ഔങ്കാര മാരോ മുഴക്കുന്ന വേദിയില്‍,
ആത്മപ്രഭാങ്കുരമായി.
ആയുസ്സില്‍ നീളമളക്കുന്ന ശക്തിക്ക്,
ജീവസ്്പന്ദനങ്ങളാല്‍ നന്ദി,
നന്ദി..... നിരന്തരം നന്ദി....
സര്‍വചരാചര സ്വരരാഗധാര,
സംഗീതസാന്ദ്രമായ് നീളെ,
സര്‍ഗ്ഗസൗന്ദര്യത്തികവാര്‍ന്ന ഭൂമിയില്‍,
സ്‌നേഹാര്‍ദ്ര ബന്ധിനമേകി,
സൗഭഗതീരത്തണയ്ക്കുവാനായ് സദാ,
കൈപിടിച്ചാനയിക്കുന്ന,
ജീവദശകളെ യൂട്ടി വളര്‍ത്തുന്ന
രക്തബന്ധങ്ങളേ നന്ദി;
നന്ദി...നിരന്തരം നന്ദി....
വായുവും വെള്ളവും മണ്ണും വെളിച്ചവും,
സസ്യജാലങ്ങളുമൊത്ത്,
കാറ്റായ്, മഴയാ,യിടിയാ, യിടയ്ക്കിടെ-
സാഗരഗര്‍ജ്ജനമായി,
അട്ടഹാസങ്ങളും കളകൂജനങ്ങളും,
ചിരിയും കരച്ചിലുമായി,
സ്വര്‍ഗ്ഗം ചമച്ചിടുന്നോരോ ഋതുവിലും,
നന്ദി..... നിരന്തരം നന്ദി.....
ജീവിക്കുവകാശമാകുമിപ്പാരിടം,
താവളമായ് മൃതിയോളം,
പഞ്ചേന്ദ്രിയം വരദാനമാം മര്‍ത്ത്യന്, 
പാവനമായ നിയോഗം,
ചിന്തയാല്‍, വാക്കാല്‍, പ്രവൃത്തിയാലേവര്‍ക്കും,
കൈവന്ന നന്മകള്‍ക്കെല്ലാം,
നിത്യം കൃതജ്ഞത ചൊല്ലാതെങ്ങെനെ,
ജന്മം കൃതാര്‍ത്ഥമായ്ത്തീരും?
ദുഃഖസുഖമയയാത്രയിലിത്തിരി-
പ്രത്യാശ കൈവരീച്ചീടാന്‍,
എത്ര വിചിത്രമാംദൃശ്യങ്ങളെമ്പാടും,
നിത്യം ചലച്ചിത്രതുല്യം,
നാവിനാല്‍ നന്ദിയോതാന്‍-കഴിയുന്നവര്‍,
മാനവരെല്ലാതെയാര്?
നന്ദി.... നിരന്തരം നന്ദി....
നന്ദി....നിരന്തരം നന്ദി.