നാഗചൈതന്യ- ശോഭിത വിവാഹം നെറ്റ്ഫ്ലിക്സിൽ കാണാം. പുറത്തുവരുന്ന റിപ്പോർട്ടുകൾ പ്രകാരം അടുത്ത മാസം നാലിന് ഹൈദരാബാദിൽവെച്ചാണ് താര വിവാഹം. ഈ കഴിഞ്ഞ ആഗസ്റ്റിലായിരുന്നു ഇരുവരുടെയും വിവാഹനിശ്ചയം നടന്നത്. അന്ന് ഇരു കുടുംബാംഗങ്ങൾ മാത്രമായിരുന്നു ചടങ്ങിൽ പങ്കെടുത്തത്.

ഇപ്പോഴിതാ സോഷ്യൽ മീഡിയയിൽ ചർച്ചയായികൊണ്ട് താരങ്ങളുടെ വിവാഹവുമായി ബന്ധപ്പെട്ട പുതിയ റിപ്പോർട്ടുകളാണ് പുറത്തുവരുന്നത്. ഇരുവരുടെയും വിവാഹ വിഡിയോ ഒ.ടി.ടിയിലൂടെ എത്തുമെന്നാണ് പ്രചരിക്കുന്ന റിപ്പോർട്ടുകൾ. നെറ്റ്ഫ്ലിക്സാണ് 50 കോടി രൂപക്ക് ഇതു സ്വന്തമാക്കിയിരിക്കുന്നതെന്നാണ് ട്രേഡ് അനലിസ്റ്റ് മനോബാല വിജയബാലനെ ഉദ്ധരിച്ച് ദേശീയ മാധ്യമങ്ങൾ റിപ്പോർട്ട് ചെയ്യുന്നത്. എന്നാൽ ഇതിനെക്കുറിച്ച് ഇപ്പോഴും നാഗചൈതന്യയോ ശോഭിതയോ പ്രതികരിച്ചിട്ടില്ല.

ഇപ്പോൾ കത്തിപ്പടരുന്ന നയൻതാര – വിഘ്നേഷ് ശിവൻ വിവാഹം പ്രേക്ഷകരിലേക്ക് എത്തിച്ചത് നെറ്റ്ഫ്ലിക്സ് ആയിരുന്നു. റിപ്പോർട്ടുകൾ ശരിയാണ് എങ്കിൽ നെറ്റ്ഫ്ലിക്സ് വാങ്ങുന്ന രണ്ടാമത്തെ തെന്നിന്ത്യൻ താര വിവാഹമാണിത്. 25 കോടി രൂപക്കാണ് നയൻതാരയുടെ വിവാഹദൃശ്യങ്ങൾ നെറ്റ്ഫ്ലിക്സ് സ്വന്തമാക്കിയത്.

ഹൈദരാബാദിലെ അന്നപൂര്‍ണ സ്റ്റുഡിയോയിൽ വെച്ചാകും നാഗചൈതന്യ- ശോഭിത വിവാഹം നടക്കുക. നടന്റെ പുനർ വിവാഹമാണ്. 2021 ലാണ് നടൻ നാഗചൈതന്യയും നടി സാമന്തയും നിയമപരമായി വേർപിരിയുന്നത്. ദീർഘ നാളത്തെ പ്രണയത്തിന് ശേഷമാണ് 2017 ൽ ഇരുവരും വിവാഹിതരായിരുന്നത്.