ദുരൂഹതകളിലൂടെ പ്രേക്ഷകമനസ്സിനെ കീഴ്‌പ്പെടുത്തിയ മലയാളത്തിലെ ഇമോഷണല്‍ മിസ്റ്ററി ത്രില്ലര്‍ കിഷ്‌കിന്ധാ കാണ്ഡം നവംബര്‍ 19 മുതല്‍ Dinsey+ Hotstar-ല്‍ സ്ട്രീമിംഗ് ആരംഭിക്കുന്നു. ബാഹുല്‍ രമേഷ് രചനയും ഛായാഗ്രഹണവും നിര്‍വ്വഹിച്ചിരിക്കുന്ന ഈ മിസ്റ്ററി ത്രില്ലറിന്റെ സംവിധാനം    ദിന്‍ജിത്ത് അയ്യത്താനാണ്. ഗുഡ്വില്‍ എന്റര്‍ടെയിന്‍മെന്റ്‌സിന്റെ ബാനറില്‍ ജോബി ജോര്‍ജ് തടത്തിലാണ്  ഈ ചിത്രം നിര്‍മ്മിച്ചിരിക്കുന്നത്.

ആസിഫ് അലി, അപര്‍ണ ബാലമുരളി, വിജയരാഘവന്‍, ജഗദീഷ്, അശോകന്‍,  ഷെബിന്‍ ബെന്‍സണ്‍, വൈഷ്ണവി രാജ്, മാസ്റ്റര്‍ ആരവ്, മേജര്‍ രവി, നിഴല്‍ഗല്‍ രവി,  നിഷാന്‍, അര്‍ജുന്‍ അമ്പാട്ട, ശ്രാവണ്‍ കെ ദേവ് എന്നിവര്‍  ഈ  മിസ്റ്ററി ത്രില്ലറില്‍  പ്രധാന കഥാപാത്രങ്ങളെ അവതരിപ്പിക്കുന്നു.

ഒരു തറവാട്ടിലെ മൂന്ന് ജീവിതങ്ങളെ കുറിച്ചുള്ള കഥ, നമ്മള്‍ കണ്ട് പരിചയിച്ച സസ്‌പെന്‍സിനെക്കാള്‍ അപ്പുറം സഞ്ചരിക്കുന്നു. മൂന്നു വ്യത്യസ്ത വ്യക്തിത്വങ്ങളായ അപ്പു പിള്ള, മകന്‍ അജയചന്ദ്രന്‍, അജയന്റെ ഭാര്യ അപര്‍ണ എന്നിവരിലൂടെയാണ് കഥ സഞ്ചരിക്കുന്നത്. അപ്പു പിള്ളയുടെ കാണാതായ തോക്കിനെ ചുറ്റിപ്പറ്റിയുള്ള അന്വേഷണത്തിലൂടെയാണ് കഥ ആരംഭിക്കുന്നത്. ഭര്‍ത്താവിന്റെ കുടുംബത്തെക്കുറിച്ച് ആകാംക്ഷയുള്ള അപര്‍ണ, മറഞ്ഞിരിക്കുന്ന സത്യങ്ങള്‍ വെളിപ്പെടുത്താന്‍ സ്വന്തം അന്വേഷണത്തിലേക്ക് കടക്കുന്നതിലൂടെ കഥ കൂടുതല്‍ ആകാംക്ഷഭരിതമാകുന്നു. വൈവിധ്യമാര്‍ന്ന കഥാമുഹൂര്‍ത്തങ്ങള്‍, പ്രേക്ഷകരെ പിടിച്ചിരുത്തുന്ന കഥനരീതി, ഒട്ടേറെ പുതുമകളും പ്രത്യേകതകളും നിറഞ്ഞ കഥാപാത്രങ്ങള്‍ എന്നിവ കിഷ്‌കിന്ധാ കാണ്ഡത്തെ വേറിട്ട് നിര്‍ത്തുന്നു.

സൂരജ് ഇ.എസ് എഡിറ്റിങ് നിര്‍വ്വഹിച്ചിരിക്കുന്ന ഈ ചിത്രത്തിന്റെ സംഗീത സംവിധാനം മുജീബ് മജീദാണ്.

മലയാളം, തമിഴ്, തെലുങ്ക്, കന്നഡ, ഹിന്ദി എന്നീ അഞ്ച് ഭാഷകളിലാണ് കിഷ്‌കിന്ധാ കാണ്ഡം സ്ട്രീമിംഗ് ചെയ്യുന്നത്.

മനസ്സിനെ സ്പര്‍ശിക്കുന്ന മനോഹര ദൃശ്യാനുഭവം കാണാതെ പോകരുത്. നവംബര്‍ 19  മുതലാണ് കിഷ്‌കിന്ധാ കാണ്ഡം ഡിസ്‌നി+ ഹോട്ട്സ്റ്റാറില്‍ സ്ട്രീമിംഗ് ആരംഭിക്കുന്നത്.