നാലായിരത്തോളം പേരുടെ ജീവനെടുത്ത ഭൂകമ്പത്തിന് പിന്നാലെ മധ്യ മ്യാൻമറിൽ വീണ്ടും ഭൂകമ്പം. 5.5 തീവ്രത രേഖപ്പെടുത്തി.  യുഎസ് ജിയോളജിക്കൽ സർവേയുടെ കണക്കനുസരിച്ച്, മധ്യ മ്യാൻമറിലെ  ചെറിയ നഗരമായ മെയ്ക്റ്റിലയ്ക്ക് സമീപം ഞായറാഴ്ച രാവിലെ 5.5 തീവ്രത രേഖപ്പെടുത്തിയ ഭൂകമ്പം ഉണ്ടായി.

മാർച്ച് 28 ന് മ്യാൻമറിന്റെ മധ്യമേഖലയിൽ ഉണ്ടായ 7.7 തീവ്രത രേഖപ്പെടുത്തിയ ഭൂകമ്പത്തെത്തുടർന്ന് ദുരിതാശ്വാസ പ്രവർത്തനങ്ങൾ നടത്തുന്നതിനിടെയാണ് ഈ ഭൂകമ്പം ഉണ്ടായത്. കഴിഞ്ഞ മാസത്തെ ഭൂകമ്പത്തിൽ വൻ നാശനഷ്ടങ്ങളും ആളപായങ്ങളും ഉണ്ടായ മ്യാൻമറിലെ രണ്ടാമത്തെ വലിയ നഗരമായ മണ്ടാലെയ്ക്കും തുടർന്ന് നിരവധി സർക്കാർ ഓഫീസുകൾക്ക് കേടുപാടുകൾ സംഭവിച്ച തലസ്ഥാനമായ നയ്പിറ്റോയ്ക്കും ഇടയിലുള്ള ഒരു ഇടനാഴിയായിരുന്നു ഏറ്റവും പുതിയ ഭൂകമ്പത്തിന്റെ പ്രഭവകേന്ദ്രം.

മാർച്ച് 28-ന് ഉണ്ടായ ഭൂകമ്പത്തിൽ നൂറുകണക്കിന് തുടർചലനങ്ങളിൽ ഒന്നാണ് പുതിയ ഭൂകമ്പം. ഇതിൽ വലിയ നാശനഷ്ടങ്ങളോ ആളപായമോ ഉണ്ടായതായി ഉടൻ റിപ്പോർട്ടുകൾ ഇല്ല. വെള്ളിയാഴ്ച വരെ, ആ ഭൂകമ്പത്തിൽ മരിച്ചവരുടെ എണ്ണം 3,649 ആയിരുന്നു, 5,018 പേർക്ക് പരിക്കേറ്റതായി മ്യാൻമർ സൈനിക സർക്കാരിന്റെ വക്താവ് മേജർ ജനറൽ സാവ് മിൻ തുൻ പറഞ്ഞു.