‍ പണി പാളിയതുതന്നെ !
'ഇവിടെ പാലുകാച്ചല്‍, അവിടെ പുരയ്ക്ക് തീ കത്തുന്നു'

വാര്‍ത്തയില്‍ ലയിച്ചിരുന്ന ഞാന്‍  മയങ്ങിപ്പോയി. രാവിലെ കണ്ണ് തുറന്നു നോക്കിയപ്പോള്‍, ദാ കിടക്കുന്നു നമുക്കൊരു പുതിയ പ്രസിഡന്റ്- വര്‍ദ്ധിത വീര്യത്തോടെ, സാക്ഷാല്‍ ഡോണള്‍ഡ് ട്രംമ്പ് വീണ്ടും അധികാരത്തില്‍-

ഇനി ലോകത്തിന്റെ ഗതി ഒന്നു മാറിമറിയും. ഇന്‍ഡ്യ സെയ്ഫാണ്. നമ്മുടെ മോദിജിയും, ട്രംമ്പ് ജിയും തമ്മില്‍ ചക്കരയും തേങ്ങയും പോലെയാണ്. ഒരു 'എടാ- പോടാ' ബന്ധമാണ് അവര്‍ തമ്മില്‍.

ഇസ്രയേല്‍ എന്തു വേണ്ടാതീനം കാണിച്ചാലും ട്രംമ്പിന്റെ പരിപൂര്‍ണ്ണ പിന്തുണ അവര്‍ക്കുണ്ട്. അവരെ ആര് വിരട്ടിയാലും, ബൈഡന്റെ അപ്പച്ചനെപ്പോലെ വെറുതെ 'ഞഞ്ഞാ പിഞ്ഞാ' പറഞ്ഞോണ്ടിരിക്കില്ല.

ചുവന്ന ബട്ടണും, പച്ച ബട്ടണുമെല്ലാം വെളുത്ത ട്രംമ്പിന്റെ കറുത്ത് ബ്രീഫ് കെയ്‌സിലുണ്ട്. ആരെങ്കിലും എന്തെങ്കിലും പോക്കണംകേട് പറഞ്ഞ് അമേരിക്കയെ ചൊറിയാന്‍ വന്നാല്‍, ഇടംവലം നോക്കാതെ ഏതെങ്കിലും ബട്ടണമര്‍ത്തും.

വിവരവും വെള്ളിയാഴ്ചയുമൊന്നുമില്ലാത്ത കക്ഷിയാണ്- വരുംവരാഴികയൊന്നും പുള്ളിക്കൊരു പ്രശ്‌നമല്ല.

ഏതായാലും എല്ലാവരും ഒന്നു കരുതിയിരിക്കുന്നത് നല്ലതാണ്.

അങ്ങിനെ അമേരിക്കയുടെ 47-മത് പ്രസിഡന്റായി തിരഞ്ഞെടുക്കപ്പെട്ട മിസ്റ്റര്‍ ഡൊണാള്‍ഡ് ട്രംമ്പിന് അഭിനന്ദനങ്ങള്‍! ആശംസകള്‍!

GOD BLESS AMERCA