ഫ്‌ലോറിഡ : കാമുകനുമായുള്ള വഴക്കിനെത്തുടര്‍ന്ന് അമിതവേഗതയില്‍ കാറോടിച്ച് അപകടമുണ്ടാക്കി കാമുകന്റെ മരണത്തിന് കാരണക്കാരിയായ യുവതി കുറ്റക്കാരിയാണെന്ന് കോടതി കണ്ടെത്തി. ഫ്‌ലോറിഡയിലെ ലെയ്ഗ മുംബി (25) എന്ന യുവതിയാണ് വാഹനാപകടത്തിലൂടെയുള്ള നരഹത്യ, ഗുരുതര പരുക്കിന് കാരണമായ അശ്രദ്ധമായ ഡ്രൈവിംഗ് എന്നീ കുറ്റങ്ങളില്‍ ശിക്ഷിക്കപ്പെട്ടത്.

22 വയസ്സുകാരനായ ഡാനിയല്‍ വാട്ടര്‍മാന്റെ മരണവുമായി ബന്ധപ്പെട്ട് നടന്ന രണ്ടുദിവസത്തെ വിചാരണയ്ക്കൊടുവില്‍, 25 വയസ്സുകാരിയായ  മുംബിയെ ഒക്ടോബര്‍ 14 ബുധനാഴ്ച കുറ്റക്കാരിയായി കണ്ടെത്തിയെന്ന് ഫ്‌ലോറിഡയിലെ സെവന്‍ത് ജുഡീഷ്യല്‍ സര്‍ക്യൂട്ട് സ്റ്റേറ്റ് അറ്റോര്‍ണി ഓഫീസ് അറിയിച്ചു.

2025 ഫെബ്രുവരി 9-നാണ് കേസിനാസ്പദമായ സംഭവം നടന്നത്. ഫ്‌ലോറിഡയിലെ ഇന്റര്‍‌സ്റ്റേറ്റ് 95 പാതയിലൂടെ മണിക്കൂറില്‍ 94 മൈല്‍ (ഏകദേശം 151 കിലോമീറ്റര്‍) വേഗതയില്‍ കാറോടിക്കുന്നതിനിടയില്‍ ലെയ്ഗയും കാമുകന്‍ ഡാനിയല്‍ വാട്ടര്‍മാനും (22) തമ്മില്‍ വഴക്കുണ്ടായി.

തര്‍ക്കത്തിനിടയില്‍ യുവതി പെട്ടെന്ന് സ്റ്റീയറിങ് ഇടത്തേക്ക് വെട്ടിച്ചതിനെ തുടര്‍ന്ന് നിയന്ത്രണം നഷ്ടപ്പെട്ട കാര്‍ ഹൈവേയില്‍ നിന്ന് പാഞ്ഞുപോയി മരങ്ങളില്‍ ഇടിക്കുകയായിരുന്നു.

അപകടത്തില്‍ ഡാനിയലിന്റെ കഴുത്തൊടിയുകയും കഴുത്തിന് താഴേക്ക് ശരീരം തളരുകയും ചെയ്തു. തുടര്‍ന്ന് എട്ടുമാസത്തിനു ശേഷം 2025 ഒക്ടോബര്‍ 8-ന് ന്യൂമോണിയ ബാധിച്ച് അദ്ദേഹം മരണപ്പെടുകയുണ്ടായി.

അപകടം നടന്ന ദിവസമാണ് താന്‍ ഗര്‍ഭിണിയാണെന്ന് ലെയ്ഗ അറിയുന്നത്. ഇതിനിടയില്‍ ഡാനിയല്‍ മറ്റൊരു സ്ത്രീയുമായി ചാറ്റ് ചെയ്യുന്നത് കണ്ടതിനെ തുടര്‍ന്നുണ്ടായ കടുത്ത പ്രകോപനമാണ് അപകടത്തിലേക്ക് നയിച്ചതെന്ന് പ്രോസിക്യൂഷന്‍ കോടതിയില്‍ വാദിച്ചു. എന്നാല്‍ താന്‍ ആത്മഹത്യ ചെയ്യാന്‍ ശ്രമിക്കുകയോ ആരുടെയും ജീവന്‍ അപകടപ്പെടുത്താന്‍ ഉദ്ദേശിക്കുകയോ ചെയ്തിട്ടില്ലെന്നായിരുന്നു പ്രതിഭാഗത്തിന്റെ വാദം. ഫ്‌ലാഗ്ലര്‍ കൗണ്ടി കോടതിയില്‍ നടന്ന വിചാരണയ്‌ക്കൊടുവില്‍ ജൂറി വിധി പ്രഖ്യാപിക്കുകയായിരുന്നു. യുവതിക്കുള്ള ശിക്ഷ പിന്നീട് വിധിക്കും.