ന്യൂയോര്‍ക്ക്:  നോര്‍ത്ത് അമേരിക്കയിലെ ഏറ്റവും പുരാതന മലയാളീ സംഘടനയായ കേരളാ സമാജം ഓഫ് ഗ്രെയ്റ്റര്‍ ന്യൂയോര്‍ക്ക് അന്‍പത്തിരണ്ടാമത് വാര്‍ഷിക ഡിന്നറും ഫാമിലി നൈറ്റും 23 ശനിയാഴ്ച വൈകിട്ട് 6 മണി മുതല്‍ ഫ്‌ലോറല്‍ പാര്‍ക്കിലുള്ള ടൈസണ്‍ സെന്ററില്‍ (Tyson Center, 26 North Tyson Avenue, Floral Park, NY 11001) വച്ച് നടത്തുന്നു. മലയാളീ പൈതൃകം നിലനിര്‍ത്തിക്കൊണ്ട് കഴിഞ്ഞ 52 വര്‍ഷമായി ന്യൂയോര്‍ക്കിലെ ലോങ്ങ് ഐലന്‍ഡ് ഭാഗത്ത് വളരെ പ്രശംസനീയമായി മുന്നേറിക്കൊണ്ടിരിക്കുന്ന കേരളാ സമാജം 2024-ലെ ഭരണസമിതിയുടെ നേതൃത്വത്തിലുള്ള പ്രവര്‍ത്തനങ്ങളുടെ പരിസമാപ്തി കുറിക്കുന്ന പരിപാടിയാണ് വാര്‍ഷിക ഡിന്നറും കുടുംബ സംഗമവും. മലയാള സാഹിത്യത്തിലെ സമകാലീക യുവ എഴുത്തുകാരനായ ഇ. സന്തോഷ് കുമാറാണ് കുടുംബ സംഗമത്തിലെ മുഖ്യാതിഥി.

കേരളാ സാഹിത്യ അക്കാദമിയുടെ രണ്ടു വര്‍ഷത്തെ അവാര്‍ഡ് ജേതാവാണ് യുവ എഴുത്തുകാരനായ സന്തോഷ് കുമാര്‍. 2006-ല്‍ അദ്ദേഹത്തിന്റെ ചെറുകഥാ സമാഹാരമായ 'ചാവുകളി' എന്ന കൃതിക്കാണ് ആദ്യമായി കേരളാ സാഹിത്യ അവാര്‍ഡ് ലഭിച്ചത്. പിന്നീട് 2012-ല്‍ സന്തോഷിന്റെ  'അന്ധകാരനഴി' എന്ന നോവലിന്  അവാര്‍ഡ് നല്‍കി കേരളാ സാഹിത്യ അക്കാദമി രണ്ടാമതും അദ്ദേഹത്തെ ആദരിച്ചു. ഏതാനും ദിവസങ്ങള്‍ക്ക് മുമ്പ് നടന്ന ലാനയുടെ പരിപാടിയില്‍ പങ്കെടുക്കുവാനാണ് സന്തോഷ് കുമാര്‍ അമേരിക്കയില്‍ എത്തിയത്.

'മലയാളത്തിലെ പ്രശസ്ത യുവ സാഹിത്യകാരനായ സന്തോഷ് കുമാറിനെ ഈ വര്‍ഷത്തെ ഫാമിലി ഡിന്നറിന് ലഭിച്ചത് കേരളാ സമാജത്തിന്റെ ഭാഗ്യമാണ്. അരനൂറ്റാണ്ടിലധികം ന്യൂയോര്‍ക്കില്‍ പ്രശംസനീയ സാന്നിധ്യം തെളിയിച്ച കേരളാ സമാജം പോലുള്ള സംഘടനക്ക് ഏകദേശം സമപ്രായക്കാരനായ ഒരു യുവ സാഹിത്യകാരനെ മുഖ്യാതിഥിയായി ലഭിക്കുക എന്നത് ചരിത്രത്തിന്റെ ഏടുകളില്‍ രേഖപ്പെടുത്തേണ്ടതാണ്. ശനിയാഴ്ച നടക്കുന്ന കുടുംബ സംഗമത്തില്‍ എല്ലാ കേരളാ സമാജം അംഗങ്ങളും അതിഥികളും കുടുംബ സമേതം വന്ന് പങ്കെടുക്കണമെന്ന് എല്ലാവരെയും പ്രത്യേകം ക്ഷണിക്കുന്നു.'  സമാജം പ്രസിഡന്റ് സിബി ഡേവിഡും സെക്രട്ടറി സജി എബ്രഹാമും ട്രഷറര്‍ വിനോദ് കെയാര്‍ക്കെയും സംയുക്തമായി എല്ലാവരെയും പരിപാടിയിലേക്ക് ക്ഷണിച്ചുകൊണ്ട്. പ്രസ്താവിച്ചു.

'സമാജത്തിലെ മുന്‍കാല അംഗങ്ങളെയും കുടുംബാംഗങ്ങളെയും കാണുവാനും സ്‌നേഹബന്ധങ്ങള്‍ പുതുക്കുവാനുമുള്ള അവസരമായതിനാല്‍ എല്ലാ അംഗങ്ങളും വന്നുചേര്‍ന്ന് കുടുംബ സംഗമം വിജയപ്രദമാക്കണമെന്ന് അഭ്യര്‍ത്ഥിക്കുന്നു. സമാജത്തിന്റെ ഇത്രയും നാളത്തെ പ്രവര്‍ത്തനങ്ങള്‍ക്ക് നേത്യത്വം നല്‍കിയ എല്ലാവരെയും അഭിനന്ദിക്കുന്നു, അവരോടുള്ള കടപ്പാട് അറിയിക്കുന്നു'  ട്രസ്റ്റീ ബോര്‍ഡ് ചെയര്‍മാന്‍ സണ്ണി പണിക്കര്‍ പറഞ്ഞു.

കൂടുതല്‍ വിവരങ്ങള്‍ക്ക് ബന്ധപ്പെടുക:

1. Thomas David (Sibi), President -  Mob:   (917 ) 353- 1242  Email:  sibidavidny@yahoo.com

2. Sunny Panicker, Board Chairman - Mob: (516) 884-7438   Email: philipopanicker@yahoo.com

3. Saji Abraham, Secretary - Mob: (917) 617-3959  Email: sajiabraham98@gmail.com

4. Vinod Kearke, Treasurer - Mob: (516) 633-5208  Email: vinodkearke@gmail.com