ജീവിതച്ചെലവിനെതിരെ രാജ്യവ്യാപകമായി ആരംഭിച്ച പ്രതിഷേധങ്ങൾ ശനിയാഴ്ച ഫ്രാൻസിൽ വ്യാപകമായ അക്രമത്തിൽ കലാശിച്ചു. 2,397 പേരെ കസ്റ്റഡിയിലെടുത്തതായും ഏഴുപേർക്ക് ഗുരുതരമായി പരിക്കേറ്റത് ഉൾപ്പെടെ 997 പോലീസ് ഉദ്യോഗസ്ഥർക്കും ജെൻഡാമുകൾക്കും (സായുധ സുരക്ഷാ ഉദ്യാഗസ്ഥർ) പരിക്കേറ്റതായും ആഭ്യന്തര മന്ത്രാലയം ഞായറാഴ്ച അറിയിച്ചു.

വാരാന്ത്യത്തിൽ ഫ്രാൻസിലുടനീളമുണ്ടായ പ്രതിഷേധങ്ങളിൽ 1,500-ഓളം കടകൾക്കും റീട്ടെയിൽ സ്ഥാപനങ്ങൾക്കും കേടുപാടുകൾ സംഭവിച്ചതായും അവയിൽ പലതും കൊള്ളയടിക്കപ്പെട്ടതായും ഈ മേഖലയെ പ്രതിനിധീകരിക്കുന്ന ഒരു ഗ്രൂപ്പിന്റെ തലവൻ പറഞ്ഞു. എൽസിഐ ടെലിവിഷന് നൽകിയ അഭിമുഖത്തിൽ, വ്യാപാര സ്ഥാപനങ്ങൾക്കുണ്ടായ നഷ്ടം "നൂറുകണക്കിന് ദശലക്ഷം യൂറോ" വരെ വരുമെന്ന് റീട്ടെയിൽ ആൻഡ് ട്രേഡ് ഫെഡറേഷൻ പ്രസിഡന്റ് അലക്സാണ്ടർ ബോംപാർഡ് വ്യക്തമാക്കി. കൃത്യമായ കണക്ക് നൽകാൻ ഇനിയും സമയമായിട്ടില്ലെന്നും അദ്ദേഹം പറഞ്ഞു.

ഞായറാഴ്ച രാഷ്ട്രത്തെ അഭിസംബോധന ചെയ്തുകൊണ്ട് ഫ്രഞ്ച് പ്രസിഡന്റ് ഇമ്മാനുവൽ മാക്രോൺ അക്രമങ്ങളെ ശക്തമായി അപലപിച്ചു. രാജ്യവ്യാപകമായി അക്രമവും കൊള്ളിവെപ്പും നടത്തുന്നവർക്കെതിരെ കർശന നടപടി സ്വീകരിക്കുമെന്ന് പ്രസിഡന്റ് മാക്രോൺ പറഞ്ഞു